වෛද්‍ය ක්‍රමයකදී තිබිය යුතු ප්‍රධානම දෙයක් වන්නේ රෝග සඳහා ඖෂධ තිබිය යුතු වීමයි. ඖෂධ යන වචනය සංස්කෘතික වචනයකි. බටහිර වෛද්‍ය ක්‍රමයට අනුව එය මෙඩිසින් ලෙසින් හැඳින්වේ. ඖෂධයක් යනු රෝගයක් ශරීරයේ ඇති වූ විට එය නතර කරලීමට හෝ වළක්වා ගැනීමට ප්‍රතිකාරයක් සදහා භාවිතා කරන දෙයකි. එය රෝගියා විසින් හිතුමතේ භාවිත කරන දෙයක් නම් නොවේ. ඒ සඳහා යම්කිසි ප්‍රමිතියක් තිබිය යුතුය. ඖෂධ කෙනකුට ඕනෑ තරමට, වුවමනා වේලාවට ලබා දීමට නොහැක. රෝගයට අදාළව ඒ සඳහා නිසි ප්‍රමිතියක් තිබිය යුතුය. ඖෂධයක් යනු ඒ රෝග අවස්ථාවට අනුව සංස්කරණය කොට නිෂ්පාදනය කළ දෙයකි.

පුද්ගලයකුගේ ශරීරයට අභ්‍යන්තර හෝ බාහිරව ඖෂධ ලබා දිය හැක. නමුත් මෙහි ප්‍රතිඵලය ලබා දෙන්නේ ශරීරය තුළටය. ඖෂධයක ප්‍රධානම දේ වෙන්නේ මාත්‍රාවයි. ඖෂධ නිෂ්පාදන කරනා විධි කිහිපයකි. ශාඛවලින් සාදන ඖෂධ ආයුර්වේදයේ පවතී. එමෙන්ම පොළොවෙන් ගනු ලබන දේවල්වලින් ද ආයුර්වේදයේ ඖෂධ නිෂ්පාදනය කෙරේ. නමුත් ඒවායේ විෂ නිසියාකාරව නැති කොට නිසි ප්‍රමිතියකට අනුව නිෂ්පාදනය වේ.

එමෙන්ම සත්ව කොටස් ද ඖෂධ සඳහා භාවිත කෙරේ. විශේෂයෙන් මී පැණි, ඇතැම් සතුන්ගේ බඩවැල් වැනි කොටස්වලින් ද, කුකුලාගේ කරමල යොදා ගනිමින් අයුර්වේද තෙල් නිෂ්පාදනය ද කෙරේ. මෙවැනි ස්වභාවික දේ විවිධාකාර සංස්කරණවලට ලක්කොට  ආයුර්වේද ඖෂධ නිෂ්පාදනය කෙරේ. එම ඖෂධයේ මාත්‍රාව පිළිබඳව  සැලකිලිමත් වීම ඉතා වැදගත් වේ.

රෝගියාට දෙනු ලබන ඖෂධ මාත්‍රාව විවිධ කරුණු මත වෙනස් වේ. විශේෂයෙන් වයස අනුව දෙනු ලබන මාත්‍රාව ද වෙනස් වේ. වැඩිහිටියන්ට ලබාදෙන ඖෂධ ප්‍රමාණයම කුඩා දරුවාට දිය නොහැක. ස්ත්‍රී, පුරුෂභාවය අනුව ද ඇතැම් ඖෂධවල ම්‍රත්‍රාව වෙනස් වේ. කාය ශක්තිය අනුව ද මෙම මාත්‍රාව වෙනස් වේ. 

ආයුර්වේදය ඖෂධ ගැනීමේදී පාවිච්චියට ගත යුතු කාලය පිළිබඳවද රෝගියා අවධානය යොමු කළ යුතුය. ඖෂධය දීර්ඝ කාලයක් හිතුමතේට පාවිච්චි කළ නොහැක. ආහාරයක් මෙන් මෙය පාවිච්චි කළ නොහැක. ඒ සඳහා ඒ පවතින රෝග අවස්ථාන නිම වනතුරු පමණක් ගැනීම කළ යුතුය. එසේ නොමැතිව මෙම ඖෂධ දිගින් දිගටම හිතුමතේට ගන්නා විට වෙනත් රෝග තත්ත්වයන්වලට මුහුණ දීමට සිදුවිය හැක. එය තීරණය කළ යුත්තේ රෝගියා නොව රෝගයට ප්‍රතිකාර ලබාදෙන වෛද්‍යවරයා විසිනි.
ආයුර්වේදයට අනුව රෝගියාට විවිධ ක්‍රම මගින් ඖෂධ ලබා දේ. චූර්ණ, ගුලි, කල්ක, ද්‍රව, අරිෂ්ඨ, ආසව යන ආකාරයටත් ඖෂධ ලබා දිය හැක. ඇතැම් ඖෂධ රෝගියාගේ දිවෙහි ආලේප කිරීමෙන් ප්‍රතිකාර ලෙස ලබා දේ. එමෙන්ම තෙල් ආලේපනය ද ආයුර්වේදයේ ඖෂධ ලෙසින් හැඳින්විය හැක. මේවා රෝග සහ රෝග අවස්ථාවන් අනුව වෙනස් වේ. ඇතැම් රෝග සඳහා ඖෂධ බාහිරව ද ඇතැම් රෝග සඳහා අභ්‍යන්තරව ද ලබා දේ. මේ අතර බොහෝ රෝග සඳහා බාහිරව සහ අභ්‍යන්තරව ලබා දීමය සිදු කෙරේ.

ආයුර්වේද ඖෂධවල ගුණාත්මකභාවය ද වෙනස් වේ. ඇතැම් ඖෂධවල මද්‍යසාර ද අඩංගු වේ. නමුත් එය ඖෂධවලට එකතු කිරීමකින් තොරව සංස්කරණය කිරීමේදී නිෂ්පාදනය වේ. අරිෂ්ඨ වැනි වර්ගවල නිෂ්පාදනය කරන විටම මද්‍යසාර ද නිෂ්පාදනය වේ. මේ නිසා එවැනි ඖෂධ හිතුමතේට ගැනීම අති භයානකය. නමුත් මේ ඖෂධ දිය යුතු රෝගය සහ දිය යුතු ප්‍රමාණය පිළිබඳව අවබෝධයක් සහ දැනුමක් වෛද්‍යවරයා සතුව පවතී. මෙම ඖෂධ සමඟ ලබා නොදිය යුතු ඖෂධ ද ඇත. ඒ පිළිබඳව අවබෝධයක් ආයුර්වේද වෛද්‍යවරයා සතුව පවතී.

ආයුර්වේදයේ විරුද්ධ ආහාර හා විරුද්ධ ඖෂධ ලෙසින් හඳුන්වන කොටසක් ද පවතී. එහිදී එක ආහාරයක් සමඟ තවත් ආහාරයක් ගත්විට එය ප්‍රතික්‍රියා කොට ශරීරයට හානියක් වීමටද පුළුවනි. උදාහරණයක් ලෙස ආයුර්වේදයේදී මෙලෙස ප්‍රතික්‍රියා කරන අවස්ථා ඇත. ඒ පිළිබඳව නිසි අවබෝධය ඇත්තේ වෛද්‍යවරයා සතුය.

වර්තමානයේදී බොහෝ දෙනා හිතුමතේට ආයුර්වේද ඖෂධ ගැනීමට පුරුදුව සිටිති. එමඟින් ඇතැම්විට අක්මාව නරක්වීම, වකුගඩු නරක් වීම සිදුවිය හැක. නමුත් එලෙස සිදුවන්නේ ඖෂධවල වැරැද්දකින් නොව එම ඖෂධ වැරදි ලෙස ගැනීම හේතුවෙනි. ඖෂධ කිසිම කෙනකුට හිතුමතේට ගත නොහැක. අරිෂ්ඨ වැනි ඖෂධ අදාළ නොවන රෝගයකට දිගු කාලයක් ගැනීමෙන් අක්මාව නරක් වීමට ද පුළුවනි. ඇතැම් ඖෂධ අනවශ්‍ය ලෙස දිගු කාලයක් ගැනීමෙන් වකුගඩු නරක් වීමටද හැකිය. මේ නිසා ආයුර්වේදයේ ඖෂධයක් ගැනීමේදී අනිවාර්යයෙන්ම ඒ පිළිබඳව දැනුම ඇති වෛද්‍යවරයකුගෙන් උපදෙස් මත ලබා ගැනීමට අමතක නොකළ යුතුය.

අපි හැම දෙනාම එදිනෙදා ජීවිතයේ එක්තරා මට්ටමකට මානසික ආතතියට ගොදුරු වෙනවා. කිසිවකුට සම්පූර්ණයෙන්ම ආතතියෙන් ගැලවිය නොහැක. මානසික ආතතිය එක්තරා මට්ටමකට අපගේ ජීවිතය සාර්ථක කර ගැනීමට උදව් වේ.

උදා :- ඔබ විභාගයට මුහුණ දීම මොහොතකට සිතා බලන්න. විභාග දිනය ළංවූ විට ඔබට පොඩි බයක් වගේම අපහසුතාවයක් ඇති වෙන්නත් පුළුවන්. හිසේ බර ගතිය, මාංශපේශීන්ගේ තද ගතිය, උගුර කට වේලීම, නින්දේ ඇතිවන ගැටලු සමඟ ඔබගේ මනස තුළ ලොකු අවදි වීමක් දකින්න පුළුවන්. මේ බයත් සමඟම විභාගයට යන ඔබ ඉතා සාර්ථකව විභාගයට මුහුණ දී සමත් වෙන්නත් පුළුවන්. ඉහත කතාවෙන් දැක්වෙන්නේ ආතතියේ ඇති ප්‍රයෝජනවත් කොටසයි.

නමුත් අපි අසාමාන්‍ය ආතතියට ගොදුරු වූ විට ඇතිවන මානසික රෝගී තත්ත්වයක් පිළිබඳ විමසා බලමු.

මෙම රෝගී තත්ත්වයට පැනික් ඩිසෝඩර් (Panic Disorder) කියලා කියනවා. මෙම රෝගය දරුණු හෘදයාබාධයක ලක්ෂණවලට සමාන මානසික හා ශාරීරික ලක්ෂණ ඇති කරනවා. මෙයට ගොදුරු වන රෝගියෙක් හිතන්නේ ඔහුට හෝ ඇයට දරුණු හෘදයාබාධයක් (Heart Attack) හැදීගෙන එනවා කියලා. මෙම පැනික් ඩිසෝඩර් නැමති තත්ත්වය හඳුනාගැනීමට පහත සඳහන් ලක්ෂණ උපකාරී වේ.

 තදබල ලෙස පපුවේ තදවීම හෝ රිදීම. (Chest pain)

 පපුවේ ගැස්ම හෝ හෘදයවස්තුවේ වේගවත් ස්පන්දනය. (Palpable Heart pulsations)

 අධික ලෙස දහඩිය දැමීම. (Profuse Sweating)

 ශරීරය  වෙව්ලීම. (Tremors) 

 හුස්ම හිරවීම. (Suffocating Feelings)

 අත් පාවල ඇතිවන හිරිවැටීම. (Numbness or tinseling)

 කරකැවිල්ල හා ක්ලාන්ත ගතිය. (Dizziness or vertigo) 

 ක්ෂණිකවම තම වටපිටාව හඳුනාගත නොහැකි වීම හෝ තමාගේ ශරීරය මනසින් ඈත් වූවා සේ දැනීම. (Detachment frame oneself or reality) 

තමා මරණයට පත් වේ යැයි හෝ පිස්සු වැටේ යැයි යන භීතිය. (Warries about death panic) නැමති මේ තත්ත්වයට ගොදුරු වන රෝගියකු එය නැවත තමාට සෑදේ යැයි යන භීතියෙන් පසුවේ.

Panic හෙවත් අසාමාන්‍ය ආතතිය ඇතිවීමට මනෝ විද්‍යාත්මක හේතු.

 වගකීම් දරා ගැනීමට නොහැකි වීම. (Increased work responsibilities) 

යම්කිසි පුද්ගලයකුට තමාගේ රැකියාව හෝ තමා යෙදෙන මොන යම් කාර්යයක හෝ තිබෙන වැඩ ප්‍රමාණය දරා ගැනීමට නොහැකි තරම් වැඩි වූ අවස්ථාවක මෙවැනි භීතියකට ගොදුරු විය හැකියි.

උදා :- නිමල් ළඟදී පත්වීම ලැබූ ගණකාධිකාරීවරයෙකි. ඔහුට රුකියාව ලැබී මාස තුනකි. තමාට ලැබෙන වැඩ ප්‍රමාණය අවසන් කර ගැනීමට නොහැකි වේයැයි යන භීතියෙන් ඔහු නිතරම තැති ගැන්වීමෙන් සිටියේය. දිනක් කාර්යාලයේ සිටින විටදී හිටි හැටියේම නිමල්ට හුස්ම ගැනීමට අපහසු විය. වේගයෙන් කෙටි හුස්ම ගන්නට විය. අධික ලෙස දාඩිය දැම්මේය. ඔහු මරණ භයෙන් මෙන් කෑගැසුවේය. ළඟම තියෙන රෝහලට ඇතුළු කළ විට ක්ෂණික ප්‍රතිකාරවලින් ඔහු සාමාන්‍ය තත්ත්වයට පැමිණියේය. සියලු පරීක්ෂණ කළත් කිසිම රෝගයක් සොයාගත නොහැකි විය. නිමල්ට ඇතිවූ මේ භීතිය මෙසේ ඔහු පැවසුවාය. 

මම ඉන්නේ නිතරම බයෙන්. මට ඔෆිස් එකේ දෙන වැඩ ටික කරගන්න බැරි වෙයිද කියලා මට බයක් දැනෙනවා.

 අසාමාන්‍ය ලෙස තරහා යෑම

(Difficulty foliating anger)

අසාමාන්‍ය ලෙස තරහා යන පුද්ගලයකුට එය පාලනය කරගත නොහැකි වූ විට අසාමාන්‍ය ආතතියෙන් කෙළවර විය හැකිය. පහත පුංචි කතාවෙන් අපි එය බලමු.

සුනිල් ව්‍යාපාරිකයෙකි. ඔහුට දරුවන් දෙදෙනෙකි. ඔහුට තිබූ එකම අඩුපාඩුව අසාමාන්‍ය ලෙස තරහා යෑමයි. සුනිල්ගේ බිරිඳ මෙසේ එය විස්තර කළාය.

මගේ සැමියා හරිම හොඳයි. නමුත් ඔහුට තරහා ගියාම පාලනය කරගන්න බැහැ. තරහත් සමඟ හිටි හැටියේම හුස්ම  හිර වෙනවා. වේගයෙන් කෙටි හුස්ම ගන්නවා. දවසක් මෙහෙම තරහා ගිහින් කලන්තේ හැදිලා වැටුණා. රෝහලට ගිහින් ඇඩ්මිට් කරා. ව්‍යෛවරැ කීවේ වෙනත් කිසිම අසනීපයක් නැහැ කියලා.

 හැඟීම් අතර අතරමං වීම

(A Chronic sense of feeling)

තමාගේ හැඟීම් පිළිනොගැනීම හෝ දැඩි මානසික කම්පනයකට ගොදුරැ වීම නිසා යම් කෙනකු ක්ෂණිකව පැනික් නැමති තත්ත්වයට ගොදුරු විය හැකියි. අපි පුංචි කතාවකින් බලමු.

නයෝමි විවාහ වී දරුවන් දෙදෙනක් සිටී. ඉන් එක් දරුවෙන් ඩවුන්ස් (Downs) නැමති රෝගයෙන් පෙළේ. නයෝමිගේ පියා මෙම රෝගී දරුවාට කිසිම ඇල්මක් දැක්වූයේ නැත. ගෙදරින් පිට ගමනක් යනවිටත් එම දරුවා ගෙදර තබා අනෙක් දරුවාව රැගෙන යාමට පියා කැමති විය. නමුත් නයෝමි දරුවන් දෙදෙනාටම එක සේ ආදරය කළේය. පියාගේ මෙම හැසිරීම නයෝමි දැඩි ලෙස ප්‍රතික්ෂේප කළ අතර මෙම ප්‍රශ්නය විසඳාගත නොහැකිව ඇය ලෝක දෙකක අතරමං විය. ඇය දැඩි මානසික පීඩනයකට ගොදුරු විය. ඇය හිටි හැටියේම පපුව තද වී හුස්ම ගැනීමට අපහසු වී හුස්ම හිර වී ඇද වැටුණු අවස්ථා එමටය. ඇයව හෘද රෝග විශේෂඥයන් දෙදෙනකුටම පෙන්වීය. කිසිම හෘද රෝග ලක්ෂණයක් සොයාගත නොහැකි විය. අවසානයේ වෛද්‍යවරු තීරණය කළේ පියා තම දරුවාට දක්වන අකමැත්ත නිසා ඇති වූ දැඩි පීඩනයෙන් පැනික් නැමති තත්ත්වයට පත් වී ඇති බවයි.

 දෙමාපියන්ගේ දැඩි පාලනයට දරුවකු හසුවීම.

(Perception of parents on controlling, critical)

දෙමාපියන්ගේ දැඩි පාලනයට දරුවකු ගොදුරු වීම, දරුවාගේ නිදහස නැති වීම නිසා එවැනි දරුවකු පැනික් නැමති තත්ත්වයට ගොදුරු විය හැකි බව පරීක්ෂණවලින් පෙන්වා දී ඇත. අපි පුංචි කතාවකින් මෙය බලමු.

මධුරංගගේ වයස අවු. 10යි. ශිෂ්‍යත්ව විභාගයට තිබුණේ තව මාස 8කි. මධුරංග අතිශයින්ම ක්‍රියාශ්‍රීලි, කෙලිලොල්, ක්‍රීඩාවට ලැදි වූ දරුවෙකි. ඔහු බැඩ්මින්ටන් සහ පිහිනීම වැනි ක්‍රීඩාවල යෙදුණේ හරිම ආශාවෙනි. ළඟ එන ශිෂ්‍යත්වය සමඟ මධුරංගගේ දින චර්යාව සම්පූර්ණයෙන් වෙනස් විය. පියාගේ දැඩි බලපෑම සමඟ බැඩ්මින්ටන් සහ පිහිනීම නැවැත්වීමට සිදුවිය. හවස් වනතුරුම පාසලේ පංති තිබුණි. මධුරංගට ශිෂ්‍යත්ව විභාගයද එපා විය. නිතර තරහා යාමටත් පටන් ගැනුණි. හිටිහැටියේම කලන්තයක් හැදී මධුරංග බිම වැටෙන්නනට පටන් ගත්තේය. ඔහුගේ පියා එම කලන්තය ගැන මෙසේ විස්තර කළේය.

එකපාරටම වේගයෙන් හුස්ම ගන්නවා. අත පය සීතල වෙනවා. එතකොටම පපුව රිදෙනවා කියලා කෑ ගහනවා. ඇඟ පුරා දාඩිය දානවා. එතකොට කලන්තේ හැදෙනවා. විනාඩි 10කට වැඩිය මෙහෙම තියෙන්නෑ. වෛද්‍යවරැ කියනවා කිසිම අසනීපයක් නැහැ කියලා. දැන් අපි දන්නවා දරුවාට තියෙන්නේ පැනික් නැමති අසනීපය කියලා.

පැනික් හෙවත් අසාමාන්‍ය භීතියට වෙනත් හේතු

 අසාමාන්‍ය භීතිය හෙවත් කැළඹීමට ස්ථිරවම හේතුව තවමත් තහවුරු වී නැත. නමුත් සොයාගැනීම්වලින් පහත සඳහන් හේතු ද එකතු කළ හැකිය. 

 දිගටම දුම්පානය කරන කෙනකු පසුකාලයේදී මෙම පැනික් තත්ත්වයට ගොදුරැ විය හැකිය.

 ළමා කාලයේ අපයෝජනයට ලක්වන දරුවන් පසු කාලයේදී පැනික් නැමති තත්ත්වයට ගොදුරු විය හැක.

 ජානමය සම්බන්ධතාවයන් පවතින බවද සමහර සමීක්ෂණවලින් තහවුරු වී ඇත. මෙහිදී ප්‍රධාන ජාන වර්ග දෙකක් හඳුනාගෙන ඇත. (ADORA2A සහ ComT ජාන)

 වේගයෙන් හුස්ම ගැනීමේදී කාබන්ඩයොක්සයිඩ් (Co2) මොළය තුළ වෙනස් වීමද මෙම රෝගයට හේතුවක් ලෙස තහවුරු වී ඇත.

 මොළයේ ගැඹුරින් පිහිටි ඇමිග්ඩෙලා (Amygdala) නැමති ඉතා කුඩා සංවේදී ඉන්ද්‍රිය අපේ භය සහ හැඟීම් පාලනය කරයි. මෙම මධ්‍යස්ථානය වැරදි ලෙස බාහිර සංවේදනයන් හඳුනාගැනීම ද මෙම භීතියට එක් හේතුවක් ලෙස පෙන්වා දෙයි.

කිරිබත්ගොඩ මූලික රෝහලේ 
මනෝ වෛද්‍ය නයනානන්ද කුමාරනායක

දාඩිය දාන එක සාමාන්‍ය තත්ත්වයක් බව සැබෑවකි. අපගේ ශරීරය සිසිල් කරමින් ශාරීරික උෂ්ණත්වය නිසිලෙස පවත්වාගෙන යෑම සඳහා එය සුවිශේෂී කාර්යභාරයක් ඉටු කරයි. පරිසරයේ උෂ්ණත්වය ඉහළ යන විට දහඩිය දමන්නේ එම නිසයි. නමුත් දහඩිය දැමීම සඳහා හේතුවෙන එකම සාධකය උෂ්ණත්වය පමණක්ම නොවෙයි. ව්‍යයාමවලින් පසුව වගේම අපි කලබලයට පත්වූ විට ඇතිවෙන චිත්තවේගවල බලපෑම නිසාද දහඩිය ග්‍රන්ථි විසින් දහඩිය පිට කරනවා.

නමුත් මේ කියන ස්වභාවික හේතු නිසා නොවී අසාමාන්‍ය ලෙස දහඩිය පිටවෙනවානම්, එය පිටුපස නිදන්ගත රෝගයක්  තිබෙන්නට පුළුවනි. එබඳු රෝග කිහිපයක් තමා මේ. 

තයිරොයිඩ් ග්‍රන්ථීයේ දෝෂයක්

තයිරොයිඩ් ග්‍රන්ථියේ වැඩිපුර හෝමෝන නිපදවන විට නොනවත්වාම දහඩිය දමනවා. එම නිසා අධික ලෙස දහඩිය දැමීම අධි තයිරොයිඩතාවයේ ලක්ෂණයක් වෙන්නට පුළුවන්. ඒ වගේම අධි තයිරොයිඩතාවය හේතුවෙන් බර අඩුවීම සහ හෘද ස්පන්දනය ශීඝ්‍ර වීමක් ද සිදුවෙනවා.

ඖෂධ

විශාද නාශක ඖෂධ හේතුවෙන් ආතති හෝමෝන මට්ටම ඉහළ යනවා. එම නිසා එහි අතුරැ ප්‍රතිපලයක් ලෙස අධික ලෙස දහඩිය දමන්නට පුළුවන්. ඊට අමතරව රුධිර පීඩනය විදිමත් කිරීම සඳහා ලබාගන්නා ඖෂධ මෙන්ම, සෙම්ප්‍රතිශ්‍යාව සඳහා ලබාගන්නා ඖෂධ නිසා ද අධික ලෙස දහඩිය දැමීමේ හැකියාවක් තිබෙනවා.

පුරුෂ හොමෝන අඩුවීම

අඩු ටෙස්ටෙස්ටරෝන් හෝමෝන මට්ටමක් ඇති පිරිමින්ට රාත්‍රී කාලයේදී වැඩිපුර දහඩිය දැමීමේ ප්‍රවණතාවයක් තිබෙනවා. ටෙස්ටෙස්ටරෝන් මට්ටම අඩුවූ විට, ශරීරය ඕනෑවටත් වඩා රත්වී ඇති බව පවසන ව්‍යාජ සංඥා හයිපෝතැලමසට ලැබෙනවා. පසුව ඊට දක්වන ප්‍රතිචාරයක් ලෙස ශරීරය විසින් දහඩිය පිට කරනවා.

සීනි අඩුවීම

රුධිර සීනි මට්ටම අඩුවීමේ ලක්ෂණයක් ලෙසද අධික ලෙස දහඩිය දමන්නට පුළුවන්. ආහාර වේල් මගහරින විට, රැධිරයේ ඇති ග්ලුකෝස් මට්ටම අඩුවෙනවා. එවිට ශරීරය විසින් ආරක්ෂාකාරී පියවරක් ලෙස ඇඩ්රිනලින් හෝමෝනය නිදහස් කරන අතර එම නිසා වැඩිපුර දහඩිය දැමීමක් සිදුවෙනවා.

හෘදයාබාධ

හෘදයාබාධයක් පිළිබඳව අනතුරැ අගවා සිටින ලක්ෂණයක් ලෙස අධික ලෙස දහඩිය දැමීම සහ හිස කරකැවිල්ල ඇතිවිය හැකිය. ඊට අමතරව ව්‍යායාම කිරීමෙන් හෝ ඇවිදීම වැනි වෙහෙස දෙන ක්‍රියාවකින් පසවත් පපුවේ වේදනාවක් ද ඇතිවෙන්නට පුළුවන්. හුස්ම ගැනීමට අපහසුවීම, හකුපාඩා, බාහු සහ පසු පස ප්‍රදේශය දක්වා පැතිරී යන පපුවේ වේදනාව ඒ හා සම්බන්ධ වී පවතින අනෙකුත් ලක්ෂණයි.

හෘදයාබාධයක් ඇති විට හෘද ස්පන්දනයේ සහ රැධිර පීඩනයේ තීව්‍ර අඩුවීමක් සිදුවෙනවා. ඊට දක්වන ප්‍රතිචාරයක් ලෙස තමයි ශරීරයෙන් අධික ලෙස දහඩිය පිටවන්නේ.

- Web Mob