අපි හැමෝම වගේ පැණිරස ආහාර වලට වැඩි කැමැත්තක් දක්වමු. නමුත් වැඩිපුර සීනි ආහාරයට ගැනීම නම් එතරම් සුබදායක වන්නේ නෑ. දිනපතා ශරීරයට අවශ්‍ය වන කැලරි ප්‍රමාණයෙන් නැතිනම් ශක්තියෙන් 25%ක් හෝ ඊට වැඩි ප්‍රමාණයක් සීනි ආහාර මගින් ලබාගත් පුද්ගලයන්ගේ හදවත් රෝග අවදානම ඉහළ බව  වසර පහළොවක සිට ලද අධ්‍යයනයන් මගින් තහවුරු කර තිබෙනවා.

ඔබත් සීනි වැඩිපුර ආහාරයට ගන්නවා නම් ඔබේ ශරීරය ඒ ගැන අනතුරැ අඟවන මෙවන් ලක්‍ෂණ දැකගන්නට ලැබේවි. 

සෑමවිටම මහන්සියක් දැනීම

සීනි වැඩි වශයෙන් ආහාරයට ගැනීම නිසා ශරීරයේ ස්වභාවික ශක්තිය හීන වනවා. ඔබේ ශරීරයටත් නිතරම වාගේ මහන්සියක් දැනෙනවා නම් එයින් කියවෙන්නේ ඔබ සීනි වැඩි වශයෙන් ආහාරයට ගන්නා බවයි. ඔබ ආහාරයට ගනු ලබන සීනි ප්‍රමාණය අඩු කරන්න. එවිට ඔබගේ තෙහෙට්ටු ස්වභාවය දුරු වේවි.

සීනි වලට දක්වන දැඩි ආශාව

සීනි සහිත ආහාර වලට දැඩිව ලොල් වන්නෙ සීනි සඳහා ඇබ්බැහිවී ඇති අයයි. යමෙක් මත් ද්‍රව්‍යයන් සඳහා ඇබ්බැහි වනවාට වඩා සීනි සඳහා ඇබ්බැහි වීම ඉහළ බව නවතම අධ්‍යයනයක් මගින් තහවුරු කර තිබෙනවා.

ඔබට නිතරම වාගේ සීනි සහිත ආහාර සඳහා ඇල්මක් ඇතිවනවා නම් එයින් කියවෙන්නේ ඔබ පමණට වඩා සීනි සහිත ආහාර ලබාගන්නා බවයි. ඔබටත් මෙසේ දැනෙනවා නම් ඔබ සීනි සහිත ආහාර ලබාගැනීම තරමක් අඩුකිරීම ඔබේ සෞඛ්‍යයට සුවදායක වනවා.

නිතර සෙම්ප්‍රතිශ්‍යාව ඇතිවීම

අධික ලෙස සීනි ආහාරයට ගැනීම මගින් ශරීරයේ ප්‍රතිශක්තිකරණ පද්ධතියට හානි සිදුවනවා. එම නිසා ශරීරයට ආසාදනය වන වෛරස සහ බැක්ටීරියා සමග ශරීරය සටන් වැදීම දුර්වලවීම නිසා නිතරම වාගේ කැස්ස සහ සෙම්ප්‍රතිශ්‍යාව වැනි රෝග ඇතිවන්නට පුළුවන්.

විෂාදය සහ කාංසාව වැනි තත්වයන් ඇතිවීම

විෂාදය සහ කාංසාව වැනි තත්වයන් ඇතිවීමට සීනි බලපාන බව විශ්වාස කිරීමට අපහසු වුවත් ඔබ සීනි සඳහා ඇබ්බැහිවී ඇති පුද්ගලයෙක් නම් ඔබ සීනි සහිත ආහාර ආහාරයට ගැනීම නැවතූ විට ඔබට විෂාදය හා සම්බන්ධ මානසික හැඟීම් වන අලස බව, දුක සහ සමාජය පිළිබඳව කලකිරීම වැනි හැගීම් ඇතිවන්නට පුළුවන්. අධ්‍යාපන කටයුතු අඩාලවීමත්, මතකය දුර්වලවීමත්, අධික සීනි නිසා ඇතිවන බාධකයන් හැටියට සොයාගෙන තියෙනවා.

ඇස් යට කළු පැහැ වීම

සීනි වැඩි ලෙස ආහාරයට ගැනීම නිරූපණය වන තවත් කරැණක් තමයි ඇස් යට කළු පැහැ වීම. ඔබත් ඔබේ ඇස් යට කළු වීම කෙරෙහි කනස්සල්ලෙන් සිටිනවා නම් මේ සෞඛ්‍යය ගැටලුව සුවකර ගැනීමට විවිධ නිෂ්පාදිත භාවිතා කිරීමට වඩා ඔබ ආහාරයට ගන්නා සීනි ප්‍රමාණය අඩු කර බලන්න. ඔබට දින කිහිපයක් ඇතුළත ඇස් යට කළු පැහැවීම සුවකර ගන්නට පුළුවන් වේවි.

ශරීරයේ බර පිළිබඳ ගැටලු

ඔබත් ශරීරයේ බර වැඩිවීම නිසා පීඩා විදිනවා නම් වහාම සීනි ආහාරයට ගැනීම පාලනය කරන්න. එය ඔබට ශරීරයේ බර පාලනය කරගන්නට විශාල උපකාරයක් වේවි.

අධික ලෙස සීනි ආහාරයට ගැනීමෙන් දියවැඩියාව සහ අධික තරබාරුව ඇතිවන බව ඔබ දන්නා කරැණක්. අධික ලෙස සීනි ආහාරයට ගැනීම නතරකිරීමෙන් ශරීරයේ බර අඩුකර ගන්නවාට අමතරව ඔබේ මුළුශරීර සෞඛ්‍යයම වර්ධනය වේවි.

අධි රුධිර පීඩනය

වැඩි වශයෙන් සීනි සහිත ආහාර ලබාගැනීම මගින් අධි රුධිර පීඩනයත් ඇතිවනවා. 2010 වසරේදී කොලෙරාඩෝ සරසවිය විසින් වැඩිහිටි පුද්ගලයින් 4,500 පමණ එක්කර එක්තරා අධ්‍යයනයක් සිදුකර තිබෙනවා. මේ අධ්‍යයනයේ දී සොයාගෙන තිබෙන්නේ සීනි ආහාරයට ගැනීම සහ අධි රුධිර පීඩනය අතර සෘජු සම්බන්ධයක් පවතින බවයි.

මේ නිසා ආහාර වේල එළවලු පළතුරු සරු එමෙන්ම ප්‍රෝටින් සහ මේද සරැ සීනි අඩු මට්ටමකින් පවත්වා ගැනීම ඉතා වැදගත්.

 සුගත්

ගැටවර විය කියන්නෙ ඉතා සංකීර්ණ සහ සංක්‍රාන්තික කාල පරිච්ඡේදයක්. බොහෝ සිතුවිලි, හැඟීම් අනාගතය පිළිබඳ සිහින මේ සියල්ල එකට කැටි වී වැඩිහිටියෙක් විදිහට සමාජයට යවන්න අවශ්‍ය පෞරුෂය නිර්මාණය වන්නේ අවු:11 ත් අවු:18 ත් අතර මේ කාලය තුළදී. මේ වයස තුළ සිටින ඔබේ දරුවා නිසි ලෙස අවබෝධ කර නොගෙන ඔහුට උපදෙස් දීම, ඔහු මෙහෙයවීමට යාම, ආදරයට වඩා ඔබේ කෑදරකම ඉස්මතු වී කටයුතු කිරීම වැනි හේතු නිසා දරුවාගේ පෞරුෂය කුඩුපට්ටම් වී විනාශ වෙන්නෙ හරියට වේගයෙන් යන දුම්රියක් ක්ෂණිකව තිරිංග තද කිරීම නිසා පෙරළී ඇතිවන හානිය හා සමානවය. මීට ප්‍රධානම හේතුව නූතන මනෝවිද්‍යාත්මක සොයාගැනීම් අනුව දරුවකුගේ පෞරැෂයට අදාළ මොළයේ පරිපථ නිර්මාණය වීමට පටන් ගන්නෙ මේ ගැටවර විය තුළදී නිසයි. හැඟීම්වලට අදාළ පරිපථ, ආදරය, තීරණ ගැනීම, ප්‍රශ්න විසඳාලීමට අවශ්‍ය පරිපථ මොළය තුළ සකස් වන්නෙ මේ කාලය තුළයි.

ළමා කාලය අවසන් වෙමින් සිටි අවු:18 ක් වයසැති දුමින්ද අපට යොමුවුණේ ඔහුගේ මව සමඟයි. මව සහ දුමින්දගේ මුහුණුවල දක්නට ලැබුණේ පීඩනය සහ අසහනකාරී බවයි. දුමින්දගේ ගැටලුව ගැන මව මෙසේ පැවසුවා.

මම ගුරුවරියක්. මහත්තයා පොඩි ව්‍යාපාරයක් කරනවා. මට දැන් හිතෙනවා අපි දෙන්නගෙම වරද නිසා තමයි දරුවා මෙහෙම නාස්ති වුණේ කියලා. අපි දෙන්නම ජීවිතේ ගෙනියන්න ලොකු සටනක් කරනවා. පාසල් ගිහින් ඇවිත් මම tution කළා. මගේ ස්වාමියා ගෙදර එන්නෙ රෑ 9ට විතර. අපි දෙන්නටම අපේ දරුවා අපෙන් මඟහැරුණා කියලයි හිතෙන්නෙ.

ඇයි ඔබ එහෙම කියන්නෙ?

මම කිසිම දවසක මගේ දරුවා අගය කළේ නෑ. ඔහුගෙ වැරදිමයි හෙව්වෙ. O/L වලට A 8 ක් ගත්තා. ඒත් මම රණ්ඩු වුණා ඇයි උඹට A 9 ක් ගන්න බැරිවුණේ කියලා. මම නිතරම අනිත් ළමයි එක්ක මගෙ දරුවා සංසන්දනය කර කර ඔහුට බැන්නා. මගෙ ස්වාමියත් නිතරම දුමින්දගෙ වැරදිමයි හෙව්වෙ. ඔහු දුමින්ද ළඟින් වාඩිවෙලා ආදරෙන් කතා කරන කිසිම දවසක් මම දැකල නෑ. උඹ කාලකණ්ණියා, බූරුවා කියන වචන තමයි නිතරම ඔහුගෙ කටින් පිටවුණේ. මගෙ ස්වාමියත් හොඳටම මහන්සිවෙලා ගෙදර එන්නෙ. වෙලාවකට මට ඔහු ගැනත් දුක හිතුණා. මේ ජීවිත සටන ඇතුළෙ අපි දෙන්නත් ඈත්වෙලා. ආදරය සහ ලිංගික ජීවිතයත් අපෙන් ඈත්වෙලා. ඔහුට හරියට තරහ යනවා. මමත් ඔහු සමඟ නිතරම රණ්ඩු වුණා. දුමින්ද පුංචි කාලෙ ඉඳලම දැක්කෙ ආදරණීය පරිසරයකට වඩා ප්‍රචණ්ඩ පරිසරයක්.

ඉතින් දැන් ඔබේ පුතාට මොනවද වෙලා තියෙන්නෙ?

O/L හොඳට පාස් වුණාට පස්සෙ දුමින්ද A/L වලට කොළඹ ප්‍රසිද්ධ පාසලකට ඇතුළු වුණා. ගෙදර පරිසරය නිසාදෝ ඔහු අපෙන් හුඟක් ඈත්වුණා. උදේ 6ට ගෙදරින් යන දරැවා හවස ගෙදර එන විට 6,7 වුණා. මෙහෙම මාස 6ක්වත් පිළිවෙළට පාසල් ගියේ නෑ. අපිත් එක්ක කතා කරන එක අඩු වුණා. ගෙදරින් සල්ලි හොරකම් කරන්නත් පටන් ගත්තා. ගෙදර ඉන්න කොට ඔහු හිටියෙ කාමරේ ඇතුළෙ. හොස්ස ළඟින් මැස්සා යන්න බෑ, පුංචි දේටත් හරියට තරහ යන්න පටන් ගත්තා. දවසක් ගෙදර එනකොට ඔහුගෙ ඇස් හොඳටම රතුවෙලා තිබුණෙ. මට හොඳටම තරහ ගියා. මම ඔහුට දෙකක් ගැහුව්වා. මොනව හරි මත්වෙන දෙයක් උඹ ගන්නව නේද?* කියලා මම ඇහුව්වා. ඔහු කීවා, ඔව් මම ගංජා බොනවා. ඉස්කෝලෙ ගංජා බොන සෙට් එකක් මට ඉන්නවා. එයාල එක්ක ඉන්න කොට මට හරිම සැහැල්ලුයි. ඔයාල මට සල්ලි වියදම් කළාට කවදාවත් මට ආදරේ කළේ නෑනෙ. ඒත් මට යාළුවෝ එක්ක ඉන්න කොට හරිම සතුටක් දැනෙනවා. කියලා.

අපි දුමින්ද දෙසට හැරුණා. ඔහු මෙසේ කීවා.

අපේ ගෙදර තිබුණෙ හරිම සීතල පරිසරයක්. කිසිම උණුසුමක් නෑ. මට කවුරැත් දැනෙන්න ආදරේ කළේ නෑ. අම්මයි තාත්තයි නිතරම මගේ වැරදිමයි හෙව්වෙ. එයාල මගෙ අධ්‍යාපනය ගැන හෙව්වට මාත් එක්ක ජීවිතේ ගැන කතා කළේ නෑ. මම O/L හොඳට පාස් වුණා. එතනින් පස්සෙ යන්න ඕන තැන හොයාගන්න බැරිව ලෝක දෙකක් අතර අතරමං වුණා. මගේ ලෝකෙ දැන් ඉන්නෙ මගෙ යාළුවෝ විතරයි. ගංජා බීවම හරිම සැහැල්ලුයි. මගෙ ඔළුව හැමදේකින්ම නිදහස් වෙලා පාවෙලා යනව වගේ දැනෙනවා. ඒත් මට දැන් ජීවිතේ එපාවෙලා. මට හැමදේම වැරදිලා කියලා මට දැනෙනවා. මින් එළියට එන්නෙ කොහොමද කියලා හිතාගන්න බැරැව තමයි මම ඉන්නෙ.

දුමින්ද මින් එළියට ගන්නේ කෙසේද?

දුමින්ද මානසික අවපීඩනයෙන් පෙළෙන අතර ගංජා නැමති මත්ද්‍රව්‍යයට ඇබ්බැහි වී සිටියේය. ඔහුට මානසික අවපීඩනය හෙවත් ජීවිතය එපාවීම සහ කලකිරීමට ඖෂධ ප්‍රතිකාර ලබාදුන් විට ඔහුගේ ජීවිතය ශක්තිමත් වී ප්‍රබෝධමත් විය. ගංජා හෙවත් කැනබීස් (Cannabies) නැමති මත්ද්‍රව්‍යයෙන් එළියට ගැනීමට විශේෂ ප්‍රතිකාරයක් වන විෂානුහරණයට (Detoxification) ඔහු ලක් කළේය. ඔහුගේ ජීවිතය ශක්තිමත් කිරීම සඳහා ඉන් පසු මනෝවිද්‍යාත්මක උපදේශනයට යොමු කළේය. කොහුවල life ආයතනයේ උපදේශිකාවක් යටතේ ඔහුට ලබාදුන් උපදේශනවල සාරාංශය මෙසේය.

ජීවිතයේ අරමුණු සොයාගැනීමට උදව් වීම.

මනස සහ ශරීරය සැහැල්ලු කරන ව්‍යායාමවලට යොමු කිරීම.

ගංජා නැමති මත්ද්‍රව්‍යවල ඇති භයානකකම හා ඉන් මොළයට ඇතිවිය හැකි හානි පිළිබඳ සාකච්ඡා කිරීම.

දුමින්දගේ දෙමාපියන් සමඟ සාකච්ඡා කර ඔහු සමඟ නිරෝගී ආදරණීය සම්බන්ධයක් පවත්වා ගැනීමට අවශ්‍ය මනෝ විද්‍යාත්මක උපදේශනය ලබා දීම.

දුමින්ද විනාශකාරී ජීවන රටාවෙන් එළියට පැමිණියේය. දෙමාපියන්ද දුමින්ද සමඟ හොඳ සම්බන්ධතාවයක් ගොඩනගා ගත්තේය. ඔවුන් දිනකට පැයක් පමණ දුමින්ද සමඟ ආදරය සතුට බෙදාගත්තේය. මෙම දරුවා දැන් සතුටින් A/L කරයි. එය අපටද සතුටකි. 

මේ විෂම අධ්‍යාපන ක්‍රමය දරුවන් සහ දෙමාපියන් ඈත් කර තබා ඇත. හොඳම ගුරුවරයා කියන්නේ හොඳින් ඔළුවට විෂය ගිල්වන ගුරුවරයාය. අද ගුරුවරයාට දරුවාගේ ප්‍රශ්න හෝ හැඟීම් හඳුනා ගැනීමට දැනුමක් නැත. ඔවුන්ද මුදල් හම්බ කරන සටන තුළට ගිලී ගොස්ය. විද්‍යාත්මකව උපදේශනය පිළිබඳ දැනුමක් ලැබූ ගුරුවරු අද පාසල්වල නැත. ඔවුන් බොහෝ දෙනා අම්මණ්ඩිලාය. දරුවන්ට ළංවීමේ සරල ක්‍රමවේද ඔවුන් ළඟ නැත. මන්ද ඔවුන්ට මෙම පුහුණුව ලබා ඇත්තේ ප්‍රායෝගික දැනුමක් නැති අධ්‍යාපන අමාත්‍යාංශයේ යල්පැන ගිය ඔළුගෙඩිවලිනි. ආදරය හා හැඟීම් බෙදාගැනීමේ පරිසරයක් පන්ති කාමරය තුළ නැත. මෝඩ දේශපාලකයන්ට ජාතිවාදයට වපුරමින් මේ රට ගෙන යන්නට පුළුවන් වී ඇත්තේ කුඩා කාලයේ මනුෂ්‍යත්වය හා ආදරය පිරුණු පරිසරයක් පන්ති කාමරය තුළ නිර්මාණය කිරීමට නොහැකි වූ නිසයි.

කිරිබත්ගොඩ මූලික රෝහලේ 
මනෝ වෛද්‍ය නයනානන්ද කුමාරනායක

ඕනෑම ආකාරයක ව්‍යායාම ක්‍රමයක් සෞඛ්‍යයට හිතකරය. නමුත් ජලය තුළ සිදුකරන ව්‍යායාම සෞඛ්‍යයට වාසි රැසක්ම සපයනවා. ඔබ ගොඩබිමේ ව්‍යායාම සිදු කරනවා මෙන් ජලය තුල ව්‍යායාම සිදු කිරීමේ දී ශරීරයට එතරම් තද ඝට්ටන සිදු නොවන නිසා ශරීරය 90%ක්ම සැහැල්ලු ස්වභාවයක් ගනු ලබනවා.

ඇතැම්විට ජලචර ව්‍යායාම ලෙස හඳුන්වන ජලය තුළ සිට සිදුකරනු ලබන මෙම ව්‍යායාම සිදුකිරීමේ දී වෙහෙසට පත් නොවී නැවුම් ආකාරයක අත්දැකීමක්ද සමඟ සතුටක්ද විඳින්නට පුළුවන්. 

ජලයේ ව්‍යායාම සිදු කිරීම මගින් කුඩා දරුවාගේ සිට වැඩිහිටි පුද්ගලයා දක්වා වයස් ඛාණ්ඩ වල ඕනෑම අයෙකුට සෞඛ්‍යය වාසි අත්විඳින්නට පුළුවන්. මාංශ පේශී ඇති පුද්ගලයින්, නහර මතුවී ඇති පුද්ගලයින්, අස්ථි වලට හානිවී ඇති පුද්ගලයින් මෙන්ම ගර්භනී කාන්තාවන් සහ අධික තරබාරු පුද්ගලයින්ට පවා මෙවන් ව්‍යායාම සිදු කරන්නට පුළුවන්. 

මේ ඕනෑම ව්‍යායාමයක් පිහිනුම් තටාකයක සිට පහසුවෙන්ම සිදු කරන්නට පුළුවන් ඒවාය.

ජලය තුළ ව්‍යායාම සිදුකිරීම මගින් සැලසෙන සෞඛ්‍ය වාසි....

01. ශරීරයේ බර අඩුවීම

ජලය තුළ සිදුකරන ව්‍යායාම මගින් ශරීරයේ බර පහසුවෙන් අඩුකර ගන්නට පුළුවන්.

ව්‍යායාම සඳහා යොදනු ලබන බලය සහ ජලය මගින් සැපයෙන ප්‍රතිරෝධය එකට එක්වීම මගින් ශරීරයට පරිපූර්ණ ව්‍යායාමයක් ලැබෙනවා. 

ජලජ ව්‍යායාම දිනපතා දිනකට විනාඩි 30 සිට 60 දක්වා සිදුකිරීම  මගින් දිනකට කැලරි 300 සිට 500 දක්වා ප්‍රමාණයක් දහනය කර ගන්නට පුළුවන්. 

“Obesity” සඟරාවේ 2010 වසරේ දී පළවුණු අධ්‍යයන වාර්තාවක සඳහන් වන්නේ ජලය තුළ ව්‍යායාම සිදුකිරීම මගින් ශරීරයේ මේදය සාර්ථකව දහනය කර ඉනෙහි වට ප්‍රමාණය නිසි ලෙස අඩු කරගෙන ශරීරයේ නිසි හැඩය ලබා ශරීරයට සෞඛ්‍යය සම්පන්න භාවයක් අත් කර ගත හැකි බවයි.

02. අස්ථිවල සෞඛ්‍ය වර්ධනය කිරීම

ජලය තුළ සිදු කරන ව්‍යායාම මගින් අස්ථි වල සෞඛ්‍යය වර්ධනය වීමක් සිදු වනවා. ජලය තුළ ඇති ප්‍රතිරෝධතාවය මගින් අස්ථි මතට හානිදායක පීඩනයක් එල්ල නොවන නිසා වේදනාව සහ තෙහෙට්ටුව වැනි බලපෑම් ඇතිවීම වැළකෙනවා.
ආතරයිටිස් වැනි සන්ධි ආබාධ සහ වෙනත් අස්ථි ගැටලුවලින් පීඩා විඳින පුද්ගලයින් සඳහා මෙම ව්‍යායාම ක්‍රමය වඩාත් ඵලදායී වනවා. 

ජලය තුළ ව්‍යායාම සිදු කිරීම මගින් “hemophilia” වැනි රෝග ඇති පුද්ගලයින්ට එදිනෙදා කාර්යයන් කිරීම සඳහා අස්ථිවල ශක්තිය වර්ධනයට සහ චලනයන් වර්ධනය කර ගැනීමට උපකාර වන බවයි. 

පිහිනුම් ව්‍යායාම සිදුකිරීම මගින් ඔස්ටියෝ ආතරයිටිස් රෝගයෙන් පීඩා විඳින පුද්ගලයින්හට ඇති වන අස්ථි තද ස්වරෑපය දුරැ කර මාංශ පේශීවල ක්‍රියාකාරීත්වය වේගවත් කරන බව සනාත කර තිබෙනවා.

03. නම්‍යතාවය සහ සංචලතාවය වර්ධනය කිරීම

සාමාන්‍ය පරිදි සිදුකරනු ලබන ව්‍යායාමවල චලනයන් ගුරුත්වාකර්ෂණ බලයට සහ බිම ඇදවැටේවි යැයි යන බිය නිසා සීමා වනවා. නමුත් ජලය තුල ව්‍යායාම සිදු කිරීමේදී විශාල පරාසයක චලනයන් සිදුකිරීමට හැකිවීම නිසා අස්ථි වඩාත් නම්‍යශීලි වනවා. 

ජලය තුළ සිදු කරන ව්‍යායාම පිට කොන්ද ප්‍රදේශයේ නම්‍යශීලී භාවයට වඩාත් වාසිදායක වනවා. ශරීර යෝග්‍යතාවයට නම්‍යශීලීත්වය වඩාත් වැදගත් වන නිසා ජලය තුළ ව්‍යායාම සිදුකර නම්‍යශීලීත්වය වර්ධනය කිරීමෙන් ශරීරයේ නිසි සෞඛ්‍යය සම්පන්න වර්ධනයක් ඇති කරගන්නට පුළුවන්. 

වැඩිහිටි පුද්ගලයින්ගේ බිම ඇදවැටීමේ අවදානම අඩු කර ගැනීම සඳහා ජලය තුළ සිදු කරන “aqua aerobic” චිකිත්සාව අතිසාර්ථක වන බව අධ්‍යයන වාර්තාවක සඳහන් වනවා. මෙම ව්‍යායාම සිදු කිරීම සඳහා උණු ජලය සහිත ජල තටාකයක් භාවිතා කරනවා නම් එය මාංශ පේශීවල නම්‍යතාවයට පහසුවන නිසා ව්‍යායාමවල ප්‍රභලත්වයද වර්ධනය වනවා.

04. රුධිර පීඩනය අඩු කර ගැනීම

ජලය තුළ ව්‍යායාම සිදුකිරීම මගින් ජලයෙන් නිකුත්වන ප්‍රතිරෝධය නිසා ශරීරය පුරාවටම රැධිරය සංසරණය වීමේ වඩාත් කාර්යයක්‍ෂම කරනු ලබනවා. මෙමගින් රැධිර පීඩනය නියාමනය කර ගැනීම සහ අක්‍රිය හෘද ස්පන්දනය නිසි තත්වයට පත්කර ගැනීම වැනි සෞඛ්‍යය වාසි අත් කරගන්නට පුළුවන්. 

පුද්ගලයින් පිරිසක් සති දහයක කාලයක් ජලය තුළ ව්‍යායාම කිරීම සඳහා යොදවා සිදු කල එක්තරා අධ්‍යයන වාර්තාවක් මගින් කරුණු දක්වන ආකාරයට පැහැදිලිවන්නේ ස්ථූල පුද්ගලයින්හට, අධි රැධිර පීඩනය ඇතිපුද්ගලයින්ට, ආබාධිත අයට සහ ස්වසන ගැටලු ඇති පුද්ගලයින්ට මෙම ව්‍යායාම ක්‍රමය වඩාත් ඵලදායී වන බවයි.

Medi/news