මැලේ "පුට්‌ටූ" අපිට පිට්‌ටු වූ හැටි

උදේ ආහාරය හෙවත් පාතරාසය ලෙස අප පාවිච්චියට ගන්නා ප්‍රධාන ආහාර වර්ග අතරින් ආප්පවල මැලේ අනන්‍යතාව පිළිබඳව පසුගිය සතියේ දී දැනුවත් වූ ඔබ වෙත මෙවර ඉදිරිපත් කරන්නේ උදේ ආහාර ලෙස බොහෝ නිවෙස්‌වල සුලබව භාවිත කරන ඉඳිආප්ප, පිට්‌ටු සහ රොටී වැනි කෑම වර්ග පිළිබඳවය. ඒ අනුව ඉදිආප්ප, පිට්‌ටු හා රොටී වර්ගවල මැලේ අනන්‍යතාව විමසා බලමු.

ඉන්දියානු මූලයකින් බිහිවූ ආහාර වර්ගයක්‌ ලෙස ප්‍රචලිත වුවද ඉදිආප්ප මැලේවරු විසින් බොහෝ කලෙක පටන් භාවිත කරන ඔවුනට විශේෂිත වූ කෑම වර්ගයකි. ඔවුන් එය හඳුන්වන්නේ "ලක්‌සා" (Laksa) යන නමිනි. ඉන්දුනීසියානු මැලේ දූපත් සමූහයේ මෙන්ම සිංගප්පූරුවේ වෙසෙන මැලේවරු අතරද මෙම ලක්‌සා ඉතා ජනප්‍රිය කෑම වර්ගයකි. ශ්‍රී ලාංකික මැලේවරුද උදේ ආහාරයක්‌ ලෙස ලක්‌සා සුලබව පාවිච්චි කරන බැව් පෙනේ. ඉදිආප්ප යනුවෙන් සිංහලයන් විසින් හඳුන්වනු ලබන මෙම කෑම වර්ගය දමිළ ජනාව හඳුන්වන්නේ ඉදිඅප්පම් (Iddi Appam) නමිනි. සිංහල, දමිළ, මැලේ සේම යෝනක සහ බර්ගර් ජනතාවද එකසේම ඉඳියාප්ප තම ප්‍රියතම ආහාරයක්‌ ලෙස පාවිච්චියට ගන්නා බැවින් එය සමස්‌ත ශ්‍රී ලංකාවටම පොදු ජනප්‍රිය උදේ ආහාරයක්‌ ලෙස සැලකීම නිවැරැදිය.

ඉදිආප්ප සකසා ගැනීම සඳහා පාවිච්චි කරනුයේ බැද ගන්නා ලද සුදු හෝ රතු සහල් පිටි වේ. විවිධ ආහාර නිෂ්පාදන ආයතන මගින් නිපදවනු ලබන සුදු හා රතු ඉදිආප්ප පිටි වර්ග පොදු වෙළෙඳ පොළෙන් මිලදී ගත හැකිය.

මැලේවරු ඉදිආප්ප හෙවත් ලක්‌සා පිළියෙල කර ගන්නේද සෙසු ජාතීන් ඒවා පිළියෙල කර ගන්නා අයුරින්ම ය. ඒ මෙසේය.

පිරිසිදු වියළි බඳුනකට බැද ගන්නා ලද සහල් පිටි කෝප්ප දෙකක්‌ දමන්න. මෙම පිටි කැටි ගැසීමෙන් තොර, මෘදු පිටිවීම අත්‍යවශ්‍ය ය. එයට ලුණු තේ හැඳි 01 ක ප්‍රමාණයක්‌ද මුසුකොට නටන වතුර කෝප්ප 4 ක්‌ද, ඊට එක්‌කර ගන්න. එසේ ජලය එකතු කළ යුත්තේ එක්‌වරම නොව පිටි මිශ්‍රණය හොඳින් අනා ගැනීමට පහසු වන සේ වරින් වර ඊට සරිලන ජල ප්‍රමාණයක්‌ එක්‌ කරමිනි. බඳුන තුළ ඝනීභවනය නොවන සේ නියම පදමට එන තෙක්‌ පිටි මිශ්‍රණය සකසා ගැනීමට යුහුසුළු විය යුතු වේ. එසේ කළ යුතු වන්නේ අවසානයේ නිර්මාණය වන ඉදිආප්ප නිවැරැදි රටාවකින් මෘදු සැහැල්ලු නිමාවකින් එහි රැල් නොකැඩෙන මට්‌ටමේ වියළි ස්‌වභාවයකින් සමන්විත විය යුතු බැවිනි.

එසේ පදමට අනා ගන්නා ලද පිටි ගුලි ඉදිආප්ප වංගෙඩියට දමා එහි පියනෙන් තෙරපුමක්‌ කරමින් කවාකාර ඉදිආප්ප වට්‌ටි මත කවාකාර හැඩයටම සියුම් රටාවන් මවමින් පිටි රැලි වත්කොට ඉදිආප්ප සකසා ගන්න. එසේ පිටි රැළි මිශ්‍රණවලින් යුත් වට්‌ටි කීපයක්‌ එක පිට එක තබා හුමාලයෙන් තම්බා ගන්න. පොල් සම්බෝලයක්‌ හෝ පොල් මැල්ලුමක්‌, ඉදිආප්ප ආහාරයට ගැනීමේදී ඒ සඳහා අනිවාර්ය ව්‍යංජනයක්‌ සේ සැලකේ. ඊට අමතරව පරිප්පු, අර්තාපල්, මස්‌ හෝ මාළු වෑංජනයක්‌ද යොදා ගැනීමෙන් ඉදිආප්ප ආහාර වේල තවදුරටත් රසවත් කරගත හැකි වේ.

අප බොහෝ විට උදේ ආහාරයක්‌ හෙවත් පාතරාසය ලෙස පාවිච්චියට ගන්නා තවත් ජනප්‍රිය කෑම වර්ගයක්‌ වන්නේ පිට්‌ටුය. පිට්‌ටු සේම උදේ ආහාර ලෙස ගන්නා කෑම වර්ග රාත්‍රි ආහාර ලෙස භාවිත කිරීමේ ප්‍රවණතාවක්‌ද දක්‌නට ලැබේ. ආප්ප, ඉදිආප්ප සේම පිට්‌ටුද මැලේවරුන්හට ආවේණික ඔවුන් ඉමහත් රුචියක්‌ දක්‌වන ආහාර විශේෂයකි.

පිට්‌ටු නමින් සිංහලයන් විසින් හඳුන්වනු ලබන මෙම ආහාර විශේෂය දමිළ ජාතිකයන් හඳුන් වන්නේ "පුට්‌ටු" නමිනි. එය මැලේවරුන්ගේ උච්ඡාරණයේ දී "පුට්‌ටූ" යනුවෙන් දීර්ඝ වෙයි. මැලේවරු "පුට්‌ටූ" යනුවෙන් කළ හැඳින්වීම දමිළ ජාතිකයෝ ඊට බොහෝ දුරට සමාන ස්‌වරූපයකින් පුට්‌ටු යනුවෙන් ව්‍යවහාර කළ බවක්‌ද, සිංහලයන් සුඛෝච්ඡාරණය හේතුවෙන් එය කිසියම් සුළු වෙනසක්‌ සිදුකළ බවක්‌ද පෙනේ.

ඉන්දුනීසියාවේ වීදි දිගේ අරුමෝසම් කරත්තවල ප්‍රදර්ශනය කරමින් අලෙවි කරන මෙම ජනප්‍රිය ආහාර වර්ගය එහිදී ඔවුන් ශබ්ද නඟා හඳුන්වන්නේ "ෂුට්‌ටූ" යන නමිනි. වතුර පිරවීමට හැකි මුට්‌ටියක හැඩය ගත් කොටසකින්ද ඊට උඩින් පිහිටි බම්බුවක හැඩය ගත් කුහර සහිත තවත් කොටසකින්ද සමන්විතව නිමවුණු පිට්‌ටු බම්බුව මෙකී ආහාරය සාදා ගැනීමට උපයෝගී කරගන්නා සුවිශේෂී උපකරණය වේ.

පිට්‌ටු සාදා ගැනීමට අවශ්‍ය කරන ද්‍රව්‍ය මෙසේය. මේ මගින් දෙදෙනකුට හෝ තිදෙනකුට පාවිච්චි කිරීමට සෑහෙන පිට්‌ටු 3 ක්‌ සාදාගත හැකිය.

1. හාල්පිටි කෝප්ප 01 (මෘදු ලෙස පාහින ලද සහල් පිටි මේ සඳහා සුදුසු නොවේ)

2. ගාන ලද නැවුම් පොල් කෝප්ප 01

3. ලුණු තේ හැඳි 1/2

4. ඊට සරිලන වතුර ප්‍රමාණයක්‌

සාදාගන්නා ක්‍රමය

ප්‍රථමයෙන්ම හාල්පිටි යන්තමින් බැදගන්න. ඉන්පසු හාල්පිටි සහ ගාන ලද පොල් සුදුසු බඳුනකට දමා මිශ්‍ර කරගන්න. ඉන්පසු ලුණු ප්‍රමාණයද ඊට මුසු කරන්න. අනතුරුව ජලය වරින් වර, මඳින් මඳ එක්‌ කරමින් එම මිශ්‍රණය ඇඟිලි තුඩින් හොඳින් අනාගන්න. කුඩා කැබලි බවට එම මිශ්‍රණය පත්වන තෙක්‌ එය එක දිගටම මිශ්‍ර කරගත යුතුය.

කුඩා කැබැලිවලින් යුත් එම මිශ්‍රණය තවදුරටත් නොකැඩී පවත්නා අදියරට පැමිණෙන තෙක්‌ පමණක්‌ ටිකෙන් ටික ජලය එකතු කරගත යුතුය.

ඉන්පසු පිට්‌ටු බම්බුවේ ජල බඳුනට ජලය දමා එය ළිපේ තබා වතුර නටන විට බම්බුවේ පියන හැර එයට සකසා ගත් මිශ්‍රණයෙන් අවශ්‍ය ප්‍රමාණය පුරවා පියන වසා ජල බඳුනට උඩින් සවිකොට තබා බම්බුවේ රැඳුණු පිට්‌ටු හුමාලයෙන් තැම්බීමට ඉඩ හරින්න. බඳුනේ බම්බු කොටසේ සිදුරුවලින් හුමාලය පිටවෙන්නට පටන් ගත් පසු බම්බුව පරිස්‌සමෙන් ඉවතට ගෙන පොල්කටු හැන්දක මිට වැනි ඝන කෝටුවකින් බම්බුවෙන් පිට්‌ටුව තැටියකට බා ගන්න. ඒ අයුරින් එක දිගට බම්බුවට මිශ්‍රණය පුරවා තැම්බෙන්නට තබා පිට්‌ටු තනා ගන්න.

උණුසුම්ව පවතිද්දීම පිට්‌ටුවලට පොල් කිරි ස්‌වල්පයක්‌ එකතුකොට උම්බලකඩ සම්බෝලයක්‌ සමඟ ආහාරයට ගැනීම මැලේවරුන්ගේ සිරිතය. ඇතැම් විටෙක ඔවුහු පිට්‌ටුවලට පොල් කිරි සමඟ ඉදුණු කෙසෙල් ගෙඩියක මදයද එක්‌කොට ආහාරයට ගැනීමටද පුරුදු වී සිටිති. ඇතැම්හු පිට්‌ටුවලට පොල් කිරි සමඟ සීනි මිශ්‍රකොටද බුදිති. මැලේවරුන්හට ආවේණික වූ පිට්‌ටු දැන් අප සැමගේ ප්‍රනීත ආහාරයක්‌ වී ඇත්තේ එසේය.

එඩ්වඩ් චන්ද්‍රසිරි