මැදි වයසේදී ඇතිවන මළ බද්ධය නොසලකා සිටිය යුතු කාරණාවක් නොවේ. ඇතැම් විට පිළිකාවක ලකුණක් ලෙසින් ද මළ බද්ධය ඇතිවිය හැකියි.ආහාර ගැනීම අපට පහසු කටයුත්තක්. එහෙත් සමහරුන්ට එම පහසු කටයුත්ත කරදරයක් බවට පත්වන්නේ මළ බද්ධය ඇති  වූ විටයි.

මළ බද්ධය ලොකු කුඩා කවුරුත් පීඩාවට පත් කරන රෝගී තත්ත්වයක්. කුඩා දරුවන්ගේ මළ බද්ධය, දරුවා කිරි බොනවා නම් සාමාන්‍ය පරිදි හැසිරෙනවා නම් ගණන් ගත යුත්තක් නොවෙයි.

වයස අවුරුද්දත්, අවුරුදු පහක් අතර දී සමහර දරැවන්ට මළ පිට කිරීම බරපතළ ගැටලුවක්. ඒ ඔවුන් මළ පිට කිරීමට බියක් දැක්වීමේ හේතුව නිසයි. හරිහැටි වැසිකිළි යාමට පුරුදු නොකිරීම ද පොඩ්ඩන්ගේ මළ බද්ධයට හේතු වෙනවා. එහෙත් වයස අවුරුදු 30 - 35 සිට ඉන් ඉහළ වයස් සීමාවන්හිදී මළ බද්ධය ඇති වෙනවා නම් වෛද්‍ය උපදෙස් පතන්න. ඇතැම් විට මෙම වයස් වලදී පිළිකාවක ලකුණක් ලෙසින් මළ බද්ධය ඇතිවිය හැකියි. 

රෝගයක් හේතුවෙන් මළ බද්ධය ඇති නොවනවා නම් කෙඳි සහිත ආහාර අධිකව ගැනීමෙන්, ව්‍යායාම කිරීමෙන් මළ බද්ධයෙන් මිදෙන්න පුළුවන්. සාමාන්‍යයෙන් මළ බද්ධය ලෙස හඳුන්වන්නේ මළපිට වෙන වාර ගණන අසාමාන්‍ය ලෙස වෙනස් වීමයි. එනම් මළ පිට නොවීම හෝ මළ පිටවෙන වාර ගණන ඉතා අඩුවීමයි. මළ පිට කිරීමට දුෂ්කර වීමත් මළ බද්ධයේ ලකුණකි. දැඩි ලෙස ඝන, විශාල මළ නිසා ගුද මාර්ගයේ ඉරීම් පවා ඇතිවෙන්නෙ පුළුවන්. විශේෂයෙන් දරුවන් තුළ මේ ලක්ෂණය දක්නට ලැබෙනවා. 

බොහෝ විට මළ බද්ධයට හේතු වෙන්නේ කෙඳි අඩු ආහාරයි. ව්‍යායාම අඩු කම, ඇති තරම් ජලය නොබීම, අවශ්‍යතාවය තිබියදීත් වැසිකිළියට යාම ප්‍රමාද කිරීම, මානසික ආතතිය ගමන් බිමන් යාම මළ බද්ධයට හේතුවන අවස්ථා තිබෙනවා. ඉරිටබල් බවල් සින්ඩ්‍රෝම් නම් අද බහුතරයක් පීඩා විඳින බඩවැල් ආශ්‍රිත රෝග තත්ත්වය ද මේ කෙරෙහි බලපානවා.

ඖෂධ, ස්නායු රෝග, මළ බද්ධය ඇති කිරීමට හේතුවන සරල තත්ත්වය. එහෙත් බඩවැල් ආශ්‍රිත පිළිකා වැනි බරපතල තත්ත්ව නිසාද මළ බද්ධය ඇති වන්න පුළුවන්. එහෙත් එය ඉතා විරල තත්ත්වයක්. මළ බද්ධයෙන් පීඩා විඳින අය තම ආහාර වේලට හැකි තරම් එළවළු පලතුරු, වියළි පලතුරු, ධාන්‍ය, ඇටවර්ග එක් කර ගත යුතුයි. එවැනි ආහාර කෙඳිවලින් පොහොසත් නිසා මළ බද්ධයක් ඇති වෙන්නේ නැහැ. නිතර ව්‍යායාම කිරීම මේ අයට වැදගත් වෙන්නේ. එමගින් බඩවැල්වල ක්‍රියාකාරීත්වය හොඳින් සිදුවෙන නිසයි. මළ බුරුල් කරන ඖෂධ ද වෙළෙඳ පොළෙහි තිබෙනවා. එහෙත් ඒවා වෛද්‍ය උපදෙස්වලින් තොරව ගැනීම සුදුසු නැහැ. එම ඖෂධ දිගට ගතහොත් එය නොමැතිව මළ පිට කිරීමට නොහැකි වෙනවා.

කඩිනමින් වෛද්‍ය උපදෙස් පැතිය යුතු අවස්ථා වන්නේ හදිසියේ ඇතිවෙන මළ බද්ධයත් සමඟ බඩ කොරවීම, මළ සමඟ රුධිරය පිටවීම, මළ බද්ධය සමඟ ඩයරියා තත්ත්වයක් ද තිබීම, පැන්සලක් මෙන් සිහින්ව මළ පිටවීම, ගුද මගේ වේදනාව අසාමාන්‍ය ලෙස බර අඩුවීමයි.

 සුගත්

කොලෙස්ටෙරෝල් යනු වර්තමානයේ තරුණ මහලු භේදයකින් තොරව ඉතා සීග්‍රයෙන් වැඩි වන්නා වූ බෝ නොවන රෝගයකි. විශේෂයෙන් අවිධිමත් ආහාර රටාවන් නිසා ඇතිවන මෙම රෝගී තත්ත්වය අඩු කොලෙස්ටෙරෝල් මට්ටම හා අධි කොලෙස්ටෙරෝල් මට්ටම ලෙස කොටස් දෙකකි. අපගේ ශරීරයේ පවතින කොලෙස්ටෙරෝල් මට්ටම අනුව හිතකර හා අහිතකර ප්‍රතිඵල ලැබේ.

කොලෙස්ටෙරෝල් පිත්ත අම්ලය සෛල පටලවල පැවැත්මට අත්‍යවශ්‍ය වේ. එමෙන්ම ස්ටීරොයිඩ් සහ විටමින් ඩී සංශ්ලේෂණයේ දී මූලික සාධකය ද එයයි. මේ හේතුවෙන් ඒවායේ අඩු වැඩි වීම් නිසා අයහපත් සෞඛ්‍ය තත්ත්වයන් ඇතිවිය හැකිය. පිළිකා වැනි දරුණු ලෙඩ රෝගවලට ගොදුරු වන අය මන්දපෝෂණයෙන් ද පෙළෙන නිසා LDL (අයහපත්) කොලෙස්ටෙරෝල් මට්ටම අඩු වීමට ඉඩ තිබේ. වසංගත රෝග පිළිබඳව අධ්‍යයනය කරන විට පෙනී ගොස් ඇත්තේ ස්වභාවයෙන් ම අඩු කොලෙස්ටෙරෝල් මට්ටමක් ඇති අය වැඩි කලක් ජීවත්වන බවයි. ප්‍රෝටීන් සම්බන්ධ ඇතැම් ආබාධවලදී සමස්ත කොලෙස්ටෙරෝල් මට්ටම 80 දක්වාත් LDL කොලෙස්ටෙරෝල් මට්ටම 30 දක්වාත් අඩු වී පවතී. මෙම තත්ත්වය දීර්ඝායුෂ වැඩීමට හේතුකාරක වන බව පෙනී ගොස් තිබේ.

ක්ෂීරපායි ගණයට අයත් අශ්වයන් වැනි ඇතැම් සතුන් හැරුණු විට පූර්ණ කොලෙස්ටෙරෝල් මට්ටම 160 වැඩියෙන් ද LDL මට්ටම 80 වැඩියෙන් ද ඇත්තේ මිනිසාට පමණි. ඇමෙරිකානු ප්‍රමිතියට අනුව LDL මට්ටම 50-70 නම් එය ඉතාමත් අඩු මට්ටමකි. එහෙත් අපගේ ජානමය යෝග්‍යතා අනුව සකස්වුණු ආහාර මෙන්ම හැසිරීම් රටාව අනුව ද මෙය සාමාන්‍ය මට්ටම සේ සැලකිය හැකිය. ප්‍රදාහය සහ රුධිර හා වසා වාහිනී පටල විෂමතා ද හෘදයාබාධවල හේතුකාරක වන මුත් LDL කොලෙස්ටෙරෝල් මට්ටම 80 ට අඩු වූ විට ඒවා මඟහැරී යන බව පරීක්ෂණවල දී හෙළි වී ඇත. ස්ටැටින් ප්‍රතිකාරයෙන්ද එවැනි රෝග සුවපත් කරන බව ද පෙනී ගොස් තිබේ. මෙය කවර ක්‍රියාවලියක් නිසා සිදුවන්නේ දැයි පැහැදිලි නැතිමුත් නූතන ශිෂ්ට සමාජයේ දක්නට ලැබෙන විවිධාකාර වූ නිදන්ගත, එමෙන්ම පරිහානියට ලක් කරන රෝගවල පොදු හේතුව LDL (අයහපත්) කොලෙස්ටෙරෝල් මට්ටම වැඩිවීම බව ඇතැම් අයගේ මතයයි. දැන් සාමාන්‍ය මට්ටම ලෙස පිළිගැනෙන 50-70 ප්‍රමාණයට LDL මට්ටම අඩු කළහොත් හෘදයාබාධ පමණක් නොව විශේෂයෙන් ම වයස්ගත වූවන් වැඩියෙන් ගොදුරැවන රෝගාබාධ බොහොමයක් වැලකී යනු ඇත. එය දීර්ඝායුෂ භූක්ති විඳීමට ද හේතු වන්නේය. 

Health web-

නරක මේදයෙන් බේරෙන්නේ මෙහෙමයි

නරක කොලෙස්ටරෝල් වැඩිවීමෙන් ඇතිවන ලෙඩ රෝගවලින් බේරෙන්නට නම් එදිනෙදා ආහාර පුරුදු සහ ජීවන පුරුදු වෙනස් කර ගැනීම මගින් පමණක් එය කරන්නට හැකියි. ඒ සඳහා දැනට වෛද්‍ය විද්‍යාත්මකව යහපත් යැයි තහවුරු කර ඇති ආහාර කිහිපයකි මේ.

ඕට්ස්

ඕට්ස් දිනකට එක්වරක් හෝ ආහාරයට එක්කර ගත්විට සමස්ත කොලෙස්ටරෝල් ප්‍රමාණය වගේම නරක (LDL) කොලෙස්ටරෝල් මට්ටමත් සැලකිය යුතු මට්ටමින් අඩු වෙනවා. ඕට්ස් ග්‍රෑම් 60ත් 80ත් අතර ප්‍රමාණයක් ආහාරයට ගත්විට කොලෙස්ටරෝල්වලට එරෙහිව කටයුතු කරන බීටා Glucan නම් රසායනය ග්‍රෑම් 3ක් පමණ ඇඟට එකතුවෙනවා. වේල් තුනටම ඕට්ස් විවිධ ආකාරයට සකසා කෑමට ගැනීම ඉතාමත් වැදගත්.

මුංඇට වැනි ඇට වර්ග

මුංඇට, කව්පි, සෝයා වැනි ඇට වර්ග ග්‍රෑම් 30ක් පමණ එක් ආහාර වේලකට එකතු වෙනවා නම් නරක (LDL) කොලෙස්ටරෝල් සියයට 5.5ක් අඩුවෙනවා වගේම යහපත් කෙලෙස්ටරෝල් ප්‍රමාණය සියයට 3.2ක් ඉහළ යනවා.

කජු මද

කජු මද කියන්නේ කොලෙස්ටරෝල් මර්දනය සඳහාම විශේෂ වූ ආහාරයක් හැටියටයි දැන් හඳුනාගෙන ඇත්තේ. ඔමේගා 3 මේදය යහමින් අඩංගු නිසා දිනකට ග්‍රෑම් 50ක්වත් කජුමද ආහාරයට ගන්නවා නම් නරක කොලෙස්ටරෝල් ඉතා අඩුවන බවයි වෛද්‍ය මතය.

තෙල් සහිත මාලු

සැමන්, ටූනා, සාර්ඩින්, මැකරල්, හුරුල්ලා වැනි මාළු වර්ගවලින් යමක් උදාසන ආහාරයට එක්කර ගැනීමෙන් කොලෙස්ටරෝල් ප්‍රමාණය ඉතා යහපත් මට්ටමක පවත්වාගන්න පුළුවනි. සාමාන්‍යයෙන් දිනකට සිරැරට අවශ්‍ය ඔමේගා 3 ප්‍රමාණය මිලිග්‍රෑම් 500ක් හැටියටයි කියන්නේ. ඒ ප්‍රමාණය ලබාදෙන්න පුංචි ග්‍රෑම් 150ක විතර මාළු පෙත්තකට හැකියි. 

මේ හැර දිනකට මිනිත්තු 30ක් හොඳින් ඇඟට දාඩිය දාන ඇවිදීම, පිහිනීම, බයිසිකල් පැදීම වැනි ව්‍යායාමයක යෙදීමත්, දුම්පානය අත්හැරීමත්, මත්පැන් සීමා කිරීමත්, එළවළු පළතුරැ වැඩියෙන් ආහාරයට ගැනීමත්, බටර් වෙනුවට ඔලිව් ඔයිල් වැනි හිතරක ශාකමය තෙල් වර්ගයක් භාවිතයත් කලින් සකස් කරන ලද අධික ලුණු, තෙල් සහ පිටි අඩංගු ආහාර අත් හැරීමත් පුරැදු කර ගැනීමෙන් කොලෙස්ටරෝල් වලින් සිදුවන හානිය වළක්වා ගන්න පුළුවනි.

ග‍්‍රස්ථිය (OCD) කියන රෝගය ප‍්‍රජාව තුළ 2%, 3% ක් දක්නට ලැබෙන තවත් කරදරකාරී මානසික රෝගයක්. මෙවැනි රෝගියකුගේ පවුල් ජීවිතය සමාජයීය ජීවිතය වගේම අධ්‍යාපනයද බිඳ වැටීමට ඇති හැකියාව හුඟක් වැඩියි. මෙම ආතතියෙන් දැඩි කම්පනයට පත්වන රෝගීන් ජීවිතය එපා වී මානසික අවපීඩන තත්ත්වයටද ගොදුරු වෙන්න පුළුවන්. සත්‍ය කතාවක් ඇසුරින් ග‍්‍රස්ථිය පිළිබඳ අපි වැඩිදුරටත් හදාරමු. මෙම රෝගී තත්ත්වයෙන් පෙළුණු රෝගියකු පිළිබඳ E-mail පණ්වුඩයක් අපට ලැබුණ නිසා අපි ඒ ගැන වඩාත් විමසිලිමත් වුණා.

වෛද්‍යතුමනි, මගේ wife ගේ වයස අවුරුදු 35යි. අපිට ළමයි 03 දෙනෙක් ඉන්නවා. ඇයගේ ප‍්‍රශ්නය කෙටි කර ඔබතුමාට පවසන්නම්. චම්පිකාගේ හැසිරීම් රටාවන්වල තියෙන පහත සඳහන් ක‍්‍රියාකාරකම් නිසා මමද දරුවන්ද ඇයද මහත් පීඩාකාරී තත්ත්වයකට පත්ව ඉන්නේ. දවසක වාර 40කට වඩා ඇය අත සේදීම කරනවා. ඇය මෙසේ කරන්නේ ඇයගේ අත් අපිරිසුදු යැයි සිතීම නිසායි. කවුරුන් හෝ ගෙදරට ඇතුළු වූ විට පාවහන් ගලවා කලිසම උඩට නවා කකුල් හොඳින් සෝදාගත යුතුයි. එසේ නොමැති නම් ඔහුට හෝ ඇයට ගෙදරට ඇතුළු වීමට ලැබෙන්නේ නැහැ. ගෑස් ලිප පත්තරවලින් වහනවා. ගෑස් ළිපේ විසබීජ ගෑවෙයි කියලා ඇය හිතන්නේ. සියලුම ඉවුම් පිහුම් කරන්නේ Rice cooker එකෙන්. මෙම නිසා වෑංජන 2ක් සාදා ගැනීමට පවා පැය 4ක විතර කාලයක් ගත වෙනවා. මේ ක‍්‍රියාවලිය මටත් දරුවන්ටත් මහත් වධයක්. විසබීජ පිළිබඳ භීතිය ඇයට තදින්ම තිබෙනවා. අපේ ගෙදරට දැන් අමුත්තන් එන්නේ නැහැ. ඔවුන් පැමිණීමෙන් නිවෙස ඇතුළට විසබීජ පැමිණෙනවා කියලයි ඇය කියන්නේ. මට සහ දරැවන්ට අප නිදන කාමර හැර අනෙකුත් කාමරවලට ඇතුළු වීමටත් තහනම්. එයට හේතුව විසබීජ පිළිබඳ බියයි.

අපේ ගෙදර ඇති සෝපාවේ වාඩිවීමටත් අපට තහනම්. මෙම සෝපාව මිලට ගෙන වසර 06ක්. කිසි කෙනෙක් තවම වාඩිවෙලා නැහැ. දිනපතා කුස්සියේ ඇති බෝතල් සබන් යොදා සෝදනවා. ඇය මේවාට පැය 03-04ක පමණ කාලයක් ගත කරනවා. මටත් දරුවන් දෙදෙනාටත් ශීතකරණය විවෘත කිරීමත් තහනම්. අපට බඩගිනි වුවත් එය කරන්න බැහැ. එයට හේතුව ඇය දඩි ලෙස කෝප වීමයි. ඇයට ඉතා කුඩා දෙයටත් හැඟීම් පාලනය කර ගත නොහැකියි. ඇය නිතරම තරහින් හා ආතතියෙන් ඉන්නේ. කිසිම දෙයකින් සතුටු වෙන්නේ නැහැ.

ඇයගේ මෙම හැසිරීම් රටාවන් නිසා මමත් දරුවන් දෙදෙනාත් අතිශයින් පීඩාවට පත්වෙලයි ඉන්නේ. මේ හේතුව නිසා අවුරුදු 12ක් වන ලොකු දරැවාගේ අධ්‍යාපනයත් දුර්වල වී තිබෙනවා.

මොකද්ද මේ ග‍්‍රස්ථිය කියන්නේ?

ග‍්‍රස්ථිය කියලා කියන්නේ දැඩි මානසික ආතතියක්. එහි ප‍්‍රධාන කොටස් දෙකක් තිබෙනවා.

සිතට වද දෙන සිතිවිලි (Obsession)

ඊට අනුරූපිකව සිදු කරන ක‍්‍රියාකාරකම් (Compulsion)

සරල උදාහරණයකින් මෙය තේරුම් කරන්නම්. ඔබ යමකුගේ නිදාගන්නා ඇඳ උඩ වාඩි වූවා යැයි සිතන්න. ඔබ වාඩි වූ නිසා භයානක ලෙස විසබීජ ඇඳට ඇතුළු වුණා කියලා යමෙකුට සිතෙන්නට පුළුවන්. නමුත් මෙය සත්‍ය නැහැ. සත්‍ය නොවන බවත් ඔහු හෝ ඇය හොඳින්ම දන්නවා.

විසබීජ පිළිබඳ භීතිය නිසා ඊළඟට සිදුවන දේ නම් ඇඳ ඇතිරිල්ල ඉතාම අනවශ්‍ය ලෙස කිහිප වතාවක් වතුරෙන් සේදීමයි. සමහර වෙලාවට මෙම සේදීම 5,6 වතාවක් හෝ 10 වතාවක් පවා සිදුවිය හැකියි. මෙම ක‍්‍රියාව ඉතාම කරදරකාරීම ක‍්‍රියාවක් බව එසේ කරන පුද්ගලයාටද දැනෙයි. නමුත් ඔහුට මෙය නවතා ගන්නත් බැහැ.

ග‍්‍රස්ථියේ ප‍්‍රධාන ලක්ෂණ

1. කරදරකාරී සිතිවිලි (Obsession) - විසබීජ පිළිබඳ භීතිය, යමක් පිළිවෙළට නැතැයි යන සිතිවිල්ල, ප‍්‍රචණ්ඩකාරී සිතිවිලි හා හැඟීම්, දිගටම පැමිණෙන ලිංගික සිතිවිලි හෝ රූප

2. සිතට වදදෙන ක‍්‍රියාකාරකම් (Compulsion) - දිගටම සේදීම, දිගටම පරීක්ෂා කිරීම. (උදා: දොර වසා ඇතිදැයි 7 - 8 වරක් පරීක්ෂා කිරීම.), දිගටම ගණන් කිරීම, අසාමාන්‍ය පිළිවෙළ

ග‍්‍රස්ථිය කියන්නේ ප‍්‍රබල මානසික ආතතියක්. 

මෙහෙදී ඇති වන සිතිවිලි එම පුද්ගලයාට මහත් කරදරයක් හා වධයක් වුණත් මෙසේ ඇති වන සිතිවිලි හෝ රූප නැවැත්වීමට දැඩි ආයාසයක් අරගන්නවා. එසේ කළ නොහැකි බව රෝගියාට තේරුම් යනවා.

ග‍්‍රස්ථියට හේතු

ෆ්‍රොයිඩ්ගේ මතය (Psycho Analytic Theory)

සිතට ඇතුළු වන දෑ පීඩාකාරී සිතුවිලි හැඟීම් සහ රූප යටපත් කර ගැනීමේ යටි සිතේ ඇති වන ක‍්‍රියාවලියක් ලෙස ෆ්‍රොයිඩ් මෙය විස්තර කරනවා.

උදා: යටි සිතේ ඇතිවන ලිංගික හෝ ප‍්‍රචණ්ඩකාරී සිතිවිල්ලක් තමාට කරදරයක් වූ විට එය සූක්ෂම විදියට වෙනත් ආතතියක් බවට පත් වන බව මෙම න්‍යායෙන් විස්තර කෙරෙනවා. 

හැසිරීම් පිළිබඳ න්‍යාය (Behavioral Theory)

සිතට වද දෙන සිතිවිලි අවම කිරීමට ඊට අනුරූපික ක‍්‍රියාවක යෙදෙනවා. එසේ යෙදීම නිසා රෝගියාට විශාල සහනයක් දැනෙනවා. මෙම සහනය සමඟ එය චක‍්‍රයක් ආකාරයට දගටම සිදු කිරීමට මනස පුරුදු වෙනවා.

ජානමය හේතු න්‍යාය (Positiru Reinlordcement Theory)

ජානමය හේතු (Genetic Influce), 50% ක පවුල් ඉතිහාසය, රසායනික හේතු, මොළයේ 5HT රසායනික අසමතුලිතතාවන්, මොළයේ ව්‍යුහාත්මක වෙනස්කම්, මොළයේ ලලාට ඛණ්ඩිකාව සහ පාදස්ථ ගැන්ග්ලියා හි ඇති වෙනස්කම්, ග‍්‍රස්ථිය වෙනත් මානසික රෝග සමඟ දැඩි සම්බන්ධතාවක් පවතිනවා.

උදා: හිසකෙස් ගැලවීමේ රෝගය (Tricotilomania) Tics disorder අවපීඩනය (30%පමණ)

පෞරුෂ භින්නතා (Obessive Compulsine Personalny) කුඩා දරුවන්ටද මෙම රෝගය වැළඳිය හැකිය. පිරිමි දරුවන්ට මෙය අවුරුදු 6-15 අතර ආරම්භ විය හැකිය. කාන්තාවන් අවු 20 - 30 අතර වයසේ දී මෙම අසනීපයට ගොදුරැ වෙන්න පුළුවන්. බොහෝ මවුපියන් දරුවන්ගේ මෙම අසනීපය නිසි ලෙස හඳුනා ගන්නේ නැහැ. ඔවුන් මනෝ වෛද්‍යවරයකු වෙත යොමුවන්නේ මෙම ගැටලුව උත්සන්න වූ පසුවයි. මේ වනවිට දරුවා අධ්‍යාපනික ගැටලුවලටද ගොදුරුවෙලා ඉන්න පුළුවන්.

ප‍්‍රතිකාර

ඊට සාර්ථක මනෝ විද්‍යාත්මක ප‍්‍රතිකාර ඇත.

1. ඖෂධ ප‍්‍රතිකාර

2. මනෝචිකිත්සක උපදේශන ක‍්‍රමය

සිතිවිලි ප‍්‍රතිකාර ක‍්‍රමය  මඟින් එයට ප‍්‍රතිකාර කිරීම තුළින් රෝගී තත්ත්වය නිසි ලෙස පාලනය කර ගත හැකිය. රෝගීන්ගෙන් 2/3ක් පමණ ප‍්‍රතිකාරවලට නිසි ප‍්‍රතිචාරයක් දක්වනවා.

කිරිබත්ගොඩ මූලික රෝහලේ 
මනෝ වෛද්‍ය නයනානන්ද කුමාරනායක