කනවා, බොනවා කියා හැමදාමත් එකම දේ කන්නට ද බැරිය. එසේ වුවහොත් කෑම නීරස වී ආහාර රුචිය බිඳ වැටේ. මේ හේතුව නිසාම අපේ සෞඛ්‍ය සම්පන්න බව වියැකී යා හැකියි. එහෙත් එය එසේ නො වන්නට කටට රසට කෑමට රුචි වඩන ලෙස පෝෂණ ගුණාංග සපිරිව කෑමබීම සකසා ගන්නා දැනුමෙන් ඔබව පොහොසත් ළඳක් කරන්නට ‘තරුණී’ නිරතුරු සූදානම්. පිටු දාසයක් පුරාවට දිගහැරෙන ‘රස’ ඒ වෙනුවෙන් ඔබට පිදෙනා අනගි තිළිණයයි.

දූ දරුවන්ට මෙන්ම වැඩිහිටියන්ට කදිම, පෝෂණ ගුණය පිරුණු පහසුවෙන් සකසාගත හැකි උදෑසන ආහාර, රස පිරුණු සුප්, උදෑසනට, දහවලට මෙන්ම රාත්‍රියට ගැළපෙන රස පිරුණු වෙජිටේරියන් බත් වර්ග, නිදහසේ රස විඳින්නට රසැති පාන සහ අතුරුපස ආදී සූපවේදයේ ප්‍රවීණයන් කිහිපදෙනෙක් ඉදිරිපත් කරන රස ගුණ සපිරි කෑම, බීම වෙනුවෙන් මෙවර අතිරේකය වෙන් වේ. මෙහි දැක්වෙන බොහොමයක් කෑම දූ දරුවන්ට පාසල් දිවා ආහාරය ලෙසින් ගෙනයන්නට ද කදිමයි. එපමණක් නොව රැකියාවක නියුතු ඔබේ උදෑසන හා දිවා ආහාරය සඳහාත් මේවා ගැළපේ. එසේ නම් ‘රස’ ළඟ තබාගෙන මේ කෑම බීම සකසා පවුලේ අයත් සමඟ සිරි සේ රස විඳින්න.

 උදෑසනට පෝෂණීය ආහාර

 ශක්තිය වඩන කඩල පිටි රොටි

 ප්‍රෝටීන්, පිෂ්ටය, කෙඳි ආදී පෝෂක රැසක් අඩංගු කඩල උදෑසන ආහාරයට වඩාත් සුදුසුයි. ඒත් ඉතිං හැමදාමත් නිකම්ම කඩල තම්බලා කන්නත් බැහැනේ. ඒ හින්දා රස වෙනසකට වගේම පෝෂණීය වෙනසකටත් එක්ක කඩල රොටි සකසා ගත්තොත් නරකද? ඇඟට ශක්තිය දෙන කඩල රොටි මේ විදිහට හදමු.

 අවශ්‍ය ද්‍රව්‍ය

කඩල පිටි කෝප්ප 1 ක්

පාන් පිටි කෝප්ප 1 ක්

රතුලූනු ග්‍රෑම් 70 ක්

අමු මිරිස් කරල් 2 ක්

ළපටි ගෝවා කොළ 1 ක්

රතු බෙල්පෙපර් කොටසක්

කැමැති වර්ගයකින් තෙල්

මේස හැඳි 2 ක්

කෑලි මිරිස් තේ හැඳි 1/2 ක්

එස අනුව ලුණු

අවශ්‍ය පමණ වතුර

 සාදන ක්‍රමය

ලූනු, අමු මිරිස්, ගෝවා සහ බෙල්පෙපර් සෝදා සිහින්ව කපාගන්න. එය බඳුනකට දමා වතුර හා ලුණු හැර අනෙක් ද්‍රව්‍ය ද එයටම දමන්න. රස අනුව ලුණු එකතු කරන්න. වතුර ටික ටික එක්කරමින් මිශ්‍රණය කලවම් කරමින් අනාගන්න. අතේ නො ඇලෙන පදමට එනතෙක් අනා පසුව කොටස් වෙන්කර බෝල සාදා ගන්න. සාදාගත් බෝල තුනීකර තෙල් ගා ගත් තැටියක් මත තබා දෙපැත්ත පුලුස්සා ගන්න.

 පැණි සමඟ කන්න කෙසෙල් පෑන් කේක්

විටමින් සපිරි කෙසෙල් ලොකු කුඩා වුරුත් කැමැති පලතුරක්. නිකම්ම පලතුරක් විදිහට කන කෙසෙල් වෙනස් ආකාරවලටත් රස බලන්න පුළුවනි. දරුවන් ආශාකරන විදිහට කෙසෙල් පෑන් කේක් අපි මෙහෙම හදමු.

අවශ්‍ය ද්‍රව්‍ය

ලොකු කෙසෙල් ගෙඩි 1 ක්

(ගෙඩි පොඩි නම් 2 ක් ගන්න)

බිත්තර 1 ක්

පාන් පිටි කෝප්ප 1 ක්

රුලං කෝප්ප 1/2 ක්

බටර් ග්‍රෑම් 50 ක්

බේකිං පවුඩර් තේ හැඳි 1/2 ක්

සීනි මේස හැඳි 2 ක්

කිරි කෝප්ප 1/2 ක්

කුරුඳු කුඩු තේ හැඳි 1/4 ක්

සාදික්කා කුඩු තේ හැඳි 1/4 ක්

 සාදන ක්‍රමය

කෙසෙල් බඳුනකට දමා ගෑරුප්පුවකින් පොඩිකර ගන්න. බිත්තරය ගසාගන්න. පිටි, රුලං, කුරුඳු කුඩු, සාදික්කා කුඩු, බේකිං පවුඩර් එකට එකතු කරන්න. දැන් පොඩිකරගත් කෙසෙල්, සාදාගත් පිටි මිශ්‍රණය, ගසාගත් බිත්තරය, බටර් සහ කිරි එකතුකර කලවම් කරගන්න. ඔබ ගන්නා කෙසෙල් ප්‍රමාණය අනුව කිරි ප්‍රමාණය අඩු වැඩි කරගත හැකියි. පෑන් කේක් මිශ්‍රණයේ ඝනකම අනුව කිරි අවශ්‍ය යැයි හැඟේ නම් තව එකතු කරන්න. නොන්ස්ටික් පෑන් එකක් ළිප තබා ඒ මතට සාදාගත් මිශ්‍රණයෙන් ටිකක් හැන්දකින් වත්කරන්න. එය රවුම් ආකාරයට විහිදුවා ගන්න. දෙපැත්ත රන්වන් පාට වනතුරු පුලුස්සා පිටතට ගන්න.

එලෙස මිශ්‍රණය නිමාවන තෙක් පෑන් කේක් සකසා ගන්න. සෑදූ උණු උණු පෑන් කේක් පැණි සහ කෙසෙල් පෙති සමඟින් පිළිගන්වන්න.

  ක්‍රීම් චීස් මිශ්‍ර රුලං පෑන් කේක්

පොඩිත්තන්ට  කෑම කවා ගන්න එක අම්මලාට යුද්ධයක් වගේනේ.

ඒත් ආදරණීය අම්මා වූ ඔබට විවිධත්වයක් ඇතුව

පෝෂණයත් සහිතව කෑම හදන්න පුළුවන් නම් පුංචි දරුවෝ ආශාවෙන් කෑම කාවි. පෝෂණ ගුණය පිරුණු මේ රුලං පෑන් කේක් එකක් පුංචි දරුවෝ බොහොම ආශාවෙන් රස විඳීවි.

අවශ්‍ය ද්‍රව්‍ය

රුලං කොප්ප 1 1/2 ක්

ක්‍රීම් චීස් මේස හැඳි 2 ක්

සීනි මේස හැඳි 2 ක්

බිත්තර 1 ක්

කිරි කෝප්ප 1 ක්

බේකිං පවුඩර් තේ හැඳි 1/4 ක්

සාදන ක්‍රමය

රුලං, සීනි, බේකිං පවුඩර්, ක්‍රීම් චීස්, බිත්තරය කඩා එකට දමා හොඳින් කලවම් කරගන්න.

එයට කිරි ටික ටික එකතු කරමින් පෑන් කේක් බැටර් එක සාදාගන්න. නොන්ස්ටික් පෑන් එකක් ළිප තබා පෑන් කේක් මිශ්‍රණයෙන් ටික ටික වත්කර අඩු ගින්දරේ පෑන් කේක් සාදාගන්න.

මෙය ස්ට්‍රෝබෙරි සෝස්, චොකලට් සෝස් හෝ පලතුරු සමඟින් දරුවන් කැමැති විදිහට පිළිගන්වන්න.

ස්ට්‍රෝබෙරි සෝස් හදමු

ස්ට්‍රෝබෙරි ගෙඩි 5 ක් පමණ කුඩා කොටස්වලට කපාගන්න. එයට සීනි මේස හැඳි එකක් හා වතුර අඬු කෝප්ප කාලක් ද එකතුකර උණුකරගන්න. ඉන්පසු ළිපෙන් පිටතට ගෙන නිවෙන්ටන තබා හොඳින් බ්ලෙන්ඩ් කරගන්න.

මෙය පිළිගැන්වීමට ඔබට තිබෙන පලතුරු භාවිත කරන්න. එමෙන්ම පෑන් කේක් සෑදීමට ක්‍රීම් චීස් අවශ්‍යම නොවේ.

 කිරි රසයට කන්න බඩ ඉරිඟු තෝසෙ

 තම්බපු බඩ ඉරිඟුවල රස මතක් කරන කොටත් කටට කෙළ උනනවා නේද? සමට සහ ඇස්වලට හිතකර ප්‍රතිඔක්සිකාරක ගුණයෙන් පොහොසත් බඩ ඉරිඟු යොදා තෝසෙ වැනි රසවත් කෑමක් සාදාගන්නා ආකාරයයි මේ.

හැබැයි මේ සඳහා යොදා ගන්නේ බඩ ඉරිඟු පිටියි.

 අවශ්‍ය ද්‍රව්‍ය

බඩ ඉරිඟු පිටි කෝප්ප 1 ක් (කෝන් පිටි)

පාන් පිටි කෝප්ප 1 ක්

බිත්තර 1 ක්

ලොකු ලූනු ගෙඩි 1/2 ක්

අමු මිරිස් කරල් දෙකක්

බෙල්පෙපර් 1/2 ක්

ගම්මිරිස් කුඩු තේ හැඳි 1/2 ක්

 රස අනුව ලුණු

කිරි කෝප්ප 1 ක් (ෆ්‍රෙෂ් මිල්ක්)

 සාදන ක්‍රමය

ලූනු, අමු මිරිස් සහ බෙල්පෙපර් සිහින්ව කපාගන්න. එය බඳුනකට දමන්න. පිටි, කෝන් පිටි (බඩ ඉරිඟු පිටි), ලුණු, ගම්මිරිස් කුඩු සහ බිත්තර කඩා දමා කලවම් කරගන්න. එම මිශ්‍රණයට කිරි ටික ටික එකතුකර හොඳින් කලවම් කරගන්න. මෙහි පෙනුම තෝසෙ මිශ්‍රණයේ පෙනුමට සමානයි. ඝනකමත් නැහැ. තුනීත් නැහැ.

දැන් නොන්ස්ටික් පෑන් එකක් හෝ තැටියක් ළිප තබා රත්කර තෙල් ගා ඒ මතට තෝසෙ මිශ්‍රණයෙන් හැන්දක් වත්කරන්න. එය රවුමට විහිදුවන්න. ගින්දර වැඩිකර යන්තම් රන්වන් පැහැවනතුරු දෙපැත්ත මාරුකර පුලුස්සා ගන්න.

  පාන් සමඟ කන්න තම්බපු අල සලාදයක්

 විටමින් සපිරි අර්තාපල් කෑම වේලට හොඳම පෝෂක හිතවතෙක්. විවිධ රසට විවිධ ක්‍රමයට අර්තාපල්වලින් රසවත් කෑම හදන්නත් පුළුවන්. අල සලාදය ඒ කෑම අතරින් හරිම සුවිශේෂීයි. උදෑසනට පාන් කන අය වැඩියිනේ.

එහෙම පාන් තෝරාගන්නා අයට පෝෂණ ගුණය වැඩිකරගන්න අර්තාපල් සලාද සමඟ පාන් කන්න පුළුවන්. පොඩිත්තන්ට මේ සලාදය බොහොම රසවත් කෑමත් වේවි.

 අවශ්‍ය ද්‍රව්‍ය

ලොකු අර්තාපල් ගෙඩි 2 ක්

බිත්තර 3 ක්

පොඩි තක්කාලි ගෙඩි 1 ක්

සලාද කොළ දෙකක්

සාමාන්‍ය ප්‍රමාණයේ ලූනු ගෙඩි 1 ක්

ලූනු ගස් කිහිපයක්

මෙයෝනෙස් සෝස් මේස හැඳි 3 ක්

ගම්මිරිස් කුඩු තේ හැඳි 1/2 ක්

රස අනුව ලුණු

තියෙනවා නම් විතරක් ඔලිව් ගෙඩි කිහිපයක්

 සාදන ක්‍රමය

අර්තාපල් තම්බා පොතුහැර පොඩිකරගන්න. බිත්තර තම්බා පොතු හැරගන්න. සැරසීමට පෙති දෙක තුනක් කපා ගෙන වෙනම තබන්න. ඉතිරි බිත්තර පොඩි කොටස්වලට කපාගන්න.

ලූනු, ලූනු ගස්, සලාද කොළ. කළු ඔලිව් ගෙඩි පොඩි කොටස්වලට කපාගන්න. දැන් මෙම සියලුම ද්‍රව්‍ය බඳුනකට දමා ලුණු, මෙයෝනෙස් සෝස්, ගම්මිරිස් කුඩු දමා හොඳින් කලවම්කර බිත්තර පෙති තබා සරසා පිළිගන්වන්න.

  බේකන් එකතුකර සෑදූ ෆ්‍රෙන්ච් බ්‍රෙඩ් ටෝස්ට්

 හැමදාමත් එකම විදිහට පාන් කන ඔබට තවත් පෝෂණීය වෙනසකි මේ.

බටර්, බිත්තර, කිරි, බේකන් මෙන්ම බෙල් පෙපර්, ලූනු කොළ ආදී පෝෂණ ගුණයෙන් සපිරි ද්‍රව්‍ය එක්කර සාදාගන්නා මේ ෆ්‍රෙන්ච් බේකන් ටෝස්ට් උදෑසන ආහාර වේලට නැවුම් වෙනසක් ගෙන දේවි.

 අවශ්‍ය ද්‍රව්‍ය

බේකන් ග්‍රෑම් 150 ක් (කුඩා

කොටස්වලට කපාගත්)

ලොකු ලූනු ගෙඩි 1/2 ක්

ලූනු කොළ ස්වල්පයක්

බෙල් පෙපර් කොටසක්

ඔලිව් තෙල් මේස හැඳි 1 ක්

රස අනුව ලුණු

ගම්මිරිස් කුඩු තේ හැඳි 1/2 ක්

කෑලි මිරිස් තේ හැඳි 1/2 ක්

බිත්තර 2 ක්

කිරි කෝප්ප 1 ක්

කුඩා ෆ්‍රෙන්ච් බ්‍රෙඩ් 2 ක් (ඔබට ඇති පාන් වර්ගයක් ගන්න)

කුරුඳු කුඩු තේ හැඳි 1/4 ක්

බටර් තේ හැඳි 1 ක්

 සාදන ක්‍රමය

බඳුනක් ළිප තබා තෙල් දමන්න. තෙල් රත්වීගෙන එන විට බේකන් කැබලි එකතුකර ටික වේලාවක් බැදගන්න. එයට ලියාගත් ලූනු, ලූනු කොළ, බෙල් පෙපර්, ගම්මිරිස් කුඩු, ලුණු, කෑලි මිරිස් එකතුකර ස්වල්ප වේලාවක් හැඳිගාමින් බැදගන්න. ළිප නිවා එය පසෙකින් තබන්න.

දැන් කිරි, බිත්තර, කුරුඳු කුඩු, ලුණු එක්කර හොඳින් ගසාගන්න. එයට කපාගත් පාන් කොටස් එකතුකරන්න. පෑන් එකක් ළිප තබා බටර් එකතු කරන්න. බටර් දියවීගෙන එන විට පොඟවාගත් පාන් පෙති ඒ මත අතුරන්න. එක් පැත්තක් රන්වන් පාට වීගෙන එන විට අනිත් පැත්ත හරවන්න. එම පැත්තත් රන්වන් පාට වූ විට පිටතට ගන්න. පිටතට ගත් පාන් පෙති පිඟානක් මත අතුරන්න. ඒ මත සාදාගත් බේකන් මිශ්‍රණය අතුරා පිළිගන්වන්න.

මෙහි බේකන් වෙනුවට කටු රහිත චිකන් කුඩා කොටස්වලට කපා එකතුකරගත හැකියි.

 රස ඉතිරෙන සේවරි ටෝස්ට්

 ප්‍රෝටීන් සපිරි කිරි, බිත්තර පුංචි දරුවන්ගේ ආහාර අතර වරදින්නේම නැහැ. මේ දේවල් එකතුකර පාන් රසවත් කරන්නත් පුළුවනි. රස ඉතිරෙන සේවරි ටෝස්ට් එවැනි කෑමකි. බලන්න. ඔබටත් මේ විදිහට සේවරි ටෝසට් සාදාගන්න පුළුවන් ද කියලා.

 අවශ්‍ය ද්‍රව්‍ය

බිත්තර 2 ක්

කිරි කෝප්ප 1 ක්

පාන් පෙති 4 ක්

කුරුඳු කුඩු තේ හැඳි 1/4 ක්

ගම්මිරිස් කුඩු තේ හැඳි 1/4 ක්

ලුණු ස්වල්පයක්

බටර් තේ හැඳි 1 ක්

ලූනු ගස්වල කොළ කිහිපයක්

රතු බෙල්පෙපර් කොටසක්

චීස් පවුඩර් මේස හැඳි 2 ක්

 සාදන ක්‍රමය

ලූනු කොළ සහ බෙල්පෙපර් සිහින්ව කපාගන්න. කිරි, බිත්තර, කුරුඳු කුඩු, ගම්මිරිස් කුඩු හා ලුණු බඳුනකට දමා ගසාගන්න. පෑන් එකක් ළිප තබා බටර් එකතුකරන්න. බටර් දියවීගෙන එන විට සාදාගත් බිත්තර මිශ්‍රණයේ පාන් පෙති බහා පෑන් එක මත තබන්න. එම පාන්පෙත්තේ උඩ පැත්තට කපාගත් ලූනු කොළ, බෙල්පෙපර් දමා ඒ මත චිස් කුඩු අතුරන්න. පාන් පෙත්තේ යට පැත්ත රන්වන් පාට වීගෙන එන විට අනෙක් පැත්ත හරවන්න. චීස් දියවෙන නිසා අනෙක් පැත්ත හරවද්දී එළවළු වැටෙන්නේ නැහැ. ඒවා පාන් පෙති මත රැඳී පවතිනවා. මේ විදිහට හදන සේවරි ටෝස්ට්වලට දරුවන් කැමැති වෙනත් එළවළු එක්කර ගන්න පුළුවන්.

  පොඩිත්තෝ ආසම කරන ෆ්‍රෙන්ච් ටෝස්ට්

 පුංචි දරුවන් ටෝස්ට් වර්ග රස විඳින්න බොහොම කැමැතියි. රස පිරුණු පෝෂණ ගුණයත් සහිත ටෝස්ට් වර්ග අතර ෆ්‍රෙන්ච් ටෝස්ට් අංක එකට ඉන්නවා.

 එහෙමනම් පොඩිත්තන්ට රස කෑම හදන්න හිතන අම්මලාට මෙන්න මේ විදිහට රසම රස ෆ්‍රෙන්ච් ටෝස්ට් සාදාගන්න පුළුවන්.

 අවශ්‍ය ද්‍රව්‍ය

බිත්තර 2 ක්

කිරි කෝප්ප 1 ක්

පාන් පෙති 4 ක්

කුරුඳු කුඩු තේ හැඳි 1/4 ක්

රස අනුව ලුණු

බටර් තේ හැඳි 1 ක්

 සාදන ක්‍රමය

කිරි, බිත්තර, කුරුඳු කුඩු, ලුණු එකතුකර ගසාගන්න. පෑන් එකක් ළිප තබා බටර් එකතුකරන්න. බටර් රත්වීගෙන එන විට පාන් පෙති සාදාගත් බිත්තර මිශ්‍රණයේ බහා පෑන් එක මත තබන්න. එක් පැත්තක් රන්වන් පාට වී ගෙන එන විට අනෙක් පැත්ත හරවන්න. ඉන්පසු දරුවන් කැමැති විදිහට කුඩා කොටස්වලට කපා පිළිගන්වන්න.

මේ ටෝස්ට් කැබලි නිකම් කන්න පුළුවන්. ඒත් ඔබ කැමැති නම් පැණි, නුතෙල්ලා හෝ පලතුරු ක්‍රීම් චීස් සමඟ දරුවන්ට පිළිගන්වන්න.

පෝෂණය පිරුණු ස්ක්‍රම්බල් එග් සැලඩ්

සැලඩ් කියන්නේ පෝෂණ ගුණයෙන් අනූන කෑමක්. බිත්තරත් පෝෂණ ගබඩාවක්. එහෙම නම් එග් ස්ක්‍රම්බල් සැලඩ් කියන්නේ උදෑසනට ශක්තිජනක සැලඩ් එකක්.

බත්, පාන් ආදිය සමඟ රස විඳින්න මෙය කදිම එකතුවක් වේවි. තක්කාලි නිසා කෑම රුචියත් වඩවනවා. පුංචි දරුවන්ට වගේම වැඩිහිටියන්ටත් ගුණදායකයි.

අවශ්‍ය ද්‍රව්‍ය

බිත්තර 4 ක්

සලාද කොළ 4 ක්

තක්කාලි ගෙඩි 1 ක්

ලොකු ලූනු ගෙඩි 1/2 ක්

ඔලිව් තෙල් මේස හැඳි 1 ක්

ලෙමන් යුෂ තේ හැඳි 1/2 ක්

ගම්මිරිස් කුඩු තේ හැඳි 1/2 ක්

රස අනුව ලුණු

සාදන ක්‍රමය

බඳුනක් ළිප තබා ඔලිව් තෙල් දමා රත්කර ගන්න. එයට බිත්තරය කඩා දමන්න. බිත්තර තැම්බීගෙන එද්දී ගෑරුප්පුවකින් එහාට මෙහාට කරමින් කැබලිවලට කඩාගන්න. පසුව ළිපෙන් පිටතට ගන්න. සලාද කොළ, තක්කාලි, ලොකු ලූනු සිහින්ව ලියා බඳුනකට දමන්න. එයට ස්ක්‍රම්බල් කළ බිත්තර කැබලි, ලෙමන් යුෂ, ගම්මිරිස් කුඩු හා රස අනුව ලුණු එකතුකර හොඳින් කලවම්කර පිළිගන්වන්න.

සෙලෙනියම් පිරුණු හතු ඔම්ලට් හතු

බොහොම රසවත් කෑමක්. ඒ වගේම සෙලෙනියන් ඇතුළු ඛනිජ ලවණත් බොහොමයක් අඩංගුයි.

බොහෝ දෙනෙක් උෂ්ණ කෑමක් කියලා සැලකුවත් කටට රස දෙන සිරුරට ගුණ දෙන හතුවලට කැමැති පිරිස වැඩියි. ඒ අයට වෙනස්ම රසයකට හතු ඔම්ලට් මෙලෙස සාදා රස බලන්න පුළුවන්.

අවශ්‍ය ද්‍රව්‍ය

හතු ග්‍රෑම් 150 ක්

බිත්තර 3 ක්

ලූනු ගස් 1 ක් (ලූනු ගෙඩියත් සමඟ)

බෙල්පෙපර් කොටසක්

පාස්ලි හෝ කොත්තමල්ලි

කොළ කිහිපයක්

කිරි මේස හැඳි 2 ක්

චීස් පවුඩර් මේස හැඳි 2 ක්

ගම්මිරිස් කුඩු තේ හැඳි 1/2 ක්

ලුණු රස අනුව

ඔලිව් තෙල් මේස හැඳි 2 ක්

බටර් තේ හැඳි 1 ක්

කෑලි මිරිස් තේ හැඳි 1/2 ක්

සාදන ක්‍රමය

බිත්තර, කිරි, චීස් පවුඩර්, ලුණු, ගම්මිරිස් කුඩු එකට එකතුකර හොඳින් ගසාගන්න. හතු කුඩා කැබලිවලට කපාගන්න. ලූනු, ලූනු කොළ, බෙල් පෙපර් කුඩා කොටස්වලට කපාගන්න. දැන් පෑන් එකක් ළිප තබා ඔලිව් තෙල් එකතුකර හතු බැදගන්න. හතු බැදීගෙන එන විට ලූනු, ලූනු කොළ, බෙල්පෙපර්, කෑලි මිරිස් රස අනුව ලුණු එකතුකරගන්න.

ඔලිව් තෙලෙන් මේ සියල්ල තැම්බුණු පසු වෙනත් බඳුනකට අයින්කර ගන්න.

දැන් එම පෑන් එකටම බටර් ස්වල්පය එකතුකර රත්වීගෙන එද්දී කිරි, චීස්, බිත්තර මිශ්‍රණය එක්කරන්න. ටික වේලාවක් ගිය පසු සාදාගත් හතු මිශ්‍රණය ඒ මත අතුරන්න. දැන් පියනකින් වසා මඳ ගින්දරේ ඔම්ලට් එක සාදාගන්න.

ඉදිරිපත් කිරීම සහ ඡායාරූප

ඉතාලියේ පර්මාහි සූපවේදිනී

ජනනි ගුරුසිංහ

ප්‍රවීණ සූපවේදිනී සුනේත්‍රා ඒකනායක

 රසයෙන් වෙනස් පාන් වඩේ

 ඔබ ආහාරයට ගෙන ඉවතලන පාන්වලින් ප්‍රයෝජනයක් ගන්න

හොඳම ක්‍රමයක් තමයි මේ. ඉවතලන පාන්වලින් වඩේ හදන්න

පුළුවන් කියලා ඔබ දන්නවාද? එක පාරක් පාන් වඩේවල රස

බැලුවොත් නම් ඔබ හැමදාමත් හදාවි.

අවශ්‍ය ද්‍රව්‍ය

දවසක් පමණ පරණ පාන් පෙති 4 - 5 ක්

උම්බලකඩ කුඩු මේස හැඳි 2 - 3 ක් හෝ වියළි කූනිස්සෝ

අමු මිරිස් කරල් 2 - 3 ක්

රස අනුව ලුණු කුඩු

කෑලි මිරිස් මේස හැඳි 1 ක්

කහ කුඩු තේ හැඳි 1/2 ක්

ග්‍රේට් කරගත් කුඩා කැරට් ගෙඩියක්

සූදුරු මේස හැඳි 1 ක්

හාල් පිටි මේස හැඳි 4 ක්

තෙල් ස්වල්පයක්

වතුර ස්වල්පයක්

 සාදන ක්‍රමය

පාන් පෙති කුඩා කැබලිවලට කඩාගන්න. ඉන්පසු එයට හාල් පිටි එකතුකර රස අනුව ලුණු කුඩු එකතු කරන්න. එයටම උම්බලකඩ කුඩු හෝ වියළි කූනිස්සෝ යොදා බැදගන්න. දැන් එයට අමු මිරිස්, කෑලි මිරිස්, කහ කුඩු, කැරට්, සූදුරු මිශ්‍ර කරගන්න. ඉන්පසු භාජනයේ නොගෑවෙන තරමට එයට වතුර ටික ටික එකතු කරමින් හොඳින් අනාගන්න.

සාදාගත් මිශ්‍රණයෙන් දෙහි ගෙඩි ප්‍රමාණයේ කුඩා බෝල සකස් කරගන්න. ඉන්පසුව වඩේ එකක් හැඩයට අල්ල මත තබා තුනීකර ගන්න. දැන් රත්වූ ගැඹුරු තෙලේ රන්වන් පාට වන තුරු බැදගන්න.

 පෝෂණ ගුණ පිරි මෙක්සිකන් බත්

  ඔබ එදිනෙදා දිවා ආහාරය සඳහා ගන්නා එකම ආහාර වේලට වඩා වෙනස් ආකාරයේ ආහාර වේලක් ගතහොත් කන්න ආස හිතේවි. කිඩ්නි බීන්ස් යොදා ගෙන සකසන මෙක්සිකන් බත ඇත්තෙන්ම රසවත්ය. ඒ වගේම පෝෂණ ගුණයෙන් ද අනූනයි.

අවශ්‍ය ද්‍රව්‍ය

සම්බා සහල් ග්‍රෑම් 500 ක්

කිඩ්නි බීන්ස් ග්‍රෑම් 250 ක් (වෙළෙඳපොළේ ඇත)

කැවුම් කොච්චි කරල් 3 - 4 ක්

මස් තම්බාගත් වතුර තේ කෝප්ප 1 ක්

පොල් කිරි කෝප්පයක්

ලුණු (රස අනුව)

කුරුඳු කැබැල්ලක්

සුදුලූනු බික් 4 - 5 ක්

රම්පෙ කැබලි 2 - 3 ක්

බේ කොළ 2 - 3 ක්

ලොකු ලූනු ගෙඩියක්

තෙල් මේස හැඳි 3 - 4 ක්

 සාදන ක්‍රමය

කිඩ්නි බීන්ස් පැය 4 - 5 ක් පෙඟෙන්නට තබා තම්බා ගන්න. මේවා තැම්බූ ටින් ලෙස ද මිලට ගත හැකියි. බඳුනකට තෙල් ටිකක් දමා ළිප තබා රත්වුණු පසු ලියාගත් ලූනු, සුදුලූනු, රම්පෙ, බේ කොළ, කුරුඳු එක්කර බැදෙන්නට හරින්න. මෙම තෙම්පරාදුවට සෝදාගත් සහල්, තම්බාගත් කිඩ්නි බීන්ස්, ලුණු හා කොච්චි කරල් එකතු කරන්න. මෙයට මස් තැම්බූ වතුර දමන්න. දැන් බත තැම්බීමට ප්‍රමාණවත් තරමට පොල්කිරි එක්කර බත උයාගන්න. බත උයාගත් පසු ළිපෙන් බා දීසියකට බෙදා සරසා ගෙන කෑම මේසයට යවන්න.

 පහසුවෙන් සකසා ගත හැකි මයිසූර් බොන්ඩා

පහසුවෙන් සකසා ගත හැකි ආහාර වර්ග අතර මයිසූර් බොන්ඩා ප්‍රධානයි. හාල් පිටි, සූදුරු, යෝගට්, ඉගුරු, අමුමිරිස් දමා සකසන මයිසූර් බොන්ඩා ඔබත් සාදා රස බලන්න.

අවශ්‍ය ද්‍රව්‍ය

පිටි අඬු කෝප්ප 1 ක්

හාල් පිටි අඬු කෝප්ප 1/4 ක්

ආප්ප සෝඩා තේ හැඳි 1/2 ක්

සූදුරු ඇට තේ හැඳි 2 ක්

යෝගට් 1 ක්

වතුර කෝප්ප 1/2 - 3/4 ක්

ඉඟුරු තේ හැඳි 1 ක්

අමු මිරිස් කරල් 2 - 3 ක්

(සිහින්ව කපා)

කරපිංචා (සිහින්ව ලියා)

මේස හැඳි 1 - 2 ක්

තෙල් (බැදීමට)

 සාදන ක්‍රමය

තල් හා වතුර හැර ඉතිරි ද්‍රව්‍ය බඳුනකට දමා හොඳින් මිශ්‍ර කරන්න. දැන් මෙයට වතුර එකතු කරමින් බටර් කේක් මිශ්‍රණයේ පදමට අනාගන්න.

තාච්චියට තෙල් ටිකක් දමා ළිප තබා රත්වූ පසු අතේ වතුර ටිකක් තවරාගෙන සාදාගත් මිශ්‍රණයෙන් ටික බැගින් ගෙන රවුම් කරමින් රත්වූ තෙලේ රන්වන් පාටට බැදගන්න. උණු උණුවේ චට්නි සමඟ පිළිගන්වන්න.

  උදේට වගේම සවසටත් මැලේ ස්වීට් පේස්ට්‍රි

 කෙටි කෑම කිව්වාම පේස්ට්‍රි නම් අමතක කරන්නම බැහැ. හවසට වගේම උදේ ආහාරයටත් සුදුසු මැලේ ස්වීට් පේස්ට්‍රි සකසා ගන්න ඉතාම පහසුයි.

අවශ්‍ය ද්‍රව්‍ය

පැයක් පමණ ස්ටීම්කර

තම්බාගත් පාන් පිටි

ග්‍රෑම් 500 ක්

පොලකිරි කෝප්ප 1 1/2 ක්

බිත්තර 1 ක්

සුවඳ කුඩු තේ හැඳි 1/2 ක්

(එනසාල්, කුරුඳු, සාදික්කා,

කරාබුනැටි)

ලුණු (රස අනුව)

තෙල්

සීනි සිරප් සඳහා

සීනි ග්‍රෑම් 250 ක්

වතුර කෝප්ප 1/4 ක්

මහදුරු ඇට තේ හැඳි 2 ක්

සාදන ක්‍රමය

තම්බාගත් පාන් පිටි පෙනේරයකින් හළාගන්න. පොල්කිරි තරමක් උණුකර ගන්න. පිටවලට සුවඳ කුඩු, ලුණු කුඩු එකතුකර කිරි ටික ටික එකතු කරන්න. බීට් කරගත් බිත්තරය ද දමා මිශ්‍රණය බඳුනේ නොගෑවෙ පරිදි පොල්කිරෙන් අනාගන්න. (ඉඳිආප්ප සාදන මිශ්‍රණයේ පදමට)

පසුව පිටි මිශ්‍රණය තුනීකර තමන් කැමැති හැඩවලට කපාගන්න. නැතිනම් මුරුක්කු වංගෙඩියෙන් මිරිකා කැබලිවලට වෙන්කර ගන්න. දැන් මෙම කැබලි රත්වූ ගැඹුරු තෙලේ රන්වන් පාටට බැදගන්න. බැදගත් පසු නිවෙන්නට තබන්න.

සීනි සිරප් සෑදීමට අවශ්‍ය ද්‍රව්‍ය ළිප තබා උණුකරන්න. මෙය නූල් ඇදෙන පදමට උණුකර එයට බැදගත් පේස්ට්‍රි ටික එකතු කරන්න. ඉතා රසවත් රසකැවිල්ලකි.

 කටට සැරට තායි චිකන් රයිස්

ආහාර සකසන විට එහි රසය පමණක් නොව පෝෂණ ගුණය ගැනත් අවධානය යොමු කරන්න ඕනේ. කුකුළු මස්, මෑකරල්, සුදු ලුනු, රතුලුනු දමා සකසන තායි චිකන් රයිස් එවැනි පෝෂණ ගුණයෙන් අනුන ආහාර වේලකි.

අවශ්‍ය ද්‍රව්‍ය

බත් කෝප්ප 2 ක්

කුකුළු මස් (පපුව කොටස) ග්‍රෑම් 250 ක්

ඉදුණු මිරිස් කරල් 4 - 5 ක්

සුදුලුනු බික් 4 - 5 ක්

රතු ලුනු ගෙඩි 10 ක්

මෑකරල් 2 - 3 ක්

ඩයිස්ටර් සෝස් මේස හැඳි 3 ක්

මාළු සොස් මේස හැඳි 2 ක්

සෝයා සෝස් මේස හැඳි 1 ක්

ලුණු (රස අනුව)

තෙල් මේස හැඳි 2 - 3 ක්

අඟල් 2 ක සේර කැබැල්ලක්

සාදන ක්‍රමය

පළමුවෙන් ඉදුණු අමුමිරිස්, සුදුලුනු, රතුලූනු එකට අඹරාගන්න. මෙය තරමක් කැබලි සිටින ලෙස අඹරා ගත යුතුයි. මෑකරල් කුඩා කැබලි වලට කපාගන්න. කුකුළු මස් ටිකක් තීරු ආකාරයට කපාගන්න.

තාච්චියක් ළිප තබා තෙල් ටිකක් දමා රත් වූ පසු අඹරාගත් මිරිස් හා සේර, ලූනු, සුදු ලූනු එකතු කරන්න. ඉන්පසු කුකුළු මස් හා මෑකරල් එක්කර තෙලෙන් බැදෙන්න හරින්න. අනතුරුව සොස් වර්ග එක්කර හොඳින් මිශ්‍ර කරන්න. ඉන්පසු බත් ටික එක්කර හොඳින් කලවම් කරගෙන රස අනුව ලුණු එකතු කරන්න. මෙය තාච්චියේ අඩිය අල්ලන ප්‍රමාණයට මිශ්‍ර කරමින් සිටින්න. එවිට රසය තවත් වැඩිවේ. ඉන්පසු ළිපෙන් බා සංග්‍රහයට යොදාගන්න.

  කොත්තමල්ලි කොළ මිශ්‍ර උප්පුමා

 රුලංවලින් සකසන ආහාර වර්ග බොහොමයක ඔබ රස බලලා ඇති එහෙත් කොත්තමල්ලි කොළ, ඉඟුරු, අබ දමා සකසන රුලං උප්පුමාවල නම් ඔබ රස බලලා නැතුව ඇති. රුලං උප්පුමා සකසා එහි රස බලන්න. අද අවස්ථාව ලැබෙනවා.

අවශ්‍ය ද්‍රව්‍ය

රුලං කෝප්ප 1 ක්

ඉඟුරු තේ හැඳි 1 ක්

අමු මිරිස් කරල් 2 - 3 ක්

කොත්තමල්ලි කොළ මේස හැඳි 2 ක්

රස අනුව ලුණු කුඩු

තෙල්

පෙරුම්කායම් කුඩු තේ හැඳි 1/2 ක්

අබ ඇට තේ හැඳි 1/2 ක්

කරපිංචා

එළඟි තෙල් මේස හැඳි 2 ක්

සාදන ක්‍රමය

ලුණු මිශ්‍රකර. වතුර කෝප්ප 2 1/2ක් උණුකර ගන්න. එයට අමුමිරිස්, ඉඟුරු, පෙරුම්කායම් කුඩු මිශ්‍ර කර වසා තබන්න.

භාජනයක් ළිප තබා එයට තෙල් දමා රත් වූ පසු අබ ඇට, කරපිංචා දමන්න. ඉන්පසු රුලං ද එකතුකර කැට ඇති නොවෙන ලෙස හොඳින් කලවම් කරන්න. ඉන් පසු වසා තැබු මිශ්‍රණය ගෙන ටික දමා කලවම්කර ළිපෙන් බා ගන්න.

එළිඟි තෙල් රත්කර කොත්තමල්ලි කොළ බැඳ එම මිශ්‍රණය සාදාගත් රුලං උප්පුමාවලට කලවම් කර රසවත් කරියක් සමඟ ආහාරයට ගන්න. රාත්‍රී ආහාරය සඳහා වඩාත් සුදුසුයි.

රතු කැකුළු බත් සමඟ කන්න ලුණු දෙහි බැදුමක්

ලුණු දෙහි කිව්වත් ඇති කටට කෙළ උනන එක වළක්වන්න බැහැනේ. උම්බලකඩ, ලූනු, කරපිංචා දාලා තෙම්පරාදුවක් දාපු ලුණු දෙහිවල රස බලන්න නම් කවුරුද අකැමැති. ඒ විදිහට මේ ලුණු දෙහි බැදුම හදලම බලන්නකෝ.

අවශ්‍ය ද්‍රව්‍ය

ලුණු දෙහි ග්‍රෑම් 250 ක්

මාළුමිරිස් ග්‍රෑම් 250 ක්

රතුලූනු ග්‍රෑම් 100 ක්

උම්බලකඩ කුඩු මේස හැඳි 2 - 3 ක්

රම්පේ, කරපිංචා

ඉඟුරු සුදුලූනු මේස හැඳි 1 ක්

උළුහාල් තේ හැඳි 1/2 ක්

රස අනුව ලුණු කුඩු

රස අනුව ගම්මිරිස් කුඩු

කෑලි මිරිස් අවශ්‍ය ප්‍රමාණයට

කහ කුඩු තේ හැඳි 1/2 ක්

තෙල්

කුරුඳු කෑල්ලක්

සාදන ක්‍රමය

ලුණුදෙහි කුඩාවට කපාගන්න. මාළු මිරිස් ද හැඩයට කපාගන්න. රතුලූනු ගෙඩි 2 කට කපාගන්න.

භාජනයකට තෙල් රත්වෙන්න තබා එයට රම්පේ, කරපිංචා, ඉඟුරු, සුදුලූනු, උළුහාල්, කුරුඳු එකතු කරන්න. මෙය බැදීගෙන එනවිට රතුලූනු, මාළු මිරිස්, උම්බලකඩ කුඩු, කෑලි මිරිස්, කහ කුඩු, රස අනුව ලුණු, ගම්මිරිස් එකතු කරන්න. පසුව ලුණුදෙහි මිශ්‍රකර විනාඩි 2 - 3 ක් පිසගන්න. රතු කැකුළු බත් සමඟ ආහාරයට ගැනීමෙන් වඩාත් රසවත් වේවි.

රස වගේම ගුණ යෝගට් ඩ්‍රිපින් සෝස්

 සෝස් වර්ග අතරින් විශේෂිත සෝස් වර්ගයක් තමයි යෝගට් ඩ්‍රිපින් සෝස්. මෙහි විශේෂත්වය වන්නේ මෙය සැකසීම සඳහා යෝගට් යොදා ගැනීමයි. එම නිසා ලැබෙන පෝෂණයත් ඉහළයි.

අවශ්‍ය ද්‍රව්‍ය

යෝගට් ග්‍රෑම් 250 ක්

සීනි මේස හැඳි 1 ක්

පාස්ලී ග්‍රෑම් 50 ක් හෝ මින්චි ග්‍රෑම් 50 ක්

රස අනුව ගම්මිරිස් කුඩු

ලුණු කුඩු ස්වල්පයක්

සුදුලූනු බික් 3 ක්

සාදන ක්‍රමය

ඉතාම සිහින්ව සුදුලූනු කපා ගන්න. පාස්ලි ද කුඩාවට කපාගන්න. ඉන්පසුව භාජනයකට යෝගට් දමා ගෑරුප්පුවකින් බීට් කරගන්න. එයට රස අනුව ගම්මිරිස්, ලුණුකුඩු, සීනි එකතුකර බීට් කරගන්න. එයටම සුදුලූනු සහ පාස්ලි මිශ්‍රකර නැවත බීට් කරගන්න. පසුව වීදුරු බෝතලයකට දමා ශීතකරණයේ තබා ප්‍රයෝජනයට ගන්න.

ඉතා රසවත් මෙම යෝගට් ඩ්‍රිපින් සෝස් බැදගත් මාළු, කුකුළුමස්, තම්බාගත් එළවළු සමඟ ආහාරයට ගත හැකියි.

කෙසෙල් මුහ මල් බැදුම

 ඔබ කෙසෙල් මුහ යොදා ගෙන සකසන ආහාර වර්ග නම් කොතෙකුත් ආහාරයට ගෙන ඇති. එහි මල් යොදා ගෙන ද ආහාර වර්ග සකසන්නට හැකියි. කෙසෙලමුහ මල් බැදුම ඉතා රසවත්ය.

අවශ්‍ය ද්‍රව්‍ය

කෙසෙල්මුහේ ඇති මල් ග්‍රෑම් 250 ක්

කඩල පිටි අඬු කෝප්ප 1/2 ක්

හාල් පිටි අඬු කෝප්ප 1/2 ක්

කෝන් පිටි අඬු කෝප්ප 1/4 ක්

ලුණු (රස අනුව)

කහ කුඩු තේ හැඳි 1/2 ක්

මිරිස් කුඩු තො හැඳි 1/2 ක්

ගම්මිරිස් කුඩු තේ හැඳි 1 ක්

සීනි මේස හැඳි 1 ක්

වියලි මිරිස් කරල් 10 ක්

කරපිංචා කොළ මිටක්

තෙල්

ලොකු ලූනු ගෙඩි 2 ක්

 සාදන ක්‍රමය

කෙසෙල්මුහවල ඇතුළත ඇති මල් ගෙන එහි ඇති දිග රේණුව ඉවත් කරන්න. එය තිත්ත රසයෙන් යුක්තයි. ඉතිරි කොටස සෝදා වතුර බේරාගන්න.

පිටි වර්ග තුන එකට මිශ්‍රකර එයට ලුණු, ගම්මිරිස්, කහ, මිරිස් කුඩු, සීනි දමා වතුර එකතු කරමින් උකු බැටරයක් සාදාගන්න.

තාච්චියකට තෙල් ටිකක් දමා ළිප තබා රත්වූ පසු කරපිංචා කොළ ටික දමා බැදගන්න. ඉන්පසු ලියාගත් ලූනු ටික දමා රන්වන් පාටට බැදගන්න. වියළි මිරිස් කරල් ටිකක් කැබලිවලට කඩාගෙන බැදගන්න. අනතුරුව කෙසෙල්මුහ මල් ටික බැටරයකට දමා ටික බැගින් රත්වූ ගැඹුරු තෙලේ බැදගන්න. මේවා වෙන් වෙන්ව සිටින පරිදි රන්වන් පාටට බැදගත යුතුයි. පසුව බැදගත් සියල්ල එකට මිශ්‍රකර අවශ්‍ය නම් ලුණු කුඩු ටිකක් කලවම්කරගන්න.

  යෝගට් මිශ්‍ර අළු කෙසෙල් බැදුම

හැමදාම හදන අළු කෙසෙල් ව්‍යාංජනයට වඩා අළු කෙසෙල් බැදලා ගත්තොත් තවත් රසවත් වේවි. විශේෂයෙන්ම මේකට මුදවපු කිරි හරි එහෙමත් නැතිනම් යෝගට් ටිකක් එකතු කරලා හැදුවොත් ලැබෙන පෝෂණයත් ඉහළයි.

අවශ්‍ය ද්‍රව්‍ය

අළු කෙසෙල් ග්‍රෑම් 250 ක්

වියලි මිරිස් කරල් 3 - 4 ක්

කඩල පරිප්පු මේස හැඳි 3 ක්

කරපිංචා

ලොකු ලූනු ගෙඩි 2 ක්

සුදුලූනු බික් 4 - 5 ක්

තක්කාලි ගෙඩි 2 ක්

කහ කුඩු තේ හැඳි 1/2 ක්

රස අනුව ලුණු කුඩු, ගම්මිරිස්

මුදවපු කිරි හෝ යෝගට් මේස

හැඳි 1 ක්

තෙල් මේස හැඳි 2 - 3 ක්

අබ ඇට තේ හැඳි 1 ක්

සූදුරු ඇට තේ හැඳි 1 ක්

සාදන ක්‍රමය

පළමුව අළු කෙසෙල්වල පොත්ත ඉවත්කර පෙති කපාගන්න. කහ කුඩු ටිකක් කලවම් කරන්න.

ඉන්පසු භාජනයකට තෙල් දමා රත්වන විට අබ සහ සුදුරු එකතුකර ගන්න. එයට කඩල පරිප්පු, වියලි මිරිස් කෑලි දමා බැදගන්න. පසුව අළු කෙසෙල් එකතුකර රස අනුව ලුණු කුඩු, ගම්මිරිස් කුඩු එකතුකර විනාඩි 4 - 5 ක් පමණ බැදෙන්න හරින්න. දැන් එයට ලොකු ලූනු, සුදුලූනු එකතුකර විනාඩි 2 - 3 ක් යනවිට තක්කාලි සහ මුදවපු කිරි හෝ යෝගට් එකතුකර මිශ්‍රකර ගන්න.

ඉතා රසවත් ආකාරයට සාදාගත හැකි අළු කෙසෙල් බැදුම ඕනෑම අමු කෙසෙල් ගෙඩි වර්ගයකින් වුවද සකසාගත හැකියි.

 හදන්නට පහසු පුරවාගත් බණ්ඩක්කා බැදුම

හැමදාම හදන ව්‍යාංජන අතරට විශේෂ ආහාරයකුත් හැදුවොත් බත් පත වඩාත් රසවත් වේවි. පුරවාගත් බණ්ඩක්කා බැදුමට නම් පොඩිත්තෝ ගොඩක් ආසවේවි. හදන්නත් පහසුයි.

අවශ්‍ය ද්‍රව්‍ය

බණ්ඩක්කා ග්‍රෑම් 250 ක්

කහ කුඩු තේ හැඳි 1/2 ක්

මිරිස් කුඩු තේ හැඳි 1 ක්

සිහින්ව ලියාගත් ලොකු ලූනු ගෙඩියක්

සුදුරු ඇට තේ හැඳි 1 ක්

ඉඟුරු, සුදුලූනු මේස හැඳි 1 ක්

කඩල පිටි ග්‍රෑම් 100 ක්

අමුමිරිස් කරල්

2 ක්

ලුණු (රස අනුව)

තෙල්

සාදන ක්‍රමය

බණ්ඩක්කා කරල් සෝදා එහි මැද කොටස අඟල් 4 ක් පමණ දිගට කපාගන්න. වෙන් නොවන ලෙස කරලේ එක කෙළවරකින් මැද තෙක් පලන්න.

කඩල පිටිවලට කහ කුඩු, මිරිස් කුඩු, ලුණු, ඉඟුරු, සුදුලූනු, අමු මිරිස්, සූදුරු, ලූනු එක්කර එයටම තෙල් මේස හැඳි 2 ක් දමා හොදින් අනාගන්න. මෙම මිශ්‍රණය පලාගත් බණ්ඩක්කා කරල් තුළට පුරවන්න. ඉන්පසු බඳුනකට තෙල් ස්වල්පයක් දමා රත්වූ පසු බණ්ඩක්කා කරල් එහි දමා අඩු ගින්දර බැදෙන පරිදි උයාගන්න. මේවා උණු උණුවේ බත් සමඟ කෑමට ගත හැකියි.

  පරිප්පු සහ තක්කාලි මිශ්‍ර රසම්

  රසම් ඉතා පෝෂ්‍යදායි ආහාරයකි. රෝගී වූ අයෙක් රසම් ආහාරයට ගැනීමෙන් ගත සිත ප්‍රාණවත් වී සුවදායක බවක් ගෙනදෙයි. පරිප්පු සහ තක්කාලි මිශ්‍ර රසම් ඖෂධීය ගුණයෙන් යුතු අතර ඉතාම ප්‍රණීතයි. මෙය කෑම රුචිය වඩන්නට ද අපූරු පානයකි.

අවශ්‍ය ද්‍රව්‍ය

මයිසූර් පරිප්පු

කෝප්ප 1/2 ක්

සුදුලූනු බික් 4 - 5 ක්

තක්කාලි ග්‍රෑම් 150 ක්

සියඹලා යුෂ මේස හැඳි 1 ක්

කොත්තමල්ලි කුඩු

තේ හැඳි 1 1/2 ක්

ලුණු (රස අනුව)

කරපිංචා

පෙරුම්කායම් කුඩු

තේ හැඳි 1/2 ක්

කොත්තමල්ලි කොළ

මේස හැඳි 1 ක්

අබ ඇට තේ හැඳි 1/2 ක්

සූදුරු ඇට තේ හැඳි 1 ක්

තෙලන් මේස හැඳි 1 ක්

කහ කුඩු ස්වල්පයක්

ගම්මිරිස් ඇට කිහිපයක්

ලූනු ගෙඩියක්

සාදන ක්‍රමය

මුලින්ම පරිප්පු සෝදා එයට කහ සහ වතුර කෝප්ප 1 1/2 ක් දමා තම්බා ගන්න. වෙනත් බඳුනකට වතුර කෝප්ප 1 1/2 ක් දමා එයට සියඹලා, තක්කාලි, සූදුරු කුඩු, කොත්තමල්ලි කුඩු, ගම්මිරිස් ඇට, ලුණු, පෙරුම්කායම්, කරපිංචා දමා උණුකරන්න. මෙයටම සුදුලුනු හා තම්බාගත් පරිප්පු එකතු කරන්න. ඉන්පසු ළිපෙන් බාන්න.

වෙනත් බඳුනකට තෙල් ටිකක් දමා ළිප තබා රත්වූ පසු අබ ඇට, සුදුරු ඇට, ලූනු, කොත්තමල්ලි කොළ, කරපිංචා එක්කර තෙම්පරාදු කරගෙන සාදාගත් රසම් එක තෙමරාදු කරගන්න. මෙය ඉතාමත් රසවත්ය.

 රාත්‍රියට ස්පයිසි පෑන් කේක්

පවුලේ හැමෝම එකතු වෙන්නේ රාත්‍රී කෑම මේසයේදී රාත්‍රියට හැමදාම කන එකම කෑමට වඩා වෙනසක් කළොත් කෑම මේසය වඩාත් සුන්දර වේවි. ඒ විතරක් නෙවෙයි රසවත් කෑම වේලක රස බලන්නටත් හැකිවේවි.රාත්‍රී ආහාරයට සුදුසුම ආහාරයක් තමයි ස්පයිසි පෑන් කේක්. එසවත් කරියක් සමඟ ආහාරට ගැනීමෙන් රසය තවත් වැඩි වේවි.

අවශ්‍ය ද්‍රව්‍ය

ආටා පිටි හෝ

පාන් පිටි ග්‍රෑම් 200 ක්

රුලං ග්‍රෑම් 50 ක්

කහ කුඩු තේ හැඳි 1/2 ක්

රස අනුව ලුණු කුඩු

අමු මිරිස් කරල් 2 - 3 ක්

තක්කාලි ගෙඩි 1 - 2 ක්

ිහින්ව ලියාගත් කරපිංචා

ම්ස හැඳි 1 - 2 ක්

ලොකු ලූනු ගෙඩියක්

වතුර කෝප්ප 1 1/2 ක්

පමණ

තෙල් අවශ්‍ය ප්‍රමාණයට

සාදන ක්‍රමය

පිටිවලට රුලං, කහ කුඩු, සිහින්ව ලියාගත් අමු මිරිස්, තක්කාලි, ලූනු සහ ලුණු කුඩු එකතු කරගන්න. එයට තෙල් මේස හැඳි 2 ක් එකතුකර වතුර ද ටික ටික එකතු කරමින් මිශ්‍රණය අනාගන්න.

පසුව පෑන් එකක් ළිප තබා තරමක් රත් වූ පසු මිශ්‍රණය දමා තුනීකර පුලුස්සා ගන්න. රසවත් කරියක් සමඟ රාත්‍රී ආහාරයට ගැනීම වඩාත් සුදුසුයි

කවුරුත් කැමැති මිශ්‍ර පලතුරු පුඩිං

රසවත් අතුරුපසක රස බලන්නට කවුරුත් කැමැතියි. ඒ අතුරුපසට පලතුරුත් එකතු වුණොත් රසය විතරක් නෙවෙයි ලැබෙන පෝෂණ ගුණයත් ඉහළයි. පලතුරු මිශ්‍ර පුඩිමක රස බලන්න නම් වැඩිහිටියෝ විතරක් නෙවෙයි පොඩිත්තනුත් ආසා වේවි.

අවශ්‍ය ද්‍රව්‍ය

මාගරින් ග්‍රෑම් 100 ක්

පාන් පිටි ග්‍රෑම් 225 ක්

සීනි ග්‍රෑම් 100 ක්

කරන්ට්ස් ග්‍රෑම් 50 ක්

ප්ලම්ස් ග්‍රෑම් 50 ක්

කැන්ඩිඩ් පිල් ග්‍රෑම් 50 ක්

බිත්තර 2 ක්

එළකිරි මිලිලීටර් 100 ක්

රස අනුව ලුණු කුඩු

සුවඳ කුඩු තේ හැඳි 1/2 ක්

වැනිලා තේ හැඳි 1 ක්

බේකිං පවුඩර් තේ හැඳි 2 ක්

සාදන ක්‍රමය

ගැඹුරු බෝල් එකකට බටර් තවරාගන්න. කැන්ඩිඩ් පිල් කුඩාවට කපාගන්න. මාගරින්, සීනි බිත්තර බීට් කරගන්න. පසුව එයට එළකිරි ද මිශ්‍රකර ගන්න. සුවඳ කුඩු, වැනිලා, ලුණු කුඩු මිශ්‍රකරන්න.

පසුව පලතුරු වර්ග එකතුකර ගන්න. පිටිවලට බේකිං පවුඩර් මිශ්‍රකර පළතුරු මිශ්‍රණයට එකතුකර ගන්න. සූදානම් කරගත් බෝල් එකට මිශ්‍රණය දමා සෙල්සියස් අංශක 180 ට රත්කරගත් උදුනක තබා පැය 1 ක් බේක්කර ගන්න.

එසේ නොමැතිනම් පැය 1 1/2 ක් ස්ටීම් කරගන්න. උණුවෙන් කස්ටඩ් ක්‍රීම් සමඟ ආහාරයට ගන්න..

 විදුමිණි නිමේෂා දිසාකරුණා

 ඡායාරූප

හිරන්ත ගුණතිලක