මේ නිසාම කටට රස වාගේම ඇඟට ගුණ ආහාර කිහිපයක් පිසගන්න හැටි කියාදෙන්න තරුණී තීරණය කළා.

විශේෂයෙන්ම පෝෂණ ගුණය රැකෙන පරිදි සකස් කළ එළවළු සලාද වාගේම පලතුරු සලාද, සුප් වර්ග විතරක් නෙමෙයි ගුණදායක බත් වර්ගත් මෙයට ඇතුළත්.

ඒ වගේම තමයි එග් මෆින්, ෆිෂ් පයි වාගේ කෙටි කෑම වර්ග කිහිපයක් හදාගන්න හැටිත් අපි ඔයාලට කියාදෙනවා.

ඔලිව් තෙල් වැනි ශරීරයට හිතකර අමුද්‍රව්‍ය නිසි ප්‍රමාණයට මිශ්‍ර කරලා හදන මේ ආහාර බොහොමයක් සකස් කරන්න එතරම් කාලවේලාවක් ගත වෙන්නෙත් නැහැ.

වැඩි වෙලාවක් ළිපේ තියලා රත් කරලා රසය, ගුණය, පෙනුම වෙනස් වෙන්නෙත් නැති හින්දා බැලූ බැල්මට හොඳ පෙනුමකුත් තියෙනවා.

හැමදාමත් හදන එකම කෑම ටික මේ විදිහට පෝෂණ ගුණය රැකෙන ආකාරයට හදලා බලන්නකෝ පවුලේ උදවියගේ ප්‍රතිචාර කොහොමද කියලා.

* * * * * * * *

 මෂ්රූම් සුප්

 රසය, පෝෂණ ගුණය එකට කැටි වූ සුප් කෝප්පයකට තිබෙන ඉල්ලුම හැමදාමත් ඉහළයි. විවිධ රසයට හදන සුප් අතරේ මේ හතු සුප් එක මොනතරම් නම් අපූරුද?

අවශ්‍ය ද්‍රව්‍ය

හීනියට පෙති කපාගත් බට්න් හතු ග්‍රෑම් 450 ක්

ඔලිව් තෙල් මේස හැඳි 03 ක්

කුඩාවට කපාගත් ලොකු ලූනු ගෙඩියක්

තළාගත් සුදුලූනු බික් 02 ක්

පිටි මේස හැඳි 02 ක්

චිකන් ස්ටොක් ලීටර් 01 ක්

සුප් කැට දෙකක්. (වතුර ලීටර් එකකට දියකර සාදාගන්න)

කුඩාවට කඩාගත් පාස්ලි කොළ මේස හැඳි 02 ක්

කුඩු කරගත් ගම්මිරිස් ඇට තේ හැඳි 1/2 ක්

රස අනුව ලුණු

 සාදන ක්‍රමය

බඳුනක් ගෙන ඔලිව් තෙල් දමා ළිප තබන්න. තෙල් රත්වූ විට එයට කපාගත් ලූනු, සුදුලූනු දමා හොඳ සුවඳක් හමනතෙක් පිසගන්න.

ඉන්පසුව හීනියට කපාගත් බට්න් හතු ටික මෙයට එකතුකර විනාඩි 05 ක් පමණ හැඳිගාමින් පිසින්න. අනතුරුව පිටි ටික ද එකතුකර හොඳින් කලවම් කරන්න. මෙහිදී සෑම හතු කැබැල්ලකම පිටි තැවරෙන පරිදි කලවම් කරන්නට වගබලාගන්න.

දැන් චිකන් ස්ටොක්, පාස්ලි, ගම්මිරිස් ආදිය එකතුකර හොඳින් උණු වෙන්නට හරින්න. සුප් එක උණු වූ පසුව ගින්දර අඩුකර තවත් විනාඩි 05 ක් පමණ ඉදෙන්නට හැර ළිපෙන් බාගන්න.

අනතුරුව මඳ වේලාවක් නිවෙන්නට හැර බ්ලෙන්ඩරයකට දමා හොඳින් ගසාගන්න. පිළිගැන්වීමට පෙර රස පදමට ලුණු, ගම්මිරිස් දමාගන්න. ඔලිව් තෙල් මේස හැන්දක් ද සුප් එක උඩින් දමන්න.

  චිකන් ඇන්ඩ් කැබේජ් සැලඩ්

තෙලට, මිරිසට, කිරට ආදී විවිධ විදිහට ඔබ කුකුළු මස් රස විඳලා තිබුණත් කුකුළු මස් සලාදයක් විදිහට නම් කාලා නැතුව ඇති. බලන්න මේ සලාදය කොයිතරම් නම් රසවත්දැයි කියා.

අවශ්‍ය ද්‍රව්‍ය

තම්බාගත් කුකුළු මස් (පපු කොටසින්) ග්‍රෑම් 200 ක්

දම් පාට ගෝවා කෝප්ප 1/4 ක්

කොත්තමල්ලි කොළ කෝප්ප 1/4 ක්

මිංචි කොළ කෝප්ප 1/4 ක්

චයිනිස් ගෝවා කොළ කෝප්ප 1/4 ක්

තල ඇට මේස හැඳි 01 ක්

සීනි තේ හැඳි 01 ක්

ෆිෂ් සෝස් මේස හැඳි 02 ක්

තළාගත් රතු මිරිස් කරල් 02 ක්

දෙහි යුෂ මේස හැඳි 03 ක්

ලුණු (රස අනුව)

සාදන ක්‍රමය

ප්‍රථමයෙන්ම තළාගත් හෝ කුඩාවට කපාගත් රතු මිරිස්, දෙහි යුෂ, ෆිෂ් සෝස්, සීනි, ලුණු යන මේ සියල්ලම බඳුනකට දමා හොඳින් කලවම්කර පැත්තකින් තබන්න.

දැන් තවත් භාජනයක් ගෙන එයට හීනියට කපාගත් දම්පාට ගෝවා, කොත්තමල්ලි කොළ, මිංචි කොළ දමාගන්න. චයිනිස් ගෝවා ටික ද කුඩාවට කඩාගන්න. කුකුළු මස් කුඩා තීරු වශයෙන් ඉරාගන්න.

ඉන්පසුව මේ සියල්ලම එකම භාජනයකට දමා තල ඇට ද එකතු කරන්න. පළමුව සකසාගත් දෙහි, මිරිස් මිශ්‍රණය ද මෙයට දමා හොඳින් කලවම් කරගන්න.

 එග් මෆින්ස්

 නිවාඩු දවසේ ගෙදර රැඳෙන පොඩිත්තන්ට හැම වෙලාවේම මොනවා හරි හපන්න ඕනේ. හරිම පහසුවෙන් සහ ඉක්මනින් සකසා ගතහැකි මේ ගුණදායක මෆින් ඊට හරි අපූරුයි.

අවශ්‍ය ද්‍රව්‍ය

බිත්තර 08 ක්

ග්‍රේට් කරගත් චෙඩාර් චීස් කෝප්ප 01 ක්

කුඩාවට කොටු කපාගත් තක්කාලි ගෙඩියක්

සිහින්ව කපාගත් අමුමිරිස් කරල් 02 ක්

තළාගත් ලූනු ගෙඩියක්

අඹරාගත් සුදුලූනු බික් දෙකක්

තම්බා කුඩාවට කපාගත් කුකුළු මස් ටිකක් ද ඔබ කැමැති නම් මෙයට එකතු කරගත හැකියි.

සාදන ක්‍රමය

සෙල්සියස් අංශක 160 ට විදුලි උදුන රත්කරගන්න. බිත්තර ටික හොඳින් ගසාගන්න.

දැන් මේ බිත්තර ටිකට ග්‍රේට් කළ චීස්, තක්කාලි, අමුමිරිස්, ලුණු, සුදුලූනු, කුකුළු මස් ආදී සියල්ලම එකතුකර හොඳින් ගසාගන්න. අනතුරුව මෆින් ට්‍රේ එකක් ගෙන මේ මිශ්‍රණය ඊට දමාගන්න.

විනාඩි 20 ක් පමණ මෙය බේක් කරගත යුතු අතර මෆින් උඩ රන් පැහැයට හුරු දුඹුරු පැහැයක් එනවිට අවන් එකෙන් පිටතට ගන්න.

 කුකුළු මස් සමඟ බත් මිශ්‍ර සුප්

බත්වලින් හදන සුප් එකක රස කොහොමද කියලා ඇතැම්විට ඔබ නොදන්නවා ඇති.

 මොකද එළවළු, මස්, මාළුවලින් හදන සුප් ගැන කතා කළාට බත් මිශ්‍ර සුප් ගැන වැඩිය කතා කරලා නැහැනෙ. කුකුළු මස්, බත් සහිත මේ සුප් එකේ රස හදලම බලන්නකෝ.

අවශ්‍ය ද්‍රව්‍ය

සිහින්ව පෙති කපාගත් ලූනු ගෙඩි 1/2 ක්

ඉතා කුඩාවට පෙති කපාගත් කැරට් අල 02 ක්

අඹරාගත් සුදුලූනු බික් 02 ක්

ඔලිව් තෙල් මේස හැඳි 02 ක්

කුඩාවට කපාගත් කුකුළු මස් ග්‍රෑම් 250 ක්

කුකුළුමස් ස්්ටොක් කෝප්ප 08 ක්

බාස්මති සහල් කෝප්පයක්

ඔලිව් තෙල් ස්වල්පයක්

ලුණු, ගම්මිරිස් (රස අනුව)

සාදන ක්‍රමය

තරමක් ගැඹුරු භාජනයක් ළිප තබා එයට ඔලිව් තෙල් ස්වල්පයක් දමා රත් වෙන්නට හරින්න. තෙල් රත්වීගෙන එනවිට එයට කපාගත් ලූනු සහ කැරට් ටික දමා කලවම් කරමින් විනාඩි දෙකක් පමණ පිසගන්න. අනතුරුව බඳුන පියනකින් වසා තවත් විනාඩි 02 ක් පිසින්න.ඉන්පසුව අඹරාගත් සුදුලූනු ටික එකතුකර නැවතත් කලවම් කරමින් තවත් විනාඩි දෙකක් පිසගන්න. දැන් කුකුළු මස් ස්ටොක් එක ද එයට එකතුකර ගින්දර තරමක් වැඩි කරන්න. මිශ්‍රණය උණුවීගෙන එනවිට කුකුළු මස් සහ සෝදාගත් සහල් ටික එකතු කරන්න. රස පදමට ලුණු ගම්මිරිස් දමාගන්න. ගින්දර අඩුකර විනාඩි 15 ක් 20 ක් පමණ පිසගන්න.

ඔබ ළිපෙන් බා ගත් සුප් එක විනාඩි 05 ක් පමණ නිවෙන්නට හැර ලුණු පරික්ෂාකර පිළිගන්වන්න.

  සී ඇන්ඩ් එස් සීසර් සැලඩ්

 සැහැල්ලු ආහාරයකට කියාපු කෑමක් තමයි සලාද. දම්පාට ගෝවා කොළයි, නිවිතියි මිශ්‍ර මේ රසවත් සලාදය හදාගන්න ඔබට වැය වන්නේ විනාඩි දෙකක් විතරයි.

අවශ්‍ය ද්‍රව්‍ය

මයෝනේස් මේස හැඳි 03 ක්

ලෙමන් යුෂ මේස හැඳි 1 1/2 ක්

ගම්මිරිස් කුඩු තේ හැඳි 1/2 ක්

අඹරාගත් සුදුලූනු බික් එකක්

කපාගත් දම්පාට ගෝවා කොළ කෝප්ප 02 ක්

කුඩා නිවිති කොළ කෝප්ප 01 ක්

පර්මේසන් චීස් කුඩු තේ හැඳි 05 ක්

රස අනුව ලුණු

සාදන ක්‍රමය

නිවිති සහ ගෝවා කොළ ටික හැර අන් සියලුම ද්‍රව්‍ය බඳුනකට දමා විස්ක් එකකින් කලවම් කරගන්න. ඉන්පසුව නිවිති සහ දම්පාට ගෝවා ටික ද එයට කලවම්කර රස පදමට ලුණු මිශ්‍ර කරගන්න.

 පොටෙටෝ ෆිෂ් පයි

විවිධ කෑම රස බලන්න වැඩියෙන්ම කැමැත්තක් දක්වන්නේ අපේ පොඩිත්තන් තමයි. පැණි රස, තෙල් රස බලන ඒ අයට වෙනසකටත් එක්ක මේ අල සහ මාළු මිශ්‍ර පයි අපූරු වෙනසක් ගෙනේවි.

අවශ්‍ය ද්‍රව්‍ය

පොතු ඉවත්කර කුඩාවට කොටු කපාගත් අර්තාපල් ග්‍රෑම් 600 ක්

මඳ උණුසුම් කිරි කෝප්ප 1/3 ක්

කටු ඉවත්කර කොටු කපාගත් ටූනා මාළු ග්‍රෑම් 500 ක්

පොතු ඉවත්කර ගත් ඉස්සෝ ග්‍රෑම් 250 ක්

නැවුම් කිරි කෝප්පයක්

බඩඉරිඟු පිටි මේස හැඳි 01 ක්

සිහින්ව පෙති කපාගත් ලූනු ගෙඩි 02 ක්

රස පදමට ලුණු සහ ගම්මිරිස්

සාදන ක්‍රමය

බඳුනකට ජලය දමා එය ළිප මත තබන්න. එය නටනවිට අල ටික දමා හොඳින් තම්බාගන්න.

දැන් වෙනත් බඳුනකට මේ තම්බාගත් අල ටික දමා අඩු ගින්දරේ තබාගෙන හොඳින් පොඩි කරගන්න. එයට මඳ උණුසුම් කිරි ටිකද එකතු කරමින් පොඩි කරගත යුතුයි. රස පදමට ලුණු සහ ගම්මිරිස් දමන්න.

වෙනත් බඳුනකට නැවුම් කිරි වලින් 3/4 ක් දමා මාළු සහ ඉස්සෝ ටික දමා ළිප තබන්න. මෙය විනාඩි 02 - 03 ක් පමණ පිසගන්න. ඉතිරි කිරි ටික බඩඉරිඟු පිටි සමග දියකර එයද එකතු කරන්න. අනතුරුව කපාගත් ලූනු එකතුකර විනාඩි 05 ක් පිසගන්න.

දැන් ළිපෙන් බාගත් මෙම මිශ්‍රණය අවන් එකට දැමිය යුතුයි. ඒ සඳහා සුදුසු බඳුනක් ගෙන පළමුව කිරිවලින් සකසාගත් මිශ්‍රණය දමන්න. ඊට උඩින් අල ටික ද ලස්සනට අතුරා සෙල්සියස් අංශක 160 උෂ්ණත්වයට රත් වූ අවන් එකක විනාඩි 15 ක් බේක් කරගන්න. රන්වන් පැහැයට හැරෙනවිට පිටතට ගන්න.

 හෙල්දි චිකන් කරි

හොද්දක්, ව්‍යාංජනයක් රස කරන්න අප එකතුකරන අමුද්‍රව්‍ය ඒ කියන්නෙ රසකාරක හැමදෙනෙක්ම අනුභව කරන්නෙ නැහැ. විශේෂයෙන්ම රම්පා, කරපිංචා, ගොරකා, කුරුඳුපොතු වාගේ දේවල් බත්පතේ පසෙකින් ඉතිරි කරන්න තමයි වැඩිදෙනකු පුරුදු වෙලා ඉන්නෙ.ඒ නිසාම මේ සියලු අමුද්‍රව්‍ය අඹරලා ඒවායේ අඩංගු ගුණාත්මක කොටස් ආහාරයට ගැනීමට හැකි පරිදි සකසාගත් කුකුළු මස් ව්‍යාජනයක් තමයි මේ.

අවශ්‍ය ද්‍රව්‍ය

කුකුළු මස් කිලෝ ග්‍රෑම් 01 ක්

මිරිස් කුඩු මේස හැඳි 1 1/2 ක්

බැදපු තුනපහ මේස හැඳි 1 1/2 ක්

අමු තුනපහ මේස හැඳි 1 1/2 ක්

ගම්මිරිස් කුඩු තේ හැඳි 1 1/2 ක්

හතරට කැපූ ලූනු ගෙඩි 02 ක්

සුදුලූනු බික් 04 ක්

අමු මිරිස් කරල් 04 ක්

කරපිංචා ඉති තුනක කොළ

ඉඟුරු පොඩි කැබැල්ලක්

ඔලිව් තෙල් ස්වල්පයක්

ගොරකා පේස්ට් තේ හැඳි 01 ක්

විනාකිරි තේ හැඳි 01 ක්

මීකිරි මේස හැදි 02 ක්

රස පදමට ලුණු

 සාදන ක්‍රමය

කුකුළු මස් සෝදා පසෙකින් තබන්න. අනතුරුව ඉහත සඳහන් කළ සියලුම අමුද්‍රව්‍ය බ්ලෙන්ඩරයකට දමා වතුර කෝප්පයක් ද එකතුකර හොඳින් අඹරාගන්න.

දැන් සෝදා පසෙකින් තැබූ කුකුළු මස් ටික මැටි බඳුනකට දමා අඹරාගත් අමුද්‍රව්‍ය මිහ්‍රණය ද ඊට එකතුකරන්න. අනතුරුව කුකුළු මස් කැබලිවල හොඳින් තැවරෙන පරිදි අතගාන්න. මෙය විනාඩි 20 ක් පමණ සීසන් වන්නට පසෙකින් තබන්න.

ඉන්පසුව මෙය ළිප තබා ඉදීගෙන එනවිට නැවතත් වතුර කෝප්ප දෙකක් දමන්න. දැන් මස් එක හොඳින් තැම්බෙන තෙක් පිසගන්න. හොඳ ඝනකමක් සහිත උකු හොද්දක් සමඟ එන මස් ව්‍යාංජනයකි මේ.

 ස්ටීම් මෝදා ෆිෂ්

හරි අලංකාරයට සරසපු මේ මෝදා මාළුවා කෑම මේසයට අපූරු කලඑළියක් රැගෙන එනවා නේද? හැඩ වාගේම තමයි රසත්. ඔබත් හදලාම බලන්නකෝ.

 අවශ්‍ය ද්‍රව්‍ය

හොඳින් ශුද්ධ කරගත් මෝදා මාළුවෙක්

තුනීයට කපාගත් ඉඟුරු මේස හැන්දක්

තුනීයට කපාගත් ලූනු ගෙඩියක්

කුඩාවට කපාගත් අමුමිරිස් කරල් 02 ක්

හීනියට කැපූ සේර මේස හැන්දක්

හීනියට පෙති කැපූ සුදුලූනු බික් 04 ක්

කුඩාවට කපාගත් කොත්තමල්ලි

කොළ මේස හැඳි 01 ක්

තලතෙල් මේස හැඳි 01 ක්

ගම්මිරිස් කුඩු මේස හැඳි 1/2 ක්

කැබලි මිරිස් මේස හැඳි 1/2 ක්

දෙහි ගෙඩි දෙකක යුෂ

ඔලිව් තෙල් මේස හැඳි 01 ක්

දෙහි කොළ 03 ක් (හීනියට කපා)

මාළුවා එතීමට හැකි ප්‍රමාණයේ කෙසෙල් කොළයක්

ලුණු තේ හැඳි 3/4 ක්

සාදන ක්‍රමය

පළමුව මාළුවාව හොඳින් ශුද්ධකර බඳ කොටසේ කැපුම් 03 ක් දමන්න. මාළුවාගේ යටි බඩ කොටස කපා පැත්තකින් තබන්න.

අනෙක් සියලුම අමුද්‍රව්‍ය බඳුනකට දමා හොඳින් මිශ්‍ර කරන්න. එය විනාඩි 15 ක් පමණ ශීතකරණයේ තබන්න.

අනතුරුව මාළුවාව ගෙන මේ මිශ්‍රණය හොඳින් මාළුවාගේ තවරන්න. කැබලි වශයෙන් ඇති සෑමදෙයක්ම මාළුවාගේ බඩ ඇතුළට දමන්න. ඉන්පසුව තවාගත් කෙසෙල් කොළය මත මේ මාළුවාව තබා ඉස්ම ඉතුරු වී ඇත්නම් ඒවාද උඩින් දමන්න. දැන් කෙසෙල් කොළයේ මාළුවා ඔතා ස්ටීමරයකට දමා විනාඩි 15 - 17 ක් පමණ වේලාවක් ස්ටීම් කරගන්න. මාළුවා තරමක් විශාල නම් විනාඩි 20 ක් පමණ තැබිය යුතුයි.

ඉන්පසුව මාළුවාව ඉවතට ගෙන පරෙස්සමින් කෙසෙල් කොළය ඉවත් කරන්න. කෙසෙල් කොළයේ ඉතිරිවන ද්‍රාවණය සෝස් එකක් ලෙසින් භාවියට ගන්න.

 පැණි කොමඩු සලාදය

 රතට රතේ දිලෙන පැණි කොමඩුවලින් හදපු මේ රසම රස පලතුරු සලාදය දැක්කත් බඩ පිරෙනවා නේද? තල ඇට, මිංචි කොළ විතරක් නෙමෙයි තරමක් සැරට හදාගත්තු සෝස් එකකුත් මිශ්‍ර කරගන්න නිසා ඔබේ දිවට අමුතුම මිහිරක් කැන්දාවි.

 අවශ්‍ය ද්‍රව්‍ය

තල ඇට කෝප්ප 1/2 ක්

පැණි කොමඩු ගෙඩි 1/2ක්

මිංචි කොළ අහුරක්

ඩ්‍රෙසිං එක සඳහා

අඹරාගත් සුදුලූනු බික් 1/2 ක්

ඇඟිල්ලක් පමණ දිග ඉඟුරු

කැබැල්ලක් ග්‍රේට් කරගන්න.

තළාගත් රතු මිරිස් කරලක්

සෝයා සෝස් මේස හැඳි 01 ක්

තල තෙල් මේස හැඳි 01 ක්

 සාදන ක්‍රමය

තල ඇට ටික පෑන් එකකට දමා රන්වන් පැහැයට බැදගන්න. පැණි කොමඩු ගෙඩිය සාමාන්‍ය ප්‍රමාණයට කොටු කපාගන්න. මිංචි කොළ ටිකත් හීනියට කපාගන්න.

ඩ්‍රෙසිං එක සඳහා අවශ්‍ය සියලුම දේ බඳුනකට දමා හොඳින් කලවම් කරන්න. අනතුරුව කපා ගත් කොමඩු, මිංචි කොළ සහ තල ඇට ටික ද මෙයට දමා සියල්ල හොඳින් මිශ්‍ර කරගන්න.

  හෙල්දි එග් ෆ්‍රයිඩ් රයිස්

 විවිධාකාරයේ බත් වර්ග බොහොමයක් ඔබ රස වින්දාට සැකයක් නැහැ. හැබැයි මේවාගේ ගුණාත්මක ෆ්‍රයිඩ් රයිස් එකක් නම් කන්න නැතිව ඇති. බලන්නකෝ මේ බතේ රස.

අවශ්‍ය ද්‍රව්‍ය

කුඩාවට කොටු කපාගත් ලූනු ගෙඩියක්

කුඩාවට කොටු කැපූ කැරට් අලයක්

පිසගත් බාස්මතී බත් කෝප්ප 03 ක්

තම්බාගත් ග්‍රින්පීස් කෝප්ප 1/2 ක්

තම්බාගත් බඩ ඉරිඟු ඇට කෝප්ප 1/2 ක්

බිත්තර 03 කින් සාදාගත් ස්ක්‍රම්බල්

අඹරාගත් සුදුලූනු බික් 03 ක්

එළවලු තෙල් ස්වල්පයක්

 සාදන ක්‍රමය

බඳුනක් ළිප තබන්න. එයට එළවළු තෙල් ස්වල්පයක් දමන්න. තෙල් රත් වනවිට අඹරාගත් සුදුලූනු, කුඩාවට කැපූ ලූනු, කැරට් ආදිය දමා විනාඩි 05 ක් පමණ පිසගන්න.

ඉන්පසු ගින්දර මඳක් වැඩිකර පිසගත් බාස්මති බත් එකතු කරන්න. මේ සියල්ල හොඳින් කලවම් කරනා අතරතුරේ තවත් විනාඩි 04 ක් පමණ පිසගන්න. අනතුරුව තම්බාගත් බඩඉරිඟු සහ ග්‍රින්පීස් එකතු කරන්න.

දැන් අඩු ගින්දරේ සියල්ලම කලවම් කරනා ගමන් බිත්තර ස්ක්‍රම්බල් ද එකතුකර හොඳින් කලවම් කරන්න. ළිපෙන් බා ගත් මෙම බත උණුවෙන්ම පිළිගන්වන්න.

උපදෙස් - මීගමුව, වින්ඩ්මිල් බීච් හෝටලයේ ප්‍රධාන සුපවේදී

නේමින්ද රණතුංග

කිරි රස පිරුණු බඩ ඉරිඟු කරලක් පුච්චලා කාලා තියෙනවාද?

ඒ රස විඳින්න ඕනෙ හේනකම ඉඳගෙනයි දරුවනේ. ඒත් මේ යාන්ත්‍රික සමාජයේ ඒ වගේ නිදහසක් ඔය දරුවන්ට තියෙන එකක් යැ. පාර දෙපස බඩ ඉරිඟු තම්බන තැන් ඕනෑ තරම් තියෙන්නෙ. අඩුම තරමෙ ඒ බඩ ඉරිඟු කරලක රසයවත් විඳගන්නකෝ.

මොනවද මේ කෝන් ෆ්ලා

බඩ ඉරිඟු, ඉරිඟු කිව්වාට නොදන්න අයත් ඉන්නවා. හැබැයි ඒ අය කෝන් ෆ්ලා, කෝන් මීල්, කෝන් පිටි, කෝන් ස්ටාච් වගේ නම්වලින් කිව්වොත් දන්නවා. බටහිර ක්‍රමයට, ඉන්දියන් ක්‍රමයට කෑම හදනකොට ඔය දරුවොත් ඒවා භාවිත කරනවා ඇති. ඒ මෝරපු බඩ ඉරිඟු ඇටවලින් හදන පිටි. එතකොට තෙල් වර්ගයකුත් තියෙනවා කෝන් ඔයිල් කියලා. එතකොට බඩ ඉරිඟු සුප්... චීන කෑමවල දී අංක එකට එන සුප් වර්ගයක් තමා ඒ.

අපේ මේ පින් බිමේ වැවුණට මොකද අපේ අය හරියට ඒකෙ ගුණ දන්නෙ නැහැ. ඒ විතරක්යැ අපේම බිමේ වැවිලත් අපි කන්නෙ සුපිරි වෙළෙඳසල්වල තියෙන පිටරටින් ගෙන්වන ටින් කළ ඉරිඟු. ඔන්න ඕකයි ඇත්ත.

අපේ බිමේ වගේම ඉන්දියාවෙත් සරුවට වැඩෙන බඩ ඉරිඟු. වැඩියෙන් භාවිත කරන්නේ බටහිර වැසියෝ. ඒ වගේම ඉන්දියානුවොත් මේවා භාවිත කරනවා. එහෙම බැලුවාම අපි තමයි මේවායින් හරි ප්‍රයෝජනයක් නොගන්නේ.

විස්මයජනක පෝෂක ගබඩාවක්

ඔන්න එහෙම නම් බඩ ඉරිඟුවල පෝෂණ ගුණය ගැන ඔය දරුවන්ට මං කියලා දෙන්නම්කෝ. එතකොටවත් බඩ ඉරිඟු ආහාරයට එකතුකර ගනියිනේ.

ශරීර ශක්තිය වඩන බඩ ඉරිඟු ආහාරයට ගැනීමෙන් සිරුරට පිරුණු බවක් ගෙන දෙනවා. ඒ හින්දා අධික කෙසඟකින් යුතු අයට බොහොම හොඳ කෑමක්. අපේ සිරුරේ දිනපතා සිදුවෙන පරිවෘත්තීය ක්‍රියාවලිය කාර්යක්ෂම කරන්නත් එය නිවැරැදිව ඉටු කරන්නත් බඩ ඉරිඟු උපකාරි වෙනවා. විටමින් ඒ, විටමින් බී, විටමින් සී වගේම බොහොමයක් ඛනිජ ලවණත් මෙහි අඩංගුයි. ඒ විතරක් නෙමේ ෆයිබර් හෙවත් කෙඳිවලිනුත් බඩ ඉරිඟු පොහොසත්.

දියවැඩියාව පාලනය කරනවා. හදවත් රෝග වළකනවා. උපතේදී සිදුවන ස්නායු අඩුපාඩු වීම් වළකනවා. බඩ ඉරිඟුවල අඩංගු කෙඳි නිසා ආහාර ජිර්ණ ක්‍රියාවලියේ සිදුවන අපහසුතා වළක්වනවා. මලබද්ධය, අර්ශස්, මහා බඩවැල් ආශි‍්‍රත පිළිකා ඇතිවීමේ අවදානම අඩු කරනවා විතරක් නෙමේ සිරුරේ අනෙකුත් ස්ථානවල ඇතිවිය හැකි පිළිකා වලට එරෙහිව ක්‍රියාකරනවා. ඇල්සයිමර් රෝගය (කායික හා මානසික ක්‍රියාකාරීත්වයේ පිරිහීම නිසා ඇතිවන රෝගයක්) වළක්වා ගන්නවා. නිධන්ගත රෝග රැසකටම බඩ ඉරිඟු ගුණදෙනවා.

කැලරි වැඩියි

බඩ ඉරිඟු ග්‍රෑම් 100 ක කැලරි 342 ක් අඩංගු වෙනවා. එහෙම බැලුවාම ධාන්‍යවලින් වැඩිම කැලරි ප්‍රමාණයක් අඩංගු වන්නේ බඩ ඉරිඟුවලයි. ඒ නිසා හැදෙන වැඩෙන දරුවන්ට ශක්තිය අවශ්‍ය පුද්ගලයන්ට බඩ ඉරිඟු කියන්නේ ආහාර වේලට එකතුකර ගත යුතුම දෙයක්.

බඩ ඉරිඟු කෝප්පයකින් අපේ සිරුරට ඕනෙ කරන දෛනික කෙඳි අවශ්‍යතාවෙන් 18.4% ක් ලැබෙනවා. මේ කෙඳි නිසා තමයි ආහාර ජීර්ණ ක්‍රියාවලිය ආශි‍්‍රත ගැටලු අවම වෙන්නේ. එනම් මලබද්ධය, අර්ශස් වගේ රෝග වැළකෙන්නේ. ඒ වගේම මහා බඩවැලේ පිළිකා ඇතිවීම වැළැක්වීමට හේතු වෙන්නෙත් මේ කෙඳි තමයි.

විටමින් බී වල අඩංගු තයමින්, නියැසින් තමයි ස්නායු සුවතාවට හේතු වෙන්නේ. සම හැකිළී, ශරීරය දිරායන ඌනතාවක් වන පෙලග්‍රාව පරාජය කරන්න හේතු වෙන්නෙත් නියැසින්.

ෆෝලේට් වැඩි ප්‍රමාණයක්

දිනකට අපේ සිරුරට අවශ්‍ය වන ෆෝලේට් අවශ්‍යතාවෙන් වැඩි ප්‍රමාණයක් සපුරා දෙන්නට බඩ ඉරිඟුවලට හැකියි. ඒ හින්දා ගර්භණී මවුවරුන්ට විශේෂයෙන්ම ගුණ දෙන කෑමක් විදිහට බඩ ඉරිඟු හඳුන්වන්න පුළුවන් දරුවනේ. ඔය දරුවො ලැබෙන්න ඉන්න අම්මලා බඩ ඉරිඟු කනවා නම් අඩු බර දරු උපත් සිදුවෙන්නේත් නැහැ. ඒ විතරක් නෙමේ දරු උපත්වල දී ඇතිවන ස්නායු ගැටලු ඇතිවෙන්නෙත් නැහැ. ඒ හින්දා උපදින්න ඉන්න දරු පැටියටත් හොඳයි. මෙය පැන්ටොතෙනික් ඇසිඩ් ලබාදෙන හොඳම ප්‍රභවයක්. මේ නිසා පිෂ්ටය, ප්‍රෝටීන්, මේදය සිරුරට උරාගැනීම පහසු කරනවා.

පොස්පරස්, මැග්නීසියම්, මැන්ගනීස්, සින්ක්, යකඩ, කොපර් වැනි ඛනිජ ලවණ සිරුරට ලබා ගන්නත් බඩ ඉරිඟු හොඳ තෝරා ගැනීමක් වෙනවා. ඔය පිටරට විශ්වවිද්‍යාලයකින් කළ පරීක්ෂණයකට අනුව දරුවනේ බඩ ඉරිඟු කියන්නේ ප්‍රතිඔක්සිකාරක ගුණයෙන් ඉහළ කෑමක්. මෙහි තවත් ගුණ තියෙනවා. ඒ හින්දා පියයුරු පිළිකා, අක්මා පිළිකා වළක්වන්නටත් හැකියි.

හදවත් රෝග වළකයි

බඩ ඉරිඟු ආහාරයට ගැනීමෙන් ධමනිවල මේද තැන්පත් වීම වළක්වනවා. ඒ නිසා හෘද රෝගවලටත් වැට බඳින්න බඩ ඉරිඟුවලට හැකියාවක් තියෙනවා. සිරුරේ ලේ අඩුවීම වළකනවා. ඒකට හේතුව රතු රුධිරානු වර්ධනය කිරීමට බඩ ඉරිඟුවලට ඇති හැකියාවයි.

සිරුරට අහිතකර ඛ්ච්ඹ් කොලෙස්ටරෝල් ඇති වීම අඩු කරන්නත් පුළුවන්. විශේෂම දේ වෙන්නේ දියවැඩියාව පාලනය කිරීමට ඇති හැකියාවයි. ඒකට හේතුව වන්නේ බඩ ඉරිඟුවල අඩංගු තන්තු හෙවත් කෙඳි රුධිරයේ සීනි මට්ටම සමබරව පවත්වා ගෙන යාමයි. ඒ හින්දා ඔය දියවැඩියාව ඇති දරුවෝ බඩ ඉරිඟු නිතරම ආහාරයට ගත යුතු දෙයක්.

රූපලාවණ්‍ය නිෂ්පාදන

ඉහළ තත්ත්වයේ ශාකසාර රූපලාවණ්‍ය නිෂ්පාදන සැකසීමට බඩ ඉරිඟු භාවිත කරනවා. එහෙම බැලුවාම බඩ ඉරිඟුවලින් නොගත්ත ප්‍රයෝජනයන් නැහැ. ඇයි හරක්, අශ්වයෝ වගේ සතුන්ටත් කෑම හදනවානේ.

කෑමට කොහොමද?

ගිනි ගොඩක් ගහලා ළපටි බඩ ඉරිඟු කරල් පුලුස්සලා කන්න පුළුවන්. පුදුම කිරි රසක් තියෙන්නේ. පැසුණු බඩ ඉරිඟු තම්බලා කන්න පුළුවන්. ඔය පුංචි දරුවෝ ආශාවෙන් කන කෝන් ෆ්ලෙක්ස් හදන්නෙත් බඩ ඉරිඟුවලින්. පුලුස්සපු බඩ ඉරිඟුවලින් සලාද හදන්නත් පුළුවන්. දරුවනේ අපි බලමු ඒ කොහොමද කියලා. බඩ ඉරිඟු තරමක් පුලුස්සා ගන්න. නිවුණාට පසු ඇට ගලවා ගන්න. තක්කාලි, ලුනු, කොත්තමල්ලි කොළ කුඩා කැබලිවලට කපාගන්න. ඇට ගලවාගත් බඩ ඉරිඟු බඳුනකට දාන්න. එයට ඔලිව් තෙල් ස්වල්පයක්, ගම්මිරිස් කුඩු, රස අනුව ලුණු, දෙහි එකතු කරන්න. කපාගත් ලූනු, තක්කාලි හා කොත්තමල්ලි කොළ දමා කලවම්කර ආහාරයට ගන්න.

ගිනි ගොඩක් ගහන්න බැරි අයට ගෑස් ළිප දල්වා ඒ මත බඩ ඉරිඟු තබා පුලුස්සා ගන්න පුළුවන්. ඒ වගේම බඩ ඉරිඟු කරලට බටර් හෝ තෙල් ස්ප්‍රේ කරලා අවන් එකේ හෝ තැටියක තබා පුලුස්සා ගන්නත් පුළුවන්.

තරුණි සමඟ හැමදාමත් රැඳී සිටින ඔය දරුවන්ට බඩ ඉරිඟුවලින් සාදාගන්න රස පිරි කෑම අතිරේකයක් ඉදිරියේදී තිළිණ කරන්නම්කෝ.

මීට

චාලට් නැන්දා