පොදුවේ හට ගන්නා හෘද රෝග තත්ත්වයක්‌ "කාඩියෝමයෝපති" හේතුවෙන් පිරිමින් මියයැමේ හැකියාව කාන්තාවන්ට වඩා සියයට 64 කින් වැඩි බව එක්‌සත් රාජධානියේ වෛද්‍ය පර්යේෂකයින් පිරිසක්‌ විසින් සිදු කරන ලද නවතම අධ්‍යයනයකදී අනාවරණය වී තිබේ.
 
 ඉහත කී "කාඩියෝමයෝපති" රෝග තත්ත්වය මත පිරිමින්ට වඩා කාන්තාවන්ගේ හෘදය වස්‌තුව අක්‍රීය වීමේ අවදානම සියයට 10 කින් වැඩි වුවද එයින් වැඩි වශයෙන් මියයැමේ හැකියාවක්‌ ඇත්තේ පිරිමින්ට බව මෙහිදී හෙළි වී තිබේ.
 
 කාන්තා හෝමෝනයන් මෙහිදී කාන්තාවන්ගේ හෘද පටකයට හානි සිදුවීමේ හැකියාව අඩු කර හෘදයවස්‌තුවට ලේ පොම්ප කිරීමේ හැකියාව පවත්වා ගැනීමට උපකාර වන බව මෙහිදී හෙළි වී තිබේ.
 
 මෙම නව සොයා ගැනීම නව ප්‍රතිකාර සඳහා මඟපාදනු ඇති බවට විද්‍යාඥයින් විශ්වාසය පළ කර ඇත. "කාඩියෝමයෝපති" යනු හෘදය වස්‌තුවේ මාංශ පේශීය ඇදෙන සුළු හා සිහින් කරන රෝග තත්ත්වයකි. හුස්‌ම ගැනීමේ අපහසුතා උදරය හා කෙණ්‌ඩා ඉදිමීම මෙහි ප්‍රධාන රෝග ලක්‍ෂණයන් වේ.
 
 මෙහිදී ලන්ඩනයේ ඉම්පීරියල් විදුහලේ පර්යේෂකයින් කණ්‌ඩායමක්‌ විසින් "කාඩියෝමයෝපති" රෝගයෙන් පෙළෙන කාන්තාවන් 290 දෙනෙකු හා පිරිමින් 591 දෙනෙකු අධ්‍යයනයට ලක්‌ කර තිබේ.
 
 අධ්‍යයනය මෙහෙය වූ වෛද්‍ය සන්ඡේ ප්‍රසාද්ට අනුව මෙම අධ්‍යයනයේදී කාන්තාවන්ට වඩා පිරිමින් ඉහත කී රෝග තත්ත්වයෙන් මියයැමේ අවදානම වැඩි බව හෙළි වී තිබේ. පර්යේෂකයින් ඉදිරියේදී කාන්තාවන් අතර මෙම රෝග තත්ත්වය නිසා සිදු වන මරණ අඩු වීම කෙරෙහි කාන්තා හෝමෝන ආරක්‍ෂක පලිහක්‌ ලෙස ක්‍රියා කර ඇත්දැයි වැඩිදුර අධ්‍යයනය කිරීමට නියමිතය.

රෝගයක්‌ සුවපත් කිරීම සඳහා විවිධ වෛද්‍ය ක්‍රම විවිධ මතිමතාන්තර අද නූතන සමාජයේ න්‍යායාත්මකව කරුණු ඉදිරිපත් කරමින් පවතී. බටහිර වෛද්‍ය ක්‍රමය, ආයුර්වේද වෛද්‍යක්‍රමය, චින කටු, හෝමියෝපති, පාරම්පරික වෛද්‍ය ක්‍රම හෝ යුනානි ක්‍රමය ඇතුළු වෛද්‍ය ක්‍රමයන් අතරින් කුමන හෝ වෛද්‍ය ක්‍රමයකින් රෝගියෙකුට අත්‍යාවශ්‍ය වන්නේ තමන් විඳවන රෝගයෙන් සුවපත් වීමටයි.
 
 මිනිසාගේ ජීවිතය පවත්වාගෙන යැම සඳහා ආහාර අනුභවය අත්‍යාවශ්‍යම වේ. රසයන් හයකින් යුක්‌ත වු එනම් මධුර, අමිල, ලවන, කටුක, තිත්ත, කෂාය රසයන් ආමාශයේදි පැසවීමෙන් පසු මධුර අම්ල හෝ කටුක රසයෙන් යුක්‌ත වේ. අප ගනු ලබන ආහාර නිසි පරිදි දිරවා පැසවා සප්තධාතුන් කරා ගමන් කිරීමෙන් බොහෝ විට මනුෂ්‍ය ශරීරය නිරෝගිමත් වේ. රස, රක්‌ත, මාංශ, මේදස්‌ අස්‌ථි අස්‌ථිමඡ්ජා ශුක්‍රානු ලෙස මෙම සප්ත ධාතුන් නිෂ්පාදනය වී යත් සියලු ධාතුන් අතුරින් රක්‌ත ධාතුව ප්‍රධාන වේ. රෝගියෙකු පරීක්‍ෂා කිරීමේදී අෂ්ඨ විධි පරීක්‍ෂාවක්‌ (අටතැන් පරීක්‍ෂාවක්&zwnj වෛද්‍ය විද්‍යාවන්හි දක්‌වා ඇත. නාඩි මුත්‍ර මල, ජිහ්වා, ශබ්ද, ස්‌පර්ශ, නේත්‍ර ආකෘති වේ. මෙහිදී නාඩි පරීක්‍ෂාව ඉන් පළමුවැන්නා ලෙස හැඳින්වේ.
 
 මෙම නාඩි පරීක්‍ෂාව මුල් තැනෙහිලා මෙම වෛද්‍ය ක්‍රමය අනුව පුරුෂයන්ගේ දකුණු අතෙහි ද ස්‌ත්‍රින්ගේ වම් අතෙහිත් මැනික්‌ කටුව අසල රුධිරවාහිනි ගැස්‌ම හෙවත් ස්‌පන්දනය හඳුනාගත හැකිය. තවදුරටත් නාඩිවල ඇතිවන වෙනස්‌කම් තීව්‍ර ලෙස දැකීමෙහිලා මෘදු ලෙස වරින්වර නාඩි තදකොට නාඩිවල වැඩිගැස්‌ම සහ අඩුගැස්‌ම අවබෝධ කර ගත හැකිය.
 
 ත්‍රිධාතුන් හෙවත් ත්‍රිශක්‌තින් (වාත පිත, කඵ) සමබරව පවත්නාකල් මිනිස්‌ සිරුර නිරෝගීව පවතී. එම ධාතූන් එකක්‌ හෝ විකෘතිවීම නිසා රෝග හටගනී. බෝහෝ විට වර්තමානයේ ලබාගනු ලබන ආහාර පාන, හරිහැටි නින්ද නොමැතිකම, විවේකය නොලැබීම, මානසික ප්‍රශ්න හේතුකොටගෙන ද මෙම ශක්‌තීන් දෝෂ වී රෝගාබාධයන්ට ගොදුරු වේ.
 
 නාඩි වෛද්‍යවරයකු නාඩි අල්ලා නිර්නය කරනු ලබන්නේ රෝග නිධානයයි. ප්‍රතිකාර දෙනු ලබන්නේ රෝගයට නොව රෝග නිධානයටයි. මේ පිළිබඳව මනා කොට ඇති අවබෝධයෙන් ශරීරයේ වාත පිත කඵ යන ශක්‌තීන්ගේ වෘද්ධිය හෝ ක්‍ෂීනතාවය පිළිබඳ අවබෝධය ලබාගත හැකිය. මෙම ත්‍රිධාතුන්ගේ ස්‌වරූපය ඒ පිළිබඳව මනා අවබෝධයක්‌ ඇති වෛද්‍යවරයකුට එතරම් දුෂ්කර කාර්යයක්‌ නොවන්නේය.
 
 නාඩි පරීක්‍ෂාවේදී වෛද්‍යවරයා සම්පූර්ණ චිත්ත ඒකාග්‍රතාවයෙන් යුක්‌ත විය යුතුමය. බෝහෝ රෝගීන්ට ප්‍රතිකාර කරනු ලබන අත්දැකීම් මත නාඩි වෛද්‍යවරයා ක්‍ෂණිකව චිත්ත ඒකාග්‍රතාවයට පත්වේ. රෝගියාගේ දිගහරින ලද අතගෙන මැනික්‌ කටුව සන්ධිය මතට වෛද්‍යවරයාගේ දබරැඟිල්ල, මැදැඟිල්ල, වෙදැඟිල්ල තබා වාත කඵ, පිත, නාඩිය වෙන්කොට හඳුනාගෙන එහි ඇති චංචල හෝ දෙදොස්‌, තුන්දොස්‌ ස්‌වභාවය වැඩිදුරටත් හඳුනා ගනී.
 
 මහාර්ෂිහු පංච භෞතික ශරීරයෙහි සිදුවන ක්‍රියා විස්‌තර කිරීමේදී වාත පිත කඵ ගැන හඳුන්වා දී ඇත. නාඩි විඥානය පිළිබඳව රහස්‍ය කරුණු අවබෝධ කරගැනීම සඳහා පංච මහා ධාතූන් හා ත්‍රිධාතුන් පිළිබඳව කරුණු අති සූක්‍ෂ්මව අවබෝධය ලබාගැනීම අත්‍යාවශ්‍යයයි.
 
 ප්‍රතිකාර කරනු ලබන්නේ කෂායවලින්ද, ආසව, අරිෂ්ඨ වැනි පෙරාපු බෙහෙත්වලින්ද, යනු පැනයකි. කිව යුත්තේ නැත යන්න පමණකි.
 
 වියලා කුඩු කරගත් චූර්ණ සහ ඒවා ගුලි කල්ක ලෙස මීපැණි එළඟිතෙල් දමා සකස්‌කරගත් ඖෂ ධයන් වේ. එය වෙළෙඳපොළෙන් මිලදී ගත හැකි ඖෂධයන් නොවේ. ආයුර්වේදය මධ්‍යගතයි. සිංහල වෙදකම විමධ්‍යගතයි.
 
 රෝගීන්ගේ හිතසුව පිණිස අසවල් අසවල් රෝගයට කියා නොව පොදුවේ නාඩියෙන් තීන්දුවන්නාවූ රෝග නිධානයට ප්‍රතිකාර කරනු ලබත්, එවිට රෝගියාගේ ශරීරගත ආබාධය සුවපත් වේ. වඩාත්ම තෝරා බේරා කියතොත් මේ අසවල් අසවල් රෝගයට ප්‍රතිකාර කරනු ලබන්නේද, එනම් සමාජයේ බොහෝ කතාබහට ලක්‌වන සන්ධි ඉදිමුම, සන්ධි ආබාධ, බලවත් වූ හිසරුජා, ඇදුම, වකුගඩුවල ගල් යනුවෙන් වර්ගකරණ ලද රෝගාබාධයන් පිළිබඳව විමසුමට ලක්‌වේ. වෙනත් වෛද්‍ය ක්‍රම කරා ගොස්‌ එනු ලබන රෝගීන් ඉදිරිපත් කරන එක්‌ස්‌රේ කිරණ ප්‍රතික්‍ෂේප කරනු ලබන්නේද, වෛද්‍ය වාර්තා ප්‍රතික්‍ෂේප කරනු නොලබන්නේ ඒ පිළිබඳ කථා කිරීම අපට අයත් නොවන බැවිනි.
 
 වත්මන් රෝගාබාධාවල ප්‍රධාන හේතුව මිනිස්‌ ශරීරයේ රුධිර ශක්‌තිය හීනවීමය. රුධිර ශක්‌තිය වැඩිකිරීම නැතහොත් හිමොග්ලෝබීන් වැඩිකිරීම රෝගයන්ට ඔරොත්තු දීමේ හැකියාව වර්ධනය කොට රෝගියාට අවශ්‍ය සුවපත්වීම සඳහා අදාළ නාඩියට ප්‍රතිකාර කිරීමයි.
 
 මෙවැනි වටිනා නාඩි වෛද්‍යක්‍රමයක්‌ රටේ ඇති බවත් එමගින් බොහෝ රෝගාබාධ සඳහා ප්‍රතිකාර ලබාගත හැකි බවත් මෙයින් දන්වා සිටිමි. මෙම වෛද්‍යක්‍රමයේදී ඖෂධ භාවිතය අපහසු නොවේ. රැකියාවන් හෝ අධ්‍යාපනය ලබන්නන්ට වුවද විදේශ ගතවන අයට වුවද දිනකට වතාවක්‌ වුව භාවිතා කළ හැකිය.
 
 ඔබත් යම් රෝගාබාධයකින් පීඩා විඳිනවා නම්, නැතිනම් ඔබේ වේදනාවට රෝගයේ නිධානය සොයාගත නොහැකිව ලතැවෙනවා නම් නොමිලේ ඒ පිළිබඳ විස්‌තර දැනගැනීමට 0779399935 හෝ 0710410429 යන අංකවලින් වෛද්‍යතුමිය සම්බන්ධ කරගැනීමේ හැකියාව තිබේ.
 
 පාරම්පරික ආයුර්වේද නාඩි වෛද්‍ය
 මොයිරා එලිසබෙත් කරුණානන්ද
 රජමහා විහාරය අසල පැපිලියාන
 

රෝගය බෝවන අයුරු
 
 ඉන්ෆ්ලුවන්සාව වෛරසයකින් බෝවන රෝගයකි. ඉන්ෆ්ලුවන්සා රෝගියකු කහින විට, කිවිසුම් යවන විට, හයියෙන් කතා කරන විට හා සිනාසෙන විට පිටවන කෙළ බිඳිති, සොටු ආදියෙන් රෝගය අන් අයට බෝවේ.
 
 රෝග ලක්‍ෂණ
 
 උණ, කැස්‌ස, උගුරේ වේදනාව, නාසයෙන් සොටු දියර ගැලීම වැනි රෝග ලක්‍ෂණ ඉන්ෆ්ලුවන්සාව නිසා විය හැකිය. මෙම රෝග ලක්‍ෂණ ඇත්නම් සුදුසුකම් ලත් වෛද්‍යවරයකු හමුවන්න.
 
 රෝගය උත්සන්න වීමේදී මතුවන අනතුරුදායක ලක්‍ෂණ
 
 හුස්‌ම ගැනීමේ අපහසුව, පපුවේ හෝ උදර ප්‍රදේශයේ කැක්‌කුම හා බර ගතිය, එකදිගට පවත්නා වමනය, කරකැවිල්ල.
 
 කුඩා දරුවන්ට
 
 කිරි උරාබීම අඩුවීම, දියර වර්ග පානය කිරීම අපහසුවීම, මුත්‍රා පිටවීම අඩුවීම, නොසන්සුන් ලෙස හැසිරීම වැනි රෝග ලක්‍ෂණද ඇතිවිය හැකිය.
 
 ඉහත අනතුරුදායක රෝග ලක්‍ෂණ පෙන්වයි නම් වහාම රෝහලකට යන්න.
 
 ඉන්ෆ්ලුවන්සා රෝග ලක්‍ෂණ ඇත්නම් ඉක්‌මන් සුවය සඳහා
 
 හොඳින් විවේක ගන්න. බිත්තර, මාළු, මස්‌, කරවල, කඩල, පරිප්පු වැනි පෝෂ්‍යදායී ආහාර කෑමට එකතු කරගන්න. කැඳ, සුප් වැනි උණුසුම් දියර වර්ග පානය කරන්න. ළදරුවන්ට මව්කිරි දීම ද නොනවත්වාම සිදු කරන්න.
 
 රෝගය පැතිරීම වැළැක්‌වීම සඳහා
 
 කැස්‌සකදී හෝ කිවිසුම් යැමකදී ලේන්සුවකින් හෝ ටිෂූ කඩදාසියකින් නාසය හා මුව ආවරණය කරගන්න. එසේ නොමැති විට වැලමිටේ ඇතුළු පැත්තෙන් නාසය හා මුව ආවරණය කරගන්න.
 
 කැස්‌සකදී හෝ කිවිසුම් යැමකදී භාවිත කළ ටිෂූ කඩදාසිය කසළ බඳුනකට දමන්න. ලේන්සු නිතර සෝදා වියළා ගන්න.
 
 දැත්වලින් මුව හා නාසය නිතරම ඇල්ලීමෙන් වළකින්න. නිවසින් බැහැරට ගොස්‌ නැවත පැමිණි විට සබන් යොදා හොඳින් දැත් සෝදා පිරිසිදු කරගන්න. මහජනතාව ගැවසෙන ස්‌ථානවලට යෑම හැකිතාක්‌ අවම කරන්න. ඉන්ෆ්ලුවන්සා රෝගීන් රැකියා ස්‌ථාන වෙත යැමෙන් වළකින්න. රෝගී දරුවන් පෙර පාසලට, පාසලට, අමතර පන්තිවලට යෑවීමෙන් වළකින්න.
 
 ඉන්ෆ්ලුවන්සා රෝගය වැළඳීමට හා රෝගය උත්සන්න වීමට වැඩි හැකියාවක්‌ ඇති අවදානම් කාණ්‌ඩ -
 
 ගර්භනී කාන්තාවන්, අවුරුදු 2 ට අඩු දරුවන්, වයස අවුරුදු 65 ට වැඩි පුද්ගලයන්, ඇදුම වැනි ශ්වසන රෝග, දියවැඩියාව වැනි කල්පවතින රෝග තත්ත්වයන්ගෙන් පෙළෙන්නන්, දීර්ඝකාලීනව ස්‌ටිරොයිඩ් කාණ්‌ඩයේ ඖෂධ ලබාගන්නා රෝගීන්, ප්‍රතිශක්‌තිය හීන වූ පුද්ගලයන්.
 
 පැය 24 පුරා ක්‍රියාත්මක සුවසැරිය ක්‍ෂණික දුරකථන සේවාව ඇමතීමෙන් ඉන්ෆ්ලුවන්සාවව සහ ප්‍රතිකාර පිළිබඳ වැඩි විස්‌තර නොමිලේ ලබාගත හැකිය. එහි දුරකථන අංකය 0710 107 107 වෙයි.