සුදුවෙන්න ගිහින් පිළිකා හදාගන්න එපා

අද වෙද්දී වෙළෙඳපොළේ බොහෝ විලවුන් වර්ග මෙන්ම බොහෝ රූපලාවණ්‍ය ආලේපන අලෙවි වෙමින් පවතී. මේවායින් බොහෝමයක් විදෙස් රටවල්වලින් මෙරටට ආනයන වූ ආලේපනයන්ය. විශේෂයෙන් තදාසන්න නගරවල මෙම සුවඳ විලවුන් මෙන්ම රූපලාවණ්‍ය ආලේපන පදික වේදිකාවේද ඉතා අඩු මුදලකට අලෙවි වෙමින් පවතී.

මේ අතර හතු පිපෙන්නා සේ රූපලාවණ්‍ය ශිල්පි ශිල්පිනියන් බිහිවීමත් රට පුරා ඉතා සීඝ්‍රයෙන් රූපලාවණ්‍යාගාරයන්ද බිහිවිය. අද ඇතැම් කාන්තාවෝ ඉතා ඉක්මණින් තම ශරීරයේ පැහැය වෙනස් කරගැනීමට උත්සාහ ගනිති. මේ සඳහා ඔවුන් මෑත කාලයේදී සොයාගත් අලුත්ම ක්‍රමය වූයේ එන්නත් මඟින් තම ශරීරයේ පැහැය වෙනස් කර ගැනීමයි. මෙයින් සම පැහැපත් වීම වෙනුවට සිදුවන්නේ සම සුදුමැලි වීමය. නමුත් බොහෝ තරුණියෝ එය සම සුදුවීම ලෙසින් සලකා තම හිත සතුටු කරගැනීමට උත්සාහ ගනිති. නමුත් වෛද්‍ය අනුමැතියකින් තොරව ශරීරයට ඇතුළු කරගනු ලබන එන්නත්වල විපාක ඇයට අත්විඳින්නට සිදුවෙද්දී ඇතැම්විට ඇය ප්‍රමාද වූවා වන්නටද ඇත. හේතුව මෙවැනි ප්‍රතිකාර ක්‍රම බොහොමයක පිළිකා කාරක අඩංගුව තිබීමය. ඇතැම් ආලේපනවල ඇත්තේ රසදියයි. එමඟින් පිළිකාමය තත්ත්වයන් ඇතිවීමට බොහෝ ඉඩකඩ ඇත.

අප රටේ බොහෝ දෙනෙක් අද වෙද්දී ස්ටීරොයිඩ ගණයේ සංයෝග ඇතුළත් ආලේපන භාවිත කරලා දවසින් දෙකින් සුදුවෙන්න උත්සාහ කරනවා. නමුත් එම ගණයේ සංයෝග ශරීරයට ඉතාම අහිතකරයි. මේ නිසා සම විනාශ වෙලා විකෘතිතා ඇතිවෙනවා. ආසියාතික රටක ජීවත් වෙන අප රටේ ජනතාවගේ සමේ වර්ණකය දුඹුරු පැහැයට හුරුයි. එය වෙනස් කිරීමට උත්සාහ කිරීම ඇත්තටම මෝඩකමක්.

මෙසේ කියන්නේ ජාතික ඖෂධ නියාමන අධිකාරියේ අධ්‍යක්ෂ ජෙනරාල් වෛද්‍ය කමල් ජයසිංහයි.

රටපුරා විසිරී පවතින අනවසර විලවුන්, ආලේපන හා උපකරණ, ඖෂධ පිළිබඳව පරීක්ෂාවට ලක්කොට සොයාබැලීමේ අයිතිය පැවරී තිබෙන්නේ ජාතික ඖෂධ නියාමන අධිකාරියටයි.

මේ සඳහා අපි කඩිනමින් සොයාබැලීම් සිදුකරනවා. අපි වෙබ් අඩවියක් සකස් කරමින් ඉන්නවා. එයින් අනුමත ඖෂධ සහ අනුමත නොවුණු ඖෂධ සම්බන්ධව සම්පූර්ණ විස්තරයක් පාරිභෝගිකයාට බලාගත හැකියි. එමෙන්ම දේශීය වශයෙන් නිපදවන ආලේපන සහ ඔසු සම්බන්ධවද අපගේ අවධානය යොමුකරනවා. එවන් ලාංකික නිෂ්පාදකයෙක් අපිට තොරතුරු ලබාදුන් විට ඒ අදාළ නිෂ්පාදනාගාරයට ගොස් අදාළ කටයුතු සොයාබලා නියම ප්‍රමිතියට අනුව සිදුවන්නේ නම් එයට අදාළ අනුමැතිය ලබාදෙනවා... යැයි අධ්‍යක්ෂ ජෙනරාල් වෛද්‍ය කමල් ජයසිංහ පවසයි.

මේ සම්බන්ධව ප්‍රවීණ රූපලාවණ්‍ය ශිල්පිනී නදීශා ද සිල්වා මෙනවියගෙන්ද අපි විමසීමක් කළෙමු.

වෙළෙඳපොළේ නොයෙකුත් ආලේපන වර්ග තියෙනවා. මේ ආලේපන හොඳ සහ නරක යනුවෙන් කොටස් දෙකකට බෙදන්න පුළුවන්. ආලේපන මිලදී ගැනීමෙන් පසුව එහි අහිතකර බලපෑමක් සිදු වී නම් එයට මුලින්ම වගකිව යුත්තේ පාරිභෝගිකයාමයි. අද සියලු දේ පිළිබඳව සොයා බැලිය හැකි තාක්ෂණය අපට අසලම තියෙනවා. අපි කවුරුත් ලස්සන වෙන්න කැමතියි. ආලේපනවලට ප්‍රිය කරනවා. මිනිසුන් මේ දේවල්වලට සමීප වීමත් සමඟ වෙළෙඳපොළට අලුත් ආලේපනයන් එකතුවීමද වැඩියි...
අද බොහෝ ආලේපන වර්ග රූපලාවණ්‍යගාරවද වෙළෙඳ පොළේද පවතී. මෙම බොහෝ ආලේපනවල කිසිදු ප්‍රමිතියක් නැත.

මේ බොහෝ ආලේපනවල බෙදාහැරීම් ආයතනය, නිෂ්පාදිත දිනය, කල් ඉකුත්වීමේ දිනය, අන්තර්ගත දෑ පිළිබඳව කිසිදු තොරතුරක් නැහැ. මේ ආලේපන වලින් මේ අතුරු ආබාධයන් ඇතිවුණොත් ඒ පිළිබඳව දැනුම් දෙන්නට අදාළ ආයතනයත් සඳහන් කරලා නැහැ. එමෙන්ම වෙළෙඳ පොළේ පවතින ආලේපන අතර තවත් ආලේපන පොඩි කුප්පියක හෝ පොඩි ඇසුරුමක බහා එය වටේ ස්ටිකරයකින් ආවරණය කරලා තියෙනවා. ඕනෑම කෙනෙකුට මෙම ස්ටිකරය ගලවන්නට පුළුවන්. එවිට කල් ඉකුත් වූ ආලේපනයක වුවත් අලුත් දිනයක් දමා නැවත ස්ටිකරය ඇලවීමට පුළුවනි. “මේ ආලේපනවල කිසිම ප්‍රමිතියක් නෑ....” යැයි ඇය පැවසුවාය.

බොහෝ ආලේපනවල කහ, කෝමාරිකා වැනි ආයුර්වේද ඖෂධ අන්තර්ගතව ඇති බවට සඳහන් නමුත් බොහෝ ආලේපනයන් තුළ සියයට සියයක්ම එම ඖෂධීය ද්‍රව්‍ය අන්තර්ගත නොවේ. ඒ වෙනුවට බොහෝ ආලේපන වර්ගයන් තුළ ඇත්තේ ස්ටීරොයිඩ ගණයේ සංයෝග, රසදිය, බ්ලීචිං වැනි ද්‍රව්‍යයන්ය. මේ වනවිට වෙළෙඳ පොළේ ඇති රූපලාවණ්‍ය ආලේපන නිසා අතුරු ආබාධවලට මුහුණ දුන් පාරිභෝගිකයෝ විශාල සංඛ්‍යාවක් සිටිති. නමුත් ඔවුහු තමන් මුහුණ දුන් තත්ත්වය පිළිබඳව සමාජයට කීමට මැලිකමක් දක්වති.

වෙළෙඳ පොළේ පවතින ආලේපනවලට රැවටෙන්න එපා. මුලින්ම නිෂ්පාදනයේ නාමය, නිෂ්පාදිත දිනය, කල්ඉකුත් වූ දිනය, අන්තර්ගත දෑ යන සියලුම ප්‍රමිතිය සොයාබලා ආලේපන මිලදී ගැනීමට තීරණය කරන්න. කිසිම ප්‍රමිතියක් නැති නිෂ්පාදන, කවුරු කොහොම කිව්වත් ඔබ ළං කරගන්න එපා....යැයි ප්‍රවීණ රූපලාවණ්‍ය ශිල්පිනී නදීශා ද සිල්වා මෙනවිය වැඩිදුරටත් කීවාය.

ආසියාතික රටවල්වලට තමයි මේ උමතුව වැඩියෙන් තියෙන්නේ. අපිට බොහෝ විට ඇත්තේ දුඹුරු මිශ්‍ර සමක්. සුදුවීම සහ පැහැපත් වීම යනු දෙකකි. නියම ලස්සන සැමවිටම රැඳිලා තියෙන්නේ නිරෝගීමත් පැහැපත් සමකයි. සම බොහෝවිට අපගේ ජානවලින් ලැබුණු දෙයක්. කල්යද්දී පාරිසරික හේතුන්, ශරීරයේ එක් එක් වෙනස් වීම් අනුව අපගේ ශරීරයේ පැහැය අඩුවැඩි වෙනවා. නමුත් අද වෙද්දී බොහෝ තරුණියන් එන්නත් ක්‍රම මඟින් සුදු වන්නට උත්සාහ ග්නනවා. එයින් අපගේ ශරීරයේ ඇති මෙලනින් සම්පූර්ණයෙන්ම විනාශ කරනවා. එවිට ශරීරයේ මෙලනින් අඩුවීමෙන් සම සුදුවීමකට ලක්වෙනවා. නමුත් රූපලාවණ්‍ය ශිල්පිනියක් විදිහට ශරීරයට මෙලනින් එන්නත් කර ගැනීම අවදානම් කියලයි මම කියන්නේ.

මේ අනුව ඉදිරියේදී ඖෂධ නියාමන අධිකාරිය මඟින් මෙරටට පැමිණෙන ආනයනික හා මෙරට නිෂ්පාදිත ආලේපන හා විලවුන් ආදිය පරීක්ෂාවට ලක්කොට සුදුසු ආලේපනවලට පමණක් අනුමැතිය ලබාදීමට කටයුතු කරමින් පවතී. ඔබත් වෙළෙඳ පොළේ ඇති ආලේපනවලින් සුදුවන්නට උත්සාහ ගන්නා තරුණියක් නම් ඒ පිළිබඳව තව වරක් සිතා බැලිය යුතුය.

► දිශානි ජයමාලි කරුණාරත්න

නිවැරදි නින්දෙන් සුවවෙන ලෙඩ

නිදාගැනීමේදී අපි අනුගමනය කරන ඉරියව්වෙන් රුධිර සංසරණය යහපත් කරගැනීම සහ කෝටර දාහය සුවකරගැනීම වැනි විවිධ සෞඛ්‍ය වාසිත් අත්කරගන්නට පුළුවන් බව ඔබ දැන සිටියාද?

ඉතින්, ඔබට අද අපි මේ පෙන්වා දෙන සෞඛ්‍ය ගැටලු කිහිපයෙන් එකක් හෝ තිබෙනවා නම් පහත දක්වා ඇති ඉරියව් භාවිතයෙන් නිදාගෙන එය පහසුවෙන්ම සුවකරගන්නට හැකි වේවි.

උරහිසේ වේදනා

ඔබත් උරහිසක වේදනාවෙන් පීඩා විඳිනවා නම් එය නිදාගන්නා අතර තුළදීම ලෙහෙසියෙන්ම සුවකරගන්නට පුළුවන්. මේ සඳහා ඔබේ වේදනාව රහිත උරහිස පැත්තට ඇලවී පාද දෙක ඉදිරියට නමා එක් කොට්ටයක් පපුවට යටින් තබා තවත් කොට්ටයක් දණහිස් දෙක මැදට වන්නට තබා නිදාගන්න.

කොන්දේ වේදනා

කොන්දේ වේදනාවට ඔබ නිදියන ඉරියව්ව දැඩි ලෙස බලපානවා. ඔබ උඩු අතට වන්නට නිදාගෙන එක් කොට්ටයක් ඔබේ දණහිස් යටින් තබාගන්න. ඒ වගේම, රෝල් කරගත් තුවායක් ගෙන එය කොන්දේ නැම්ම යටින් තබාගන්න. මේ ආකාරයට නිදාගැනීම මගින් ඔබේ කොන්දේ වේදනාව සුවකරගන්නට පුළුවන් වේවි.

හිසේ කැක්කුම්

ඔබට හිසේ කැක්කුමක් ඇත්නම් ඔබ නිදාගන්නා ඉරියව්ව අනුව එය උත්සන්න වීමත් සුවවීමත් යන දෙකෙන් එකක් සිදුවනවා. බොහෝ විට නිදාගැනීමේ දී බෙල්ල ඇඹරීම නිසා තමයි හිසේ කැක්කුම ඇතිවන්නේ. මෙය මඟහරවාගැනීමට ඔබ නිදාගන්නා විට ඔබේ ගෙල දෙපැත්තෙන් කොට්ට දෙකක් තබා ගෙල හැරවීම වළක්වා ගන්න.

කෝටරක දාහය හෙවත් සයිනස් 

නිදාගැනීමේ ඉරියව්ව හිසේ කැක්කුමට බලපාන ආකාරයටම කෝටර දාහයටත් බලපානවා. හාවර්ඩ් සරසවිය විසින් නිර්දේශ කරන ආකාරයට ඔබේ හිස තරමක් ඉහළට එසවෙන ආකාරයට නිදාගැනීම මගින් ඔබට කෝටර දාහය සුවකරගන්නට පුළුවන්.

අධිරුධිර පීඩනය

අධ්‍යයනයකට අනුව සොයාගෙන තිබෙන කරුණක් තමයි නිදාගැනීමේ ඉරියව්ව සෘජුවම රුධිර පීඩනය කෙරෙහි බලපාන බව. ඒ වගේම, රුධිර සංසරණය පාලනය වන නිදාගැනීමේ ඉරියව්වක් ද ඔවුන් මෙහිදී සොයාගෙන තිබෙනවා. ඔබ මුහුණ යටට වන්නට සිටින සේ නිදාගන්න. එමඟින්, ඔබට පුළුවන් අධිරුධිර පීඩනය පාලනය කරගන්නට.
අධිරුධිර පීඩනය සඳහා වෛද්‍ය උපදෙස්වලින් තොරව කිසිම ඖෂධයක් භාවිතා කරන්නට එපා.

ඔසප් වීමට ආසන්නව ඇතිවන වේදනා

ඔසප් වීමට ආසන්නයේ හටගන්නා විවිධ සෞඛ්‍ය ගැටලුවලට ලක්වී වේදනාවක් විඳිනවා නම් නිදාගන්නා විට ඔබේ දණහිස් යටට වන්නට කොට්ටයක් තබාගෙන නිදාගන්න. එමගින් ඔබේ පිටකොන්ද නැමීම නතර වී වේදනාව සමනය වනවා.

බෙල්ලේ වේදනාව

ඔබට බෙල්ලේ වේදනාවක් ඇත්නම් ඔබ නිදාගැනීමේ දී තුවායක් රෝල් කර බෙල්ල යටින් තබා නිදාගන්න. මේ තුවාය වෙනුවට ඔබට කොට්ට උරයක් වුවත් භාවිතා කරන්නට හැකිය

ආහාර ජීර්ණ ගැටලු

වම්පසට හැරී නිදාගන්නවා නම් ඔබට නියමාකාර ආහාර ජීර්ණයක් පවත්වාගන්නට පුළුවන්. උදරය වම්පසට වන්නට පිහිටන නිසා ඔබ වම්පසට හැරී නිදාගැනීමෙන් ගුරුත්වාකර්ෂණ බලපෑම මගින් ආහාර ජීර්ණය වේගවත් කරගන්නට පුළුවන්.

පපුවේ දැවිල්ල

පපුවේ දැවිල්ල මහත් පීඩාකාරී සෞඛ්‍ය ගැටලුවකි. මේ සෞඛ්‍ය ගැටලුවෙන් පීඩාවිඳිනවා නම් ඔබ වම්පසට හැරී නිදාගන්න. එවිට ඔබට පහසුවෙන්ම පපුවේ දැවිල්ල සුවකරගන්නට හැකියි. 

මේ නිදාගැනීමේ ඉරියව් අනුගමනය කරන්නට පෙර ඔබේ වෛද්‍යවරයා හමුව වැඩිදුර උපදෙස් ලබාගන්න. එවිට ඔබට පුළුවන් වේවි මෙම සෞඛ්‍ය ගැටලුවලින් ආරක්‍ෂා වන්න.
 
 I සුගත්

නියුමෝනියාව සහ ක්‍ෂය රෝගය දුරු කරන කජු!

කුරුලෑ, දත් කුහර නියුමෝනියාව සහ ක්‍ෂය රෝගය ඇතිවීමට බලපාන බැක්ටීරියා නැසීම සඳහා කජු තුළ විශේෂිත රසායනික ද්‍රව්‍යයක් අන්තර්ගත වනවා.

ඒ වගේම, මැන්ගනීස්, මැග්නීසියම්, කොපර්, පොස්පරස් සහ සින්ක්වලින් පොහොසත් වන කජු තුළ අනෙත් ධාන්‍ය වර්ගවලට වඩා අඩු මේද ප්‍රමාණයක් සහිතයි. 82% ක් පමණ අසංතෘප්ත මේද අම්ල අන්තර්ගත වන අතර හදවත් සෞඛ්‍යයට මෙය වඩාත් ප්‍රයෝජනවත්. කජු සතුව ඔලිව් තෙල්වලට සමාන monounsaturated මේදයත් අන්තර්ගත වනවා.

බැක්ටීරියාවන් නසා දැමීම

කජු සතුව ඇති බැක්ටීරියා නාශක විශේෂ සංයෝගය වන්නේ “anacardic” අම්ලයයි. බැක්ටීරියා මගින් දත් කුහර ඇතිවීම, කුරුලෑ ඇතිවීම ඇතුළුව නියුමෝනියාව සහ ක්‍ෂය රෝගය පවා සුවකරන්නට මේ රසායණයට හැකියි.

(Anacardic) අම්ලය එක කොටසකට ජලය කොටස් 200,000 එක් කිරීම මගින් අතිසාර්ථක ලෙස විනාඩි පහළොවක කාලයක් ඇතුළත බැක්ටීරියාවන් නසාගන්නට පුළුවන් බව සනාථ වී තියෙනවා. කාන්තාවන් 80,000 ක් පමණ යොදාගෙන එක්තරා අධ්‍යයනයක් සිදුකර තිබෙනවා. මෙම කාන්තාවන් සතියකට අවම වශයෙන් කජු අවුන්ස එකක් පමණ ආහාරයට ගෙන ඇති අතර මුත්‍රාශයේ පිළිකා ඇතිවීමේ අවදානම මෙම කාන්තාවන්ගේ 25% පමණ පහළ බැස තිබෙනවා.

ශරීරයේ බර අනවශ්‍ය ලෙස වැඩිවීම වළක්වා ගැනීම සඳහාත් කජු ඔබේ ආහාර වේලට එක්කර ගැනීම වැදගත්.
ඇතැම් පුද්ගලයින් බර වැඩි වේයැයි යන බියෙන් කජු ආහාරයට ගැනීමෙන් වැලකී සිටිනවා. කෙසේ වෙතත් විවිධ අධ්‍යයනයන් මගින් කරුණු දක්වා ඇත්තේ සතියකට වාර දෙකක් පමණ කජු ආහාරයට ගැනීම මගින් තරබාරුවීමේ අවදානමත් අඩුවන බවයි.

♦ Web MD

පිළිකාව කලින් දැනගත්තොත් මාසෙන් කම්මුතු කළ හැකියි

වැදගත් ලිපියික් මල්ලි. ඒ වුනාට පිලිකාව ගැන දැන ගන්නකොට කෝච්චි ගිහින් හමාරයි.

අවුරුද්දකට සැරයක්වත් මෙඩිකල් චෙකප් එකක් දා ගන්න පුරුද්දක් වත් දා ගන්න පුරුද්දක් තිබ්බ නම් මාරාන්තික ලෙඩවල් හඳුනා ගන්න පහසු වෙන්න තිබ්බ කලින්ම. එහෙම පුරුද්දක් අපේ රටවල් වල තවම නැහැනෙ.