මිනිස් සිරුරෙහි වර්ධනයට මෙන්ම සෞඛ්‍යය ආරක්ෂාවටත් යම් යම් ලෝහ පදාර්ථ අවැසි වේ. ඇත්තෙන්ම විශ්වාස කළ නොහැකි තරමටම පුදුම සහගත ලෙස ‘මීපැණි’වල මෙම සංයෝගයන් අඩංගු වී තිබේ.

මීපැණිවල විටමින් පදාර්ථ සහ යකඩ, තඹ, මැංගනීස්, සිලිකා, ක්ලෝරීන්, පොටෑසියම්, සෝඩියම්, පොස්පරස්, ඇලුමිනියම් සහ මැග්නීසියම් යන ලෝහ වර්ග සහ ජල පදාර්ථ ද අඩංගු වේ. මේවා පොළොවෙන් පැළැටිවලට ද, පැළෑටිවලින් මල්පැණිවලට ද ගමන් කරයි. එසේ නමුත් සෑම මීපැණි සාම්පලයකම මෙම ලෝහ පදාර්ථ ආදිය එක හා සමානව පැවතීමක් නැත. මේවා රටින් රටට, පළාතෙන් පළාතට පසේ හා පරිසරයේ තත්ත්වය අනුව වෙනස්වීමට පුළුවන. මේ බව පරීක්ෂණවලින් සොයාගෙන ඇත.

මීපැණිවල ප්‍රධාන වශයෙන් සීනි දෙවර්ගයක් පවතී. ඒවා පොදු වශයෙන් 75-80 වේ. උක් හා බීට් සීනි සිරුරට උරාගැනීම පිණිස සිරුර තුළදී (enzymes)  එන්සයිම වර්ග සමඟ සංයෝග වී අමිශ්‍ර -හුදු (simple suger) සීනි බවට පරිවර්තනය විය යුතුය. එහෙත් මීපැණි එසේ නොවේ. මීමැස්සන්ගේ ඛේට ග්‍රන්ථිවලින් උනන ස්‍රාවයෙන් එළියේදීම සිරුර තුළදී සිදුවිය යුතු පරිවර්තනය සම්පූර්ණවී ඩෙක්ස්ට්රෝස් හා ලෙවුලෝස්  Levulose (fruit suger)  අමිශ්‍ර - හුදු සීනි බවට පෙරළී ඇත. ඒ නිසා මීපැණිවලින් ආමාශය අන්ත්‍රමාර්ගයට කිසිම පීඩාවක් සිදු නොවේ. එම පටකවල නියම උග්‍රතාවයක් ඇති නොකෙරේ.

කිසිදා කල් ඉකුත් නොවන මීපැණිවල ගුණ

මීපැණි අපට ඖෂධීය වශයෙන් මෙන්ම ආහාරමය වශයෙන් ද ප්‍රයෝජනවත් වේ. පමණක් ද නොව සෞඛ්‍යය ආරක්ෂා කිරීම මෙන්ම ප්‍රතිජීවක ශක්තිය ද මීපැණි සතුව පවතී. ප්‍රතිශක්තිය ලබාදීම ද මීපැණිවලින් සිදු වේ. රෝග සුව කිරීමේ ගුණය මෙන්ම රෝග පාලනය කිරීමේ හැකියාව ද මීපැණි සතුව පවතී. එසේම රූපලාවණ්‍ය සඳහා ද සහාය වේ.

මේ සැමටම වඩා මීපැණිවල ඇති වාසිදායක තත්ත්වය වනුයේ කල් ඉකුත් නොවන ගුණයයි. නියම ස්වාභාවික මීපැණි කිසිදු පරණවීමක් නැත. එමෙන්ම එහි ඇති වහා අවශෝෂණය කරගැනීමේ ගුණය, වහා පැතිරෙන ගුණය (ව්‍යවාහී) නිසාම ඉක්මන් ක්‍රියාකාරීත්වයකින් යුතු ද්‍රව්‍යයකි.

මේ නිසාම ආයුර්වේද වෛද්‍ය ශාස්ත්‍රයේ දී මෙන්ම දේශීය වෛද්‍ය ක්‍රමයේදී ද ඖෂධ සංයෝග කිරීමේදී මීපැණි ඉතා ඉහළ අගයක් ගනී.ඖෂධීය වශයෙන් විශිෂ්ට ගුණ පවතී.මේ සියලුම දෑ ගොනුකර බැලීමේ දී මෙසේ දැක්වීමට පුළුවන.

මිනිසුන් විසින් නිෂ්පාදනය කරනු ලබන බැක්ටීරියා නාශක ද්‍රාවණයන්ට වඩා ඉතා හොඳ බැක්ටීරියා නාශකයක් ලෙස ක්‍රියාකරයි. තුවාල සුවපත් වීම අතින් ඉතා ඉහළ අගයක් ගනී.

මීපැණිවල අඩංගු සීනි සුෂිෂ්ට නිසා කැලරිවලින් හීනවේ. එම නිසා අනවශ්‍ය මේද දහනයට උපකාරී වේ. තරබාරුබව නැතිකරයි. මෙසේ අනවශ්‍ය මේද දහනය වන බැවින් හෘද්වාහිනී පද්ධතිය තුළ ආරක්ෂාකාරීබවක් දනවයි. මෙසේ හෙයින් හදවතට ආරක්ෂාව සපයයි.

සිරුරට ඇති වාසි

මෙහි ඇති සීනි ඉතාම සරල බැවින් පරිවර්තනය සිදුවීමට අනවශ්‍ය බැවින් ඉතා ඉක්මනින් රුධිර සංසරණ පද්ධතියට එකතු වේ. මේ නිසාම ශරීර සෞඛ්‍යයෙන් පිරිහීගිය අයකුට දුන් සැනින් එහි ගුණාත්මක බව නිසා ඉතා ඉක්මනින් ක්‍රියාශීලීවීමෙන් දුර්වල බවට සහනයක් ලැබේ.

ප්‍රතිශක්තිය වර්ධනය කරවයි.

පිලිස්සීමට ප්‍රතිකාර කිරීමේ දී වේදනාව නැසීයනවා මෙන්ම ඉක්මනින් වෘණ රෝපණය ද සිදුවන බැවින් පිලිස්සීම් ප්‍රතිකාරයේදී වැදගත් වේ.

විටමින් වර්ග සහ ප්‍රතිඔක්සිකාරක(antioxidants) ( (අප ද්‍රව්‍ය බැහැරකරවීම) සිරුරගත අපද්‍රව්‍ය ශෝධනය (පිරිපහදුකිරීමේ ගුණය) මීපැණි තුළ පවතී.

ජලයේ දියවී ඇති බැක්ටීරියා සියල්ලම වැනසීමේ ශක්තිය ද මීපැණි සතුව පවතී.වකුගඩු හා අන්ත්‍ර ක්‍රියාකාරීත්වය ක්‍රමවත් කරවයි. වකුගඩු ක්‍රියාකාරීත්වය ක්‍රමවත් කිරීම නිසා Bed wetting  පාලනය කරවයි.

මේ නිසා ඉන්ද්‍රීය අක්‍රමවත්තාවයක් නොතිබී තියේනම් පමණක් මේ තත්ත්වය ළඟාකරගත හැක.

ආහාර රුචිය වර්ධනය කරවයි

නියම ස්වාභාවික මීපැණි මඟින් ඉන්සියුලීන් වර්ධනය කරවයි. ලේවල සීනි පාලනය කරවයි. මේ නිසා දියවැඩියා රෝගීන් සඳහා ගුණදායකය. වෙනත් පැණි රස වර්ගවලට සාපේක්ෂව මීපැණි හානිදායක නොවනු ඇත.

එසේ වුවත් රුධිරගත සීනි ප්‍රමාණය පිළිබඳ සැලකිලිමත් විය යුතුය.

බැක්ටීරියා වනසන ශක්තිය පවතින බැවින් මුඛ සෞඛ්‍යයට ද සහාය වේ.

සන්ධිගත ආබාධ ඇති රෝගීන් බටහිර වේදනා නාශක ඔසු පාවිච්චි කරති.

එවන් අයට වේදනා නාශකයක් ලෙස ස්වාභාවික මීපැණි සහ ඇපල් සයිඩර් විනාකිරි (වෙළෙඳ පොළෙන් ගත හැක) සංයෝගය ගුණදායකය.

මේස හැඳි 2 බැගින් සමානව හොඳින් මිශ්‍රකරගත යුතුය.

* ඔබ ශරීරයේ ශක්තිය උදෙසා ගනු ලබන ශක්ති ජනක පානවලට වඩා මීපැණි මඟින් මහඟු ශක්තියක් ස්වාභාවිකව ලබාදෙනු ඇත.

ව්‍යායාම කරන අයට මෙන්ම ක්‍රීඩකයන්ටද ශක්තිජනක පානයක් ලෙස මීපැණි උපයෝගී කරගත හැකිය.

මෙහිදී ගන්නා ප්‍රමාණය පිළිබඳ

සැලකිලිමත් විය යුතුය.

* දිනකට තේ හැඳි 2-3 නොඉක්මවිය යුතුය.

* අධිකවීමෙන් මත්ගතිය ඇතිවීමට පුළුවන.

සුවබර නින්දකට

නින්දට පෙර මීපැණි තේ හැඳි 2ක් ගැනීමෙන් මිනිත්තු කීපයක් තුළ සන්සුන් නින්දක් ළඟාකරගැනීමේ හැකියාව ඇතිවන්නට පුළුවන. බොහෝ දෙනකුට මෙය ප්‍රත්‍යක්ෂ බවට සනාථ වී ඇත.

* ලේවල සීනි අධික වූ අයට මෙය එතරම් හිතකර නොවනු ඇත.

සෙම වර්ධනය කිරීමේ හැකියාව ඇති බැවින් සෙම් රෝග ඇති අයට ගුණදායකය.

අතීතයේ පටන්ම කටහඬ පැහැදිලි කරගැනීම උදෙසා මීපැණි භාවිතකර ඇත. ස්වරයට හිතකර වේ.

රුව වඩන මීපැණි රහස්

මීපැණි රූපලාවණ්‍ය උදෙසා ද මහඟු මෙහෙයක් සිදු කරයි.

(face wash)  මුහුණ පිරිසුදු කරගැනීමේ ද්‍රාවණයක් ලෙස උපයෝගී කරගත හැක. හම පැහැපත් වේ.

මුහුණේ කුරුලෑ සඳහා

මීපැණි තේ හැඳි 1 ක් සමඟ කුරුඳු කුඩු තේ හැඳි මිශ්‍රකර ඒ මත ආලේපකර විනාඩි 10 පමණ තබා සිසිල් ජලයෙන් සෝදා හරින්න.

හිසකෙස් වියළි බව

නැතිකරගැනීම සඳහා

මීපැණි 2 ඔලිව් 1 යන අනුපාතයට මිශ්‍රකර කෙස්වල සම්පූර්ණ ආලේපකර විනාඩි 30 කින් පසු සිසිල් ජලයෙන් සෝදාහරින්න.

දෙතොල් වියළීම සහ දෙතොල් පැලීම ඇතිවිටදී දෙතොල මත ආලේප කිරීමෙන් මෙම අපහසුකාරී අවස්ථාවෙන් මිදිය හැක.

තවද රූපලාවණ්‍ය ගැන කතා කිරීමේ දී සැමටම අසහනකාරී තත්ත්වයක් වන උදරය මාංශපේශී ඉලිප්පී පෙනීම ද එම මේදය දහනයට මීපැණි උපකාරී වේ

මේ සඳහා උදෑසනම මීපැණි තේ හැඳි 2ක් සහ දෙහි බෑයක යුෂ මිශ්‍රකර බීමෙන් සහනයක් ලබාගත හැක.

මෙය කිරීමේදී පළමුව තම උදර වට ප්‍රමාණය මැන සටහන් කරගෙන දිගටම අවම වශයෙන් මාස තුනක්වත් පාවිච්චි කළයුතු වේ.

නැවත මාස තුනකින් පරීක්ෂා කිරීමෙන් ඔබට තත්ත්වය පිළිබඳ දැනගත හැක.

* උදරයේ ආම්ලික තත්ත්වය ඇති අය දෙහි මිශ්‍ර නොකර තනිකරම මීපැණි තේ හැඳි 2 ක් පමණක් ගැනීමට පරෙස්සම් විය යුතුය.

හිතකර මීපැණි විෂවන හැටි

මීපැණි පාවිච්චියේ දී ඒ හා සමඟ නුසුදුසු දේ එකතු කිරීමෙන් විෂ තත්ත්වයට පත්විය හැක.

1. මීපැණි උණු ආහාර සමඟ නොයෙදිය යුතුය.

ආයුර්වේද වෛද්‍ය විද්‍යාවේදී මෙය තහනම් කර ඇත. හේතු ලෙස විශේෂයෙන්ම දක්වා ඇත්තේ මීමැස්සා විවිධ මල්වලින් පැණි ලබාගෙන මීපැණි සකස් කරන නිසා එය විෂ විය හැකි බවයි. මේ තත්ත්වය ඇතිවනුයේ මීපැණි ද උණු ආහාර සමඟ එක්වීමෙන් මෙන්ම රසායනික විපර්යාසයකට භාජනය වීමෙන් විෂ තත්ත්වය නිර්මාණය වන නිසාය.

* මීපැණි උණුකිරීම ද නොකළ යුතුය.

* එසේ විෂ තත්ත්වයට පත්වූ කල මීපැණි සුදු භාජනයක දමා පරීක්ෂා කළහොත් කොළපාට ඉරි සේ දක්නට ලැබේ.

එසේම මෙසේ ගැනීමෙන් ශාරීරික සෞඛ්‍යය සම්බන්ධව අපහසුතා ඇතිවිය හැකිය.

ශරීරය තුළ උෂ්ණත්වය වැඩිවීම නිසා අරුචිය, පපුවේ දැවිල්ල ඇතිවීමට පුළුවන.

එසේම මෙසේ ගැනීමෙන් ශාරීරික සෞඛ්‍යය සම්බන්ධව අපහසුතා ඇතිවිය හැකිය. ශරීරය තුළ උෂ්ණත්වය වැඩිවීම නිසා අරුචිය, පපුවේ දැවිල්ල ඇතිවීමට පුළුවන.

2. රාබු යුෂ සමඟ නොගත යුතුය.

3. මීපැණි සමඟ මාළු වර්ග නොගත යුතු වේ.

4.මීපැණි හා ගිතෙල් සමාන වූ මාත්‍රාවෙන් (සම සමව) ගැනීමද විෂ තත්ත්වයක් ඇතිවීමට පුළුවන.

5. අන් කිසිදු තෙල් වර්ගයක් සමඟ මීපැණි නොගත යුතුවේ.

6. මීපැණි ශීතකරණය තුළ නොතැබිය යුතුය. ගුණ හීන වේ.

7. දිනකට උපරිම තේ හැඳි 2-3 කට වඩා නොගත යුතුය.

8. බිළිඳු දරුවන්ට නොදිය යුතුය.

ස්වාභාවික මීපැණි හඳුනාගැනීම

1. ඔබ වෙළෙඳපොළෙන් මීපැණි මිලදී ගැනීමට පෙර බෝතලයේ ඇති ලේබලය කියවන්න. එය ස්වාභාවික මීපැණි ද කෘත්‍රිම දැයි සඳහන්ව ඇත.

2. මහපටැඟිලි පරීක්ෂාව (Thumb Test)

ඔබගේ මහපටැඟිල්ලට මීපැණි ස්වල්පයක් ගන්න.

එම මීපැණි ස්වල්පය ඔබ මහපටැඟිල්ල වටා පැතිරේනම් එය ස්වාභාවික මීපැණි නොවේ.

3. අග්නි පරීක්ෂාව (The flame Test)

ස්වාභාවික මීපැණි දහනය වන බව ඔබ දන්නවා ද?

වියළි ගිනි කූරක් ගන්න එම ගිනිකූරේ දකුණු පස කෙළවරේ (වෙඩි බෙහෙත් නැති) මීපැණි බිංදු කිහිපයක් තබන්න.

ඉන්පසු තවත් ගිනි කූරක්ගෙන දල්වා එම මීපැණි බිංදුවට තබන්න. ඒවා පිරිසුදු ස්වාභාවික මීපැණි නම් ඉක්මනින්ම දහනය වේ.

වෛද්‍ය

කේ. එල්. ජී. අමරනායක

D.A.M.S.(S.L)
M.Ac.F phd (Acup s.l.)