වකුගඩු රෝගය කල්යත්ම උත්සන්න  වීමෙන් රෝගී පුද්ගලයා මුහුණපාන ප්‍රධාන ගැටලු රැසකි.

ඒ අතරින් රෝගී පුද්ගලයාගේ වකුගඩුවෙන් නියමිත ආකාරයට අපද්‍රව්‍ය ඉවත් නොවීම හේතුවෙන් මුත්‍ර නිපදවෙන ප්‍රමාණය අඩුවේ. කාලීන වකුගඩු අකරණිය උග්‍ර අතට පත් වූ විට රෝගියාට කුමන හෝ ක්‍රමයකින් රුධිරය පිරිසුදු කිරීම අත්‍යවශ්‍ය වන්නේ එබැවිනි. නොඑසේනම් අපද්‍රව්‍ය ඇතැම් ලවණ වර්ග සහ රුධිරයේ ආම්ලිකතාව ඉහළ යෑමෙන් ශරීරයේ සමතුලිතතාවට බාධා පමුණුවා ජීවිතය අනතුරුදායක තලයකට ගෙන යාමට ඇති අවකාසය නිසයි.

වකුගඩු රෝගීන්ගේ රුධිරය පිරිසුදු කිරීම සඳහා වර්තමානයේදී ලොව සෙසු රටවලත් ප්‍රධාන ක්‍රම 02ක් භාවිත නෙරේ. එනම් රුධිර කාන්දුකරණය ( hemodialysis ) සහ  පෙරිටෝනියල් ඩයලිසිස් ( peritoneal dialysis ) හෙවත් පරිතාන කුහරය හරහා කෙරෙන රුධිර පිරිසුදු කිරීමයි.

අපගේ උදර කුහරය වට කරමින් ඇති පටලයක් වන පරිතාන පටලය ආධාරයෙන් වකුගඩු අකර්මණ්‍යතාවකදී රුධිරය පිරිසුදු කිරීමේ ක්‍රමය පෙරිටෝනියල් ඩයලිසිස් නමින් හැඳින්වේ. විශේෂයෙන් නිෂ්පාදනය කරන ලද තරලයක් උදර කුහරයට ඇතුළු කර පරිතාන පටලයේ ඇති රුධිර නාල ඔස්සේ සිදුවන අපද්‍රව්‍ය හුවමාරුවෙන් රුධිරය පිරිසුදු කරනු ලැබේ.  

මෙහිදී උදර කුහරයට තරලය ඇතුළු කිරීමට නළයක් අවශ්‍ය වේ. උදර කුහරයට නළය ඇතුළු කිරීම සඳහා කුඩා සැත්කමක් කළ යුතු අතර එයාකාරයෙන්ම මෙය එහි රඳවා තබා ගැනුමට පුළුවන. සාමාන්‍යයෙන් සැත්කමින් සති 4ක් 6ක් අතර කාලයකින් නළය උදර කුහරයේ බිත්තිවලට සවිවේ. රුධිරය පිරිසුදු කිරීම ඇරැඹෙන්නේ ඉන් පසුවයි. ඉහත දැක්වූ කාලයට ප්‍රථමයෙන් නළය භාවිත කළොත් සිදු වන්නේ තරලය උදර කුහරයෙන් එළියට කාන්දු වීමයි.

නළය භාවිත කළ හැකි අවස්ථාවේ  පටන් රෝගියාට නිවසේදීම මෙය ආධාරයෙන් උදර කුහරයට තරලය ඇතුළු කිරීම, ඉවත් කිරීම මගින් රුධිරය පිරිසුදු කර ගත හැකි වේ.

මුලින්ම මෙම ක්‍රමය සම්බන්ධයෙන් රෝගියාටත්. ඔහුගේ පවුලේ පුද්ගලයකුටත් අවශ්‍ය කෙරෙන පුහුණුව ලබාදේ. මෙයාකාරයෙන් දිනකට 04 වතාවක් හෝ 05 වතාවක් මෙම හුවමාරුව සිදුවේ.

වඩාත් සුදුසු නුසුදුසු රෝගීන් කවුරුන්ද?

පෙරිටෝනියල් ඩයලිසිස් සඳහා වඩාත් සුදුසු වන්නේ විවිධ රෝගාබාධ නිසා hemodialysis ප්‍රතිකාර ක්‍රමයට නුසුදුසු වන අයයි. උදාහරණයක් ලෙස හෘද වස්තුවේ දුර්වලතා ඇති පුද්ගලයන් සඳහන් කළ හැකියි. එහෙත් ඕනෑම කෙනෙකුට මෙම ප්‍රතිකාර ක්‍රමය භාවිත කිරීමේ ගැටලුවක් නැත.

එහෙත් අප විශේෂයෙන් මතක තබා ගත යුතු පුද්ගලයෝද වෙති. එනම් උදර කුහරයේ ශල්‍යකර්මවලට භාජනය වූවන්, බඩවැල - මුත්‍ර මාර්ගය උදර කුහරය හරහා අපද්‍රව්‍ය ඉවත් කිරීමේ ශල්‍යකර්මවලට භාජනය වූවන් , ඉතා ස්ථුල පුද්ගලයන් සහ ශාරීරික දුර්වලතා හේතුවෙන් ඉහත සඳහන් කළ තරලය ඇතුළු කිරීම , ඉවත් කිරීම තමන්ට කර ගැනීමට අපහසු අයයි.

එක්සත් රාජධානියේ ඩම්ෆ්‍රීස් සහ ගැලොවේ ජාතික වෛද්‍ය සේවයේ වකුගඩු සහ වකුගඩු රෝග පිළිබඳ විශේෂඥ වෛද්‍ය නදීකා රත්නමලල

- සටහන - මාධවී ධර්මරත්න

උපුටා ගැනිම -ලංකාදීප වෙබ්පුවතින්

මොකක්ද මේ ධාතු ලෙඩේ

මුත්‍රා සමඟ ධාතු පිටවෙනවා කියන කතාව තරුණ වියේ බොහෝ දෙනා තුළ ඇතිවන අනියත භීතිකාවක් ඇතිකර ඇති තවත් ලිංගික මිත්‍යාවකි. විශේෂඥ වෛද්‍ය ආරියසේන යූ. ගමගේ පෙන්වා දෙන්නේ මුත්‍රා සමඟ ධාතු පිටවීමක් සිදු නොවන අතර එහෙම රෝගයක් ගැන නවීන වෛද්‍ය විද්‍යාව තුළ කොහේවත් සඳහන්ව නැති බවය. මෙය මුළුමනින්ම මිථ්‍යාවක් වන අතරම බඩ වඩා ගන්නට සිතා බොරු අදහස් පතුරවන පිරිසකගේ තවත් උප්පරවැට්ටියකි. 

වෛද්‍ය ආරියසේන යූ. ගමගේ පෙන්වා දෙන්නේ සාමාන්‍ය නිරෝගී අයකුගේ මුත්‍රා අවර්ණ බවය. පැහැදිලි ජලය බඳුය. ඒ වුණත් ජලය අඩුවෙන් පානය කළ විට එහෙම නැත්නම් සමහර ආහාර පාන ඖෂධ ලබාගත් විට ඒවාගේ ඇති වර්ණක නිසා මුත්‍රා වල වර්ණය වෙනස් වන්නට හැකිය. නිදසුනක් හැටියට බීට්රූට් කෑ විට මුත්‍රා වල රතු වර්ණයක් ඇතිවෙයි. විටමින් බී සිරප් හෝ පෙති පානය කළ විට අමතර ප්‍රමාණය ජලය සමඟ දියවී පිටවී යන නිසා මුත්‍රා කහ පැහැයකට හැරෙයි. නමුත් මේ සියල්ල ස්වභාවික තත්ත්වයන්ය. 

එසේම ලිංගික සංසර්ගයට පසු එහෙමත් නැත්නම් ස්වයං වින්දනය හෝ ස්වප්න මෝචනයට ලක්වීමට පසු පිටවෙන ධාතු හෝ ශුක්‍රානු ඉතා ස්වල්පයක් රැඳී තිබිය හැකිය. මේ තත්ත්වයද ඉතාමත් ස්වභාවික බව විශේෂඥ වෛද්‍ය ආරියසේන යූ. ගමගේ කියයි. මේ කියන අන්දමේ මුත්‍රා සමඟ ධාතු පිටවෙන රෝගයක් කිසිසේත්ම දක්නට නැති බව පෙන්වා දෙන ඔහු සමහර ස්වභාවික කාරණා වරදවා වටහාගැනීමෙන් මේ මුත්‍රා සමඟ ධාතු පිටවෙන කතාවට තටු ලැබී ඇති බව පෙන්වා දෙයි. සමහරු මේ දේවල් රෝගී තත්ත්වයක් බව පෙන්වාදී මුදල් ගරති. 
නමුත් ඇත්ත මෙන්න.

මුත්‍රා පැහැදිලි වීදුරු භාජනයකට දමා ආලෝකයට අල්ලා බැලූ විට එහි වළාකුළු මෙන් ස්වභාවයක් පෙනෙනවා නම් එයට හේතුව ධාතු පිටවීම නොවේ. එයට හේතුව ප්‍රෝටින හෝ පොස්පේට් කාණ්ඩයට අයත් ලවණ සංයෝග හෝ රුධිරය සුළු ප්‍රමාණයක් ඉවත් වීම විය හැකිය. ප්‍රෝටින හෙවත් ඇල්බියුමින් පහවීමට හේතුව වකුගඩු රෝගී තත්ත්වයකි. නැතිව වෘෂණ තුළ ඇති ශුක්‍රාණු මුත්‍රාවලට එක්වීම නොවේ.
සමහර පිරිමින් මළ පහ කිරීම හෝ මුත්‍රා කිරීම සඳහා බිම ඉඳගත් විට මුත්‍රාශය හා ගුදය අතර පුරස්ථි ග්‍රන්ථිය සහ ශුක්‍ර ආශයිකා තෙරපීම නිසා කලාතුරකින් ශුක්‍රානු ස්වල්පයක් මුත්‍රා කිරීමට පෙර ගලා ඒමට හැකිය. එය දකින අය තමන්ට ධාතු පිටවෙනවා යැයි බියට පත්වෙති. හිතෙන් ලෙඩ වෙති. ඈලි මෑලි ගතිය සිරැර කෙට්ටු වීම උදෙසා එය හේතුවක් යැයි සිතා ඇතැම් විට කාංසාවට, මානසික අවපීඩනයට පවා ගොදුරැ වෙති. ඇත්තෙන්ම මෙබඳු රෝගයක් ගැන ප්‍රසිද්ධ කර ඇත්තේ එමගින් මුදල් ගරන ජාවාරම් කාරයන්ය.

♦ උපදෙස් විශේෂඥ වෛද්‍ය ආරියසේන යූ. ගමගේ

උපුටා ගත්තේ - දේශය වෙබ් පුවතින්

පුටු රත්කරන්නන්ට ලෙඩ ගොඩාක්

අපි කුමන හෝ කාර්යයක එක දිගටම නිරත වෙනවානම් එයින් සුළු හෝ අපහසු බවක් අත්විඳිනවා. පාසලේදී, කාර්යාලයේදී, නිවසේදී ප්‍රමාණය ඉක්මවා වාඩි වී සිටින්න අපි යොමු වී තිබුණත් ඒ තුළින් ඇතිවන බලපෑම් නිසා අපගේ රුධිර නහරවලට සිදුවන ගැටලුකාරී තත්ත්වයන් කීපයක් තිබෙනවා. ඒ තුළින් රුධිර සංසරණය ප්‍රමාද වීමත්, නහර හැකිළීමත් සිදුවෙනවා. තවත් අතුරු ආබාධ රැසකුත් ඇතිවෙනවා. මොනවද ඒ අතුරු ආබාධ.

දෙපාවල ආබාධ
දිගින් දිගටම වාඩි වී සිටීම තුළින් වළලු කර ඉදිමීම මෙන්ම නහර ඉදිමුමද ඇති විය හැකියි. නමුත් ඊට අමතරව මෙම තත්ත්වය නිසා ලේ නහරවල ලේ කැටිගැසීමද සිදුවෙනවා.

අස්ථිවල දුර්වලතා
නොකඩවා ක්‍රියාකාරකම් හෙවත් කාර්යයන්වල අඩු වශයෙන් නිරත වීමෙන් ඔස්ටියෝපොරොසිස් තත්ත්වය හටගැනීමේ ප්‍රවණතාවන් තිබෙනවා. ඒ තුළින් සිදුවන්නේ අස්ථි බිඳ වැටීමයි.

පසු ප්‍රදේශයන්හි වේදනා
සිටගෙන සිටිනවාට වඩා ඉඳගෙන සිටීම තුළින් කශේරුකාවට ඇතිවන බලපෑම වැඩි බව සොයාගෙන තිබෙනවා. මෙසේ දිගින් දිගටම වාඩිවී සිටීම තුළින් පිටුපස අස්ථිවල සන්ධි බිඳවැටීමේ අවදානමට ලක්වීම සිදුවෙනවා.

බෙල්ල සහ උරහිස ඇදීමට ලක්වීම
වාඩිවී සිටින අතරතුරදී බෙල්ල ඉදිරියට තබා ගැනීම නිසා ගෙල මෙන්ම කශේරුකාවද තුවාල වීම සිදුවෙනවා.

උකුල ආශ්‍රිත වේදනා
නිරන්තරයෙන් වාඩිවී සිටීමෙන් උකුල තද වීම මෙන්ම සංචලතාවට බාධා වීම්ද සිදුවෙනවා.

ආහාර ජීර්ණයේ ගැටලු
ආහාර අනුභව කිරීමෙන් පසුව වාඩිවී සිටීම හේතුවෙන් උදරය හැකිළීම මෙන්ම එමගින් ආහාර ජීර්ණයද ප්‍රමාද වෙනවා.

අග්න්‍යාශය ආශ්‍රිත ගැටලු
නොකඩවා ඉඳගෙන සිටීමෙන් ඉන්සියුලින් නිපදවීමේ සමබර බව නැතිවෙනවා. මේ නිසා එය දියවැඩියාව ඇතිවීමට බලපානවා.

හදවතට සිදුවන හානිකර බව
අඩු රුධිර සංසරණය නිසා මාංශපේශීන්වලින් මේදය දහනය අඩුවීම මෙන්ම, ධමනිවල මේද අම්ල අවහිර වීමද නිතරම වාඩිවී සිටීම මගින් සිදුවෙනවා.

මොළයේ ඇතිවන හානිකර තත්ත්වය
රුධිර සංසරණය අවම වීම නිසා මොළයට ඔක්සිජන් ළඟාවීමද අඩු වෙනවා. මෙසේ ප්‍රමාද වීම නිසා එහි ක්‍රියාකාරිත්වය සහ හෝමෝන ස්‍රාවයන් අසමබර වීමට ද එය හේතු වෙයි.

උපුටා ගත්තේ - දේශය වෙබ් පුවතින්

Posted By chamaramind on 24 Apr 2017 06:39 PM

ඔබත් හතළිහ ආසන්නයේද
හතළිස්‌ ඇඳිරිය ගැන සැලකිලිමත් විය යුතු ඇයි
හතළිස්‌ ඇඳිරිය ගැන සුළුවෙන් හිතන්න එපා

අවුරුදු හතළිහ පිරිමියකුගේ දෙවන උපත ලෙස සලකනු ලැබේ. එහෙත් ගැහැනුන් අවුරුදු හතළිහ වනවාට කැමති වන්නේ නැත. අවුරුදු හතළිහට අඩුවෙන් වයසක ජීවත්වීමට ගැහැනුන්ගේ කැමැත්ත ඉහළය.

ඒ කෙසේ වූවද ස්‌වභාව ධර්මයට පිටුපෑමේ හැකියාවක්‌ අපට නැත. හතළිස්‌ ඇඳිරියට මුහුණ දිය යුතු වන්නේත් ඒ නිසාමය.

බොහෝ කාන්තාවන් වයස පෙනේ යෑයි සිතමින් හතළිස්‌ ඇඳිරිය නිසා ළඟ නොපෙණුනත් Bifocal කණ්‌ණාඩි දැමීමට අකමැත්තක්‌ දක්‌වයි. මේ කරුණු අනුව හතළිස ඇඳිරියට නිවැරදිව උපැස්‌ යුවළක්‌ තෝරා ගන්නේ කෙසේද කියා බලමු.

හතළිස්‌ ඇඳිරිය පිළිබඳ සමාජය තුළ පවතින කතා බහ හැමදාම එකම විදිහට අසන්නට ලැබෙයි. හතළිස්‌ ඇඳිරිය ගැන දැන දැනත් එය නොසලකා සිටින අයුරක්‌ සමාජයට දෙනෙක්‌ යොමු කිරීමේදී පෙනේ.

හතළිස්‌ ඇඳිරියේදී සිදුවන්නේ ළඟ සියුම් පෙනුම දුර්වල වීමකි. මෙම අවස්‌ථාව විවිධ පුද්ගලයන්ට විවිධාකාරයෙන් බලපායි.

එනම් ඇය ගෘහනියක්‌ නම් ඉදිකටුවට නූල දමා ගැනීමට නොහැකි වෙයි. ගෙදරට ගෙනෙන ලද සෝයාමීට්‌ පැකට්‌ටුවේ සාදන ක්‍රමය, කල් ඉකුත්වෙන දිනය බලා ගැනීමට බැරිව ලත වෙයි.

ගුරුවරයාට මෙතෙක්‌ කල් ඉතා පහසුවෙන් ලකුණු කළ නාම ලේඛනය ලකුණු කිරීම අපහසු වනවා සේම එක දිගට දරුවන්ගේ පොත් බැලීම අපහසු වෙයි. ඉතා අපහසුවෙන් පොත්ටික බැලුවද ඊට පසු පැය කිහිපයක්‌ යනතුරු හිසරදය ඇතිවෙයි. දුරපෙනුම ද්විත්ව (Double) වෙයි.

ගිණුම්කරණයේ රැකියාවල නියුතු අයට එක හැඩයට ඇති ඉලක්‌කම් මාරු වෙයි. වැඩ කටයුතුවල වේගය අඩුවෙයි. වැඩ කිරීමට මැලිකමක්‌ දැනෙයි.

බොහෝ දෙනා මෙම අවස්‌ථාවට බිය වන්නේ තමන්ව අන්ධභාවයට පත්වී ගෙන එනවාද යන සිතුවිල්ල සමඟිනි. ඒ නිසාම සිතෙහි අනවශ්‍ය කනස්‌සලු ගතියක්‌ ඇතිවෙයි.

හතළිස්‌ ඇඳිරිය නිසාවෙන් මෙවැනි අපහසුතා ඇති වෙයි නම් අපි මෙහි විද්‍යාත්මක තොරතුරු කෙසේදැයි බලමු.

මෙම සංසිද්ධිය සරල සාමාන්‍ය දෙයකි. අපේ ඇස තුළ අපිට පෙනුම ලබාදීමට අක්‍ෂි කාචයක්‌ ඇතිබව අපි දනිමු. මෙම අක්‍ෂි කාචයේ විශේෂත්වය වන්නේ අප බලන, බලන දුරට වක්‍රතාවය වෙනස්‌කර ගනිමින් ප්‍රතිබිම්බය දෘෂ්ඨි විතානය මත (ස්‌නායු සෛල ස්‌ථරය) නාභිගතකර ගත හැකිවීමයි.

නමුත් අවුරුදු හතළිහ පමණ වනවිට (අප වයසට යැමක්‌ සමඟ) කාචයේ මෙම නම්‍යශීලීභාවය ක්‍රමයෙන් අඩුවෙයි. එසේ අඩුවන විට ළඟ ඇති දෙයක්‌ දෙස බැලූ විට කාචයට වක්‍රතාවය වෙනස්‌ කරමින් ප්‍රතිබිම්බය දෘෂ්ඨි විතානය මත නාභිගතකර ගැනීමට නොහැකි වෙයි. එවිට ප්‍රතිබිම්බය දෘෂ්ඨි විතානය පසුකකරමින් පසුපසට යයි. ඒ නිසා අපට ළඟ පෙනුම අඩුවෙයි.

මෙහිදී අප සිදුකළ යුත්තේ පිටතින් බලයක්‌ යොදමින් පිටුපසට ගිය ප්‍රතිබිම්බය දෘෂ්ඨි විතානය මතට ලබාගැනීමයි. ඒ සඳහා අප කිරණ එකතුකරණ (Converge) උත්තල කාච (Plus lenses) පැළඳිය යුතුවෙයි.

මෙලෙස උත්තල කාච යුගලයක්‌ පැළඳීමෙන් ඉතා පහසුවෙන් මේ තත්ත්වයෙන් මිදීමට පුළුවන.

පුද්ගලයාගේ අවශ්‍යතාවය මත නිවැරදිව කාච වට්‌ටෝරුවක්‌ (Prescri ption) ලබාගන්නේ කෙසේද කියා බලමු.

මෙහිදී සඳහන්කළ යුතුව ඇත්තේ බොහෝදෙනා තවමත් හිතුමතේට තමන්ට කැමති පරිදි සාප්පුවකින් මිලදී ගෙන හෝ පදික වේදිකාවෙන් මිලදී ගෙන නැතිනම් යහළුවෙකගෙන් ඉල්ලා ගනිමින් තමන්ගේ අවශ්‍යතාවය පිරිමසා ගැනීම පිළිබඳවයි. මෙය ඉතාම වැරදි ක්‍රියාවකි.

පළමුව කළ යුත්තේ පෙනුම පිළිබඳ ගැටලුවක්‌ ඇති ඔබ අක්‍ෂි විශේෂඥ වෛද්‍යවරයකු හෝ පුහුණුවලත් දෘෂ්ඨි විශේඥවරයකු වෙත යොමු වීමයි. එහිදී ඔබව නිවැරදි දෘෂ්ඨි පරීක්‍ෂණයකට භාජනය කරනු ලබයි.

එවිට ඔබට අවශ්‍ය කාච වට්‌ටෝරුව (Prescription) ලැබෙනවාට අමතරව අනාගතයේදී තමාගේ පෙනුමට තර්ජනයක්‌ වියහැකි බොහෝ රෝගාබාධ හඳුනාගැනීමටද, නොදැන සිටි ශාරීරික රෝගාබාධ හඳුනාගැනීමටද අවස්‌ථාව සැලසෙනු ඇත.

දෙනෙත පරීක්‍ෂා කිරීමෙන් පසු නිවැරදි වට්‌ටෝරුව ලැබුණු පසු අපි අපගේ අවශ්‍යතාවයට සරිලන පරිදි එම වට්‌ටෝරුව ලබාගත යුතුය.

ගෘහනියක්‌ නම් පුවත්පතක්‌ බැලීමට, පුංචි මැහුම් වැඩක්‌කර ගැනීමට වැනි කාරණා සඳහා අවශ්‍යතාවය මුල්වේ නම්, සම්පූර්ණ උපැස්‌ යුවළ කියවීම සඳහා සාදා ගත්තාට වරදක්‌ නැත. (Reading glasses) නමුත් මතක තබාගත යුතු වන්නේ Reading glasses දමාගෙන දුර බැලීම නොකළ යුතු බවයි. Reading glasses මගින් දුර බැලූ විට ක්‍රමක්‍රමයෙන් දුර බැලීමට Reading glasses වට්‌ටෝරුව අවශ්‍ය වන තත්ත්වයට පත්වෙයි.

එසේවූ විට හොඳින් පෙණුනු දුර පෙනුමද තේරුමක්‌ නැතිව අඩුවී යයි. Reading glasses හරහා දුර බැලීම වැළැක්‌වීමට ක්‍රමවේදයක්‌ තිබේ. එනම් ඉසදෙජ්ක කණ්‌ණාඩිය පාවිච්චියට ගැනීමයි.

Bifocal කණ්‌ණාඩියක කියවීමට ඇති බලය ඇත්තේ ඇස්‌ කණ්‌ණාඩියේ පහළ කොටසෙහිය. ඉහළ කොටසේ ඒ සඳහා බලයක්‌ නැත. එම නිසා ඒ හරහා දුර බලන විට සිදුවන්නේ තමන්ගේ සාමාන්‍ය ඇසින් දුර බලනවා වැනි ක්‍රියාවලියකි.

Bifocal වලද වර්ග කිහිපයක්‌ ඇත. එම වර්ග පිළිබඳව දෘෂ්ඨි විශේෂඥවරයාගෙන් නොපැකිලිව විස්‌තර අසා දැනගෙන තමන්ට වඩාත්ම සුදුසු මාර්ගය තෝරාගත යුතුය.

Bifocal කාචයක්‌ හරහා පරිගණකයක්‌ බැලීමට අවශ්‍ය වූ විට බෙල්ල උස්‌ කරමින් ඇස්‌ කණ්‌ණාඩියේ යට Segment එක තුළින් පරිගණකය බැලිය යුතුය. මෙය දිගින් දිගටම පරිගණක භාවිත කරන අයට ඉතාමත්ම පීඩාකාරී තත්ත්වයකි. එලෙස කාලයක්‌ බැලූවිට එය බෙල්ලේ ඇති මාංශ පේශීන්ට බලපා ප්‍රතිකාර කළ යුතු තත්ත්වයකට පත්විය හැක.

එමනිසා පරිගණක භාවිත කරන අයට Bifocal කණ්‌ණාඩියක්‌ නුසුදුසුය. එවැනි අයටත් වයස්‌ගත භාවය පෙන්වීමට අකමැති අයටත් Segment කණ්‌ණාඩිය වෙත යොමුවිය හැක.

Virifocal කණ්‌ණාඩියක දුර පෙනුම, මැද දුර පෙනුම, ළඟ පෙනුම යන දුරවල් තුනකටම බැලීමට හැකියාව ඇත.

Virifocal කාචවල බලය ඉහළ සිට පහළට ක්‍රම ක්‍රමයෙන් වෙනස්‌ වෙයි. එලෙසම Virifocal කාචවල බලය හරියාකාරව පවතින්නේ කාචයේ මධ්‍ය තීරයේය. මෙම මධ්‍ය තීරයේ පරාසයද වෙනස්‌වෙමින් Virifocal වර්ගීකරණය වෙයි.

ඉහළ සිට පහළට බලය වෙනස්‌ වන උසද වෙනස්‌වෙමින් Virifocal වර්ගීකරණය වෙයි.

එමනිසා මෙම කරුණු කාරණා සැලකිල්ලට ගනිමින් ඇස්‌ කණ්‌ණාඩියක්‌ ලබාගැනීමට ගියවිට මෙම වර්ග ගැන අසා දැන ගන්න. ඒ සඳහා ඔබට මෙම දැනුවත් කිරීමත් ප්‍රයෝජනවත් වනු ඇත. තමන්ගේ අවශ්‍යතාවය මත සුදුසුම Virifocal වර්ගය තෝරා ගැනීමට යොමු වන්න.

ඒ සඳහා ඔබ Virifocal පිළිබඳව මනා පුහුණුවක්‌ ලත් දක්‍ෂ දෘෂ්ඨි විශේෂඥවරයකු වෙත යොමුවිය යුතුමය.

එයට හේතුව කොතරම් හොඳ කාචයක්‌ වූවද ඇස්‌ මිමි (Virifocal measurments)) නිවැරදිව ලබානොගතහොත් Virifocal කාච පාවිච්චියද කිසිසේත්ම පහසු (Comfortable) නොවන බැවිනි.

තවත් වැදගත් කරුණු කිහිපයක්‌ වන්නේ ඔබ පරිගණකය දිගටම භාවිත කරන්නේ නම් ආලෝක සංවේදී නම්, රාත්‍රියේ වාහන පැදවීම අපහසු නම් එම තත්ත්වයන් අවම කරගත හැකි විශේෂිත Malticoated කාච ඇස්‌ කණ්‌ණාඩි වට්‌ටෝරුව සමඟ ලබාගැනීමයි.

එසේම හතළිස්‌ ඇඳිරිය සඳහා ඇස්‌ කණ්‌ණාඩිය නිතරම භාවිත කළ යුතු නොවෙයි. තමන්ට අවශ්‍ය වේලාවට පාවිච්චි කිරීමට පමණක්‌ පුරුදුවීම් වරදක්‌ නොවෙයි.


දෘෂ්ඨි විශේෂඥ
සමන්තා සුදර්ශනී