අපිට ඉතාමත් වැදගත් දේවල් ගැන කියන විට කතාවට කියන්නෙ ඇස්දෙක වාගේ රැකගන්න කියලායි. දියවැඩියා රෝගින් සම්බන්ධයෙන් නම් මේ කතාව ඔවුන්ගේ ඇස් දෙකට වාගේම පාද සඳහාත් එකසේම වලංගුයි. වැඩි ගානකට නොගෙන නොසලකාහරින පුංචි සීරිමක් නිසා පාද කපා ඉවත් කරන්නට පවා සිදුවෙන ලොකු අවදානමක් දියවැඩියා රෝගියකුට ඇතිවන්න පුළුවනි. පළමු වැදගත්ම දේ තමයි දියවැඩියා රෝගියා මෙම අවදානම ගැන දැනුවත් කිරීම. දෙවනුව ඔවුන් දියවැඩියා රෝගින් තම පාද ගැන විශේෂ අවධානයක් යොමු කළ යුත්තේ ඔවුනට පාදයට සිදුවන අනතුරු නොදැනෙන නිසායි. එය එම රෝගය නිසා ඇතිවන ස්නායුගත තත්ත්වයක්. මේ නිසා පුංචියට හටගන්නා සීරිමක්  වැනි කඩතොලු වීමකට දිගින් දිගටම අනතුරැ සිදුවී තුවාලය ඉතා දරුණු තත්ත්වයකට පත්විය හැකියි. ඔවුන් පාද සාත්තුව කළ යුතු ආකාරයයි මේ. 

දිනපතා දෙපා ‍සෝදා වියළිව තබාගන්න!

දිනපතා විශේෂයෙන්ම රාත්‍රී නින්දට පෙර පාද පිළිබඳ හොඳින් විපරම්කර බලන්නත් පාද දෙක මඳ උණුසුම් වතුරෙන් හොඳට හෝදා වියළන්නත් කටයුතු කළ යුතුයි. මෙහිදි කිසිවිටෙක තද උණු වතුර යොදා ගත යුතු නෑ. විශේෂයෙන්ම ඇඟිලි අතර නිසි ආකාරයෙන් වියලුනේ නැත්නම් දිලීර වර්ධනය වෙන්න ඉඩ තියෙනවා. එවිට කැසීම මගින් අපි තුවාල ඇති කරගැනීම නිතැතින්ම සිදුවෙනවා. ඒත් ස්වභාවයෙන්ම පාද වියළී සමක් සහිතව සිටින අයට පුළුවන් පාද සෝදලා හොඳට වියළලා මෘදු තෙත්කාරක ක්‍රීම් වර්ගයක් (Moisturize) ආලේප කරන්නට. ඒත් කිසිම වෙලාවක පාදයේ ඇඟිලි අතරේ ඒවා ආලේප කළ යුතු නෑ. 

පාද දිනපතා හොඳින් පරික්ෂා  කරන්න!

වෙනත් කෙනකු ලවා පාද පරීක්ෂාකරගන්නට නොහැකි විට තමන්ම දෙපා දිනපතා  පරීක්ෂා කරගත යුතුයි. එහිදී ප්‍රමාණය ලොකු කර පෙන්වන අත් කාචයක් හෝ මුහුණු බලන පුංචි කණ්නාඩියක් හෝ උදව් කරගන්න පුළුවනි. එවිට පාදයේ යටි පතුළත් හොඳින් නිරීක්ෂණය කරන්න පුළුවන්. මෙය සිදුකළ යුත්තේ හොඳට එළිය තියෙන තැනකදි. මොකද අපි උත්සාහ කරන්න ඕන පාදයේ පුංචි හරි සීරීමක්වත් තිබේද කියල හඳුනගන්න.

එහෙම හඳුනගත්තොත් ඉක්මනින්ම එය පිරිසුදු ඖෂධීය ප්ලාස්ටර් කැබැල්ලකින් ආවරණය කරල නිසි වෛද්‍ය උපදෙස් ලබා ගන්න අවශ්‍ය වෙනවා. තුවාල විතරක් නොවෙයි, හමේ පාට වෙනස්වීමක්, ඒ කියන්නේ අවපාට, කළු පාට හෝ සාමාන්‍ය පාටට වඩා තද වර්ණයක් ඇති වෙලාද කියලා හොඳින් බලන්න. එහෙම වෙලා නම් ඒ පාදයේ එම ප්‍රදේශයට ලැබෙන  ලේ ප්‍රමාණය අඩුවෙලා නිසා විය හැකියි. එය අවදානමක්! වහාම වෛද්‍ය උපදෙස් පතා යොමුවන්න.   

ඉන් පසු පුළුන් කෑල්ලක් අරගෙන පාදයේ ඇඟිලිවල සිට ඉහළට තැනින් තැන ස්පර්ශ කර බලන්න. එම ස්පර්ශය හොඳින් දැනෙන්නේ නැත්නම් මේ බව ඔබේ වෛද්‍යවරයාට දන්වන්න. දියවැඩියාව නිසා ස්නායුවලට හානි වීමෙන් කිසිවක් නොදැනී යන නියුරෝපති තත්ත්වය හටගන්න පුළුවනි.

පාදයේ නියපොතු කැපීම හරියට හරස් අතට සිදුකළ යුතුයි!

මේ ගැනත් හොඳ අවධානයක් යොමු කරන්න ඕන. තරමක් කොටට හරස් අතට නිය කැපුවාම ප්‍රමාණවත්. වැඩි හොඳට නිය හුඟක්ම කෙටි කරන්න ගියොත් වෙන්නේ අපිම තුවාල ඇති කරගන්න එක. බොහොමයක් රෝහලට  එන්නේ “නිය කෙළවර ඉදිමිලා  පැසවලා. ඊට පස්සේ තුවාලේ ඔඩු දිව්වනේ…!” කියාගෙන. ඒ එක්කම කියන්න ඕන කිසිම වෙලාවක “ගල් තැළුම්” එහෙම නැතිනම් පාදයේ තියෙන ගැටිති ගෙදරදි බ්ලේඩ් එකකින් කපන්න උත්සාහ කරන්නවත් එපා. අනිවාර්යයෙන්ම වෛද්‍යවරයකුගේ උපකාරයෙන් තමයි මේවා කළ යුතු වන්නේ. ඊළඟට නිය ආශ්‍රිතව හටගන්නා දිලීර ආසාදන. මේවා පිරිසුදු කර ඖෂධ යෙදීම කළ යුතුයි.

ඉදිරිපස පුළුල් වූ පාවහන් පැළදීම!

රෑ වගේම දිවා කාලයේදිත් සැමවිම ඇවිදින විට පාදය හොඳින් ආවරණය වන විදියට පාවහන් පළඳින එක හොඳ ආරක්ෂක උපක්‍රමයක්. හැබැයි එම පාවහන් පාදයට හුඟක් තද නැති මෘදු ඒවා නම් තමා වඩාත්ම හොඳ. ඉදිරි කෙළවර  උල් නොවූ පුළුල්ව ඇති පාවහන් භාවිත කළ යුතුයි. ඒ සඳහා විශේෂ පාවහන් වෙළඳපොළේ ගන්නට තියෙනවා. පාවහන්  පළඳින්නේ නැතිව ඇවිදින්න එපා. එතකොට අපට නොදැනෙන පුංචි තුවාල ඇති වෙනවා. ඒවා හොඳටම ප්‍රමාණවත් මහා අනතුරක් ඇති කරන්නට තවත් දෙයක් මේ පාදවලට තද උණුසුමත් හරිම භයානකයි.

පාදයේ ලේ ගමනාගමනයට උපකාර කරන්න!

මෙහිදි පුටුවක වාඩිවෙන විදිය පවා හරිම වැදගත්. කිසිම වෙලාවක් පාදයේ පහළට ලේ ගමන් කිරීමට බාධා වන විදියට පාදයක් පිට පාදයක් හරස් අතට තියාගෙන ඉන්න එපා. හුඟ වෙලාවක් වාඩි වෙලා ඉන්න සිද්ධවෙනවා නම් වරින් වර පාදය සොලවන්න එපා. ඇඟිලි දිග හරින්න. එතකොට ඒ ප්‍රදේශයට ලේ සැපයුම යථා තත්ත්වයට පත් වෙනවා. පාද සම්භාහනය ඉතා වැදගත් සත්කාරයක්. 

ඖෂධ නිසිලෙස  නිසිකලට! 

මේ අතරේ තමාගේ දියවැඩියාව පාලනයට අදාළ ඖෂධ නිසිලෙස නිසිකලට ගැනීමත්, ආහාර සහ ව්‍යායාම ගැනත් අවධානය තබා ගත යුතුම වෙනවා. ඒ වගේම දුම්පානය නොකිරීම ඉතාමත් වැදගත්!

දුම්පානය මගින් ලේ නාල, විශේෂයෙන්ම පාදවල රුධිර වාහිනීවල රෝග තත්ත්ව ඇති වෙලා පාදයේ නිරෝගී බව අඩු කරන්නට පුළුවන්.

 සුගත්

මනස කියන්නේ අතිශයින්ම සංකීර්ණ සිතුවිලි මධ්‍යස්ථානයක්. මනස සහ කය මේ දෙක එකිනෙකට බැඳුණු වෙන් කළ නොහැකි සංකීර්ණ ක්‍රියාවලියක් කීවොත් නිවැරදියි. කය නැතිව මනසවත් පවතින්න බැහැ. ඒත් සමහර අය විශ්වාස කරනවා කය නැතිව මනසේ ක්‍රියාකාරීත්වය පවතින්න පුළුවන් බව. සමහර විට මනෝකාය කියන්නේ මේ දෙය වෙන්න පුළුවන්. අපි මෙය පුංචි කතාවක් ඇසුරෙන් සොයා බලමු.

ඇගේ නම නයෝමි. වයස අවු. 23යි. නයෝමි විවාහ වෙලා අවු. 2යි. මාස 6ක පුංචි දරුවකුත් සිටිනවා. නයෝමිගේ සැමියා ආයතනයක කළමනාකාරවරයකු ලෙස සේවය කරනවා. තව මාස දෙකකින් තම සැමියාට ශිෂ්‍යත්වයක් ලැබී අවු. 2කට තමා හැර දමා වෙන රටකට යාමට සූදානම් බව දැනගත් නයෝමි දැඩි කම්පනයකට පත්වී සිටියා. මේ ළඟකදී සිට ඇයට දැනුන අපූරු අත්දැකීමක් පිළිබඳ නයෝමි මෙසේ විස්තර කළා. 

&එදා රෑ 7ට විතර ඇති. මගේ මහත්තයා වැඩට ගිහින් ගෙදර ඇවිත් හිටියේ නැහැ. මමයි බබයි දෙන්නා විතරයි ගෙදර හිටියේ. බබාට කිරි දීලා ඉවර වෙලා මම කාමරෙන් එළියට ආවා. ගෙදර සාලෙ ලයිට් එකත් දාලයි තිබුණේ. එදා මම දැකපු සිද්ධිය මට හිතාගන්නවත් බැහැ. මම වගේම තව කෙනෙක් සෙටියේ වාඩි වෙලා ඉන්නවා. මම දෙතුන්සැරයක්ම හොඳට බැලුවා. මොකද මට හරියටම දැනගන්න ඕන වුණා ඒ ඉන්නේ මමද කියලා. ඇත්තටම ඒ හිටියේ මම. නමුත් පුදුමය වුණේ ඇයට තිබුණේ මගේ සිතුවිලි නම් නෙවෙයි. මට දැනුණේ මගේ කය සමඟ වෙනත් සිතුවිලි තියෙන ගැහැනියක්. දවස් දෙක තුනක්ම මම මේ විදිහට මේ දේ දැක්කා. මගේ මහත්තයාට මේක කීවම ඔහු විශ්වාස කළේ නෑ. අපි දෙන්නම එකතු වෙලා පේන කියන තැනකට ශාස්ත්‍ර අහන්න ගියා. ඒ ශාස්තරකරැ කීවේ අපි ජීවත් වන ඉඩමේ භූමි දෝෂයක් තියෙනවා කියලා. ඒ භූමියට අරක්ගත් භූතයෙක් සිටින බවත්, එම භූතයා ඉන් ඉවත් කිරීමට ලොකු යාගයක් කළ යුතු බවත් ඔහු පැවසුවා. අපි ඉතින් යාගයකුත් කළා. මේ යාගයට රුපියල් 50,000ක් පමණ වියදම් වුණා. ඊට පසු මාස දෙකක් පමණ මේ සිද්ධිය මම දැක්කෙ නෑ. ඒත් දැන් ආයෙමත් ඒක පේන්න පටන් ගත්තා.

නයෝමි දුටු මේ මනෝකාය කුමක්ද? 

අපි තවත් මෙවැනිම කතාවක් පිළිබඳ සොයා බලමු. ඇගේ නම සුජීවා. වයස අවු. 25යි. විවාහ වී අවු. 5ක් වන සුජීවාට අවු. 2ක දරැවෙක් ද සිටී. ඇගේ ස්වාමියා බැංකු නිලධාරියෙක්. ඔහුගේ නම රංග. සුජීවා සහ රංග විවාහ වුණේ අවු. 5ක ආදර සම්බන්ධතාවයකින් පසුවයි. නමුත් දැන් මාස 6ක පමණ කාලයක සිට දෙදෙනා අතර නිතරම රණ්ඩු දබර. මීට හේතුව මාස කීපයකට පමණ පෙර රංගගේ දුරකතනයේ තිබූ SMS පණිවිඩයයි. මෙම දුටු සුජීවා රංග පිළිබඳ දැඩි සැකයක් උපදවා ගත්තා. එදා සිට දිනපතාම දෙදෙනා අතර වාද විවාද, රණ්ඩු දබර කිසිම අඩුවක් වුණේ නැහැ. මේ සැකය සමඟ සුජීවා දැඩි අසරණභාවයකට ද පත් වුණා. ඇති වූ මේ කම්පනය කියන්න ඇයට හොඳ යාළුවෙක් ද සිටියේ නැහැ. මෙහෙම ඉන්න විට දවසක් සුජීවා අපූරැ අත්දැකීමකට මුහුණ දුන්නා. ඇගේ අත්දැකීම ඇය මෙසේ විස්තර කළා.

ඒක හීනයක් නම් නෙවෙයි. හැබැයි දවල් හීනයක් කියලා කීවොත් නම් වැරදි නෑ. මට හිටිහැටියේම දැනෙනවා මගේ වටපිටාව සම්පූර්ණයෙන් වෙනස් වෙලා. මේ ළගදි දවසක් මට දැනුණෙ මගේ වටේට ලස්සන මල් වත්තක්. ලස්සනට මල් පිපිලා මල්වල සුවඳ මට හිතාගන්න බෑ. මේ මල් වත්තේ මගේ ශරීරය පාවෙලා යනවා මට දැනුණා. එහෙම යනකොට මට අලුත් පෙම්වතෙක් හමුවුණා. ඔහු මගේ අත අල්ලගෙන ආදර බස් තෙපලමින් ඒ මල් වත්තේ අපි ඇවිදගෙන යනවා. මට හිතාගන්න බෑ. මම වගේම තව කෙනෙක් අලුත් පරිසරයක්, අලුත් පෙම්වතෙක්. කොහොමද එහෙම වෙන්නේ. දැන් සති ගාණක් තිස්සේ මම මෙවැනි දේවල් දකිනවා. මට වෙලාවකට හිතෙනවා වෙන ආත්මයක් මගේ ශරීරයට ඇතුළු වෙලාද කියලා. මේ ගැන රංගට කීවම රංග හයියෙන් හිනාවෙනවා. ඔහු කියනවා මට පිස්සු කියලා.

සුජීවා දකින මේ දවල් හීනය කුමක්ද?

නයෝමි සහ සුජීවා මුහුණ දෙන මෙම අවස්ථා දෙක අධ්‍යයනය කිරීමේදී මේ දෙදෙනාගේම මනස සහ කය තාවකාලිකව ඔවුන්ගෙන් වෙන් වී වෙනත් ස්ථානයකට ගොස් තිබෙන බව පැහැදිලි වේ. මෙය ඔවුන්ගේ මනෝකාය තාවකාලිකව වෙන්වීමක් ලෙස දැකිය හැක. මීට අමතරව සුජීවා අපූරු අත්දැකීමකට ද මුහුණ දේ. එනම් සම්පූර්ණ වෙනස් පරිසරයක තමාගේ මනස සහ කය ජීවත් වන ලෙස දැකීමයි. එය සැබැවින්ම චිත්‍රපටයක රෑප රාමුවක් ඇතුළේ තමා රඟපාන අයුරු තමන් නරඹනවා වැනිය.
අපි ඕනෑම කෙනකු දැඩි මානසික කම්පනයකට ගොදුරැ වූ විට, ඉන් ගැලවීමට නොහැකි සේ අතරමං වූ විට අපගේ මනස ආරක්ෂා කිරීමට ආරක්ෂණ උපක්‍රමයක් ලෙස මනස සහ කය තාවකාලිකව අපගෙන් වෙන් වේ. මනසේ සිදුවන මෙම ප්‍රතික්‍රියාවට විඝටනය (Dissociation) කියලා කියනවා. නයෝමි සහ සුජීවා යන දෙදෙනාම අත්විඳිනුයේ විඝටනය (Dissociation) නම් වූ මේ මානසික ප්‍රතික්‍රියාවේ විශේෂ අවස්ථා දෙකකටය. ඒවා නම්,

1. ඒක පුද්ගල ව්‍යුක්තිය (Depersonalization)

පුද්ගල ව්‍යුක්තිය යනු මනස සහ කය තමාගෙන් වෙන් වී වෙනත් ස්ථානයක තිබෙන සේ දැනීම හෝ දැකීමයි. නයෝමි අත්විඳිනුයේ මෙයයි.

2. තම වටපිටාව හාත්පසින්ම වෙනස් ලෙස දැකීම (Dereatization)

මෙහිදී තම වටපිටාව සම්පූර්ණයෙන්ම වෙනස් වී වෙනස් පරිසරයක අපූරු අත්දැකීමක් ලෙස දැනීමයි. සුජීවා අත්විඳිනුයේ මෙයයි.

ඕනෑම නිරෝගී කෙනකු එනම් ප්‍රජාව තුළ 70%ක් පමණ මෙවැනි තත්ත්වයන් අත්විඳින බව සමීක්ෂණවලින් සොයාගෙන ඇත. නමුත් මෙය මානසික රෝගී තත්ත්වයක් ලෙස හඳුනාගනු ලබන්නේ මෙවැනි සිදුවීම් තමාගේ එදිනෙදා ජීවිතයට දැඩි බලපෑමක් ලෙස දැනේනම් පමණි.

නෙත් මානසික සහ කායික රෝගී තත්ත්වයන් සමඟ ද ඉහත ආකාරයට මනස විගමනය විය හැකිය. එම රෝගී තත්ත්වයන් නම් භින්නෝන්මාදය, දැඩි මානසික අවපීඩනය, ග්‍රස්ටිය (OCD), දිවිද්‍රැව රෝගය, බෝඩලයින් පෞරැෂ භින්නතාවය, අපස්මාරය, රුධිරයේ සීනි අඩුවීම, තෛයිරොක්සීන් ඌනතාවය යනාදියයි.

මෙවැනි තත්ත්වයකට ගොදුරැ වූ ඔබ මිත්‍යා විශ්වාසවලින් බැහැර වී මනෝ වෛද්‍ය ප්‍රතිකාර සහ උපදේශනයට යොමු විය යුතුය. මෙය භූත බලපෑමකින් හෝ වෙනත් අත්භූත බලපෑමකින් සිදු නොවන මානසික තත්ත්වයක් බව දැන් ඔබට වැටහෙනවා ඇත. සුජීවා සහ නයෝමි පහත සඳහන් ලෙස මනෝ විද්‍යාත්මක උපදේශනයට යොමු කිරීමෙන් දෙදෙනාම ගොදුරැ වී සිටි දැඩි ආතතිය අවම වී යථා තත්ත්තවයට පත් වූහ. ඔවුන්ට ලබා දුන් උපදේශනයේ අවස්ථා මෙසේ විය.

හැඟීම් බෙදා ගැනීම
(Emotional Ventilation)

අනාගතයට ඇති බිය අවම කිරීම
(Reduced fear response)

රෝගය පිළිබඳ වැරදි විශ්වාස
(Reduced mistaken view)

අනාගත අරමුණු පැහැදිලි කර දීම
(Goal Setting)

ස්වාමියා සමඟ සම්බන්ධතාවය වැඩිදියුණු කිරීම
(Improve Relationship)

ශරීරය සැහැල්ලු කිරීමේ ව්‍යායාම
(Relaxation Exercise)

අවිද්‍යාව බැහැර කර ජීවිතයට මනෝ විද්‍යාව යොදාගත හැකි ආකාරය මේ සත්‍ය කතා දෙකෙන් ඔබට මනාවට පැහැදිලි වේ.

කිරිබත්ගොඩ මූලික රෝහලේ 
මනෝ වෛද්‍ය නයනානන්ද කුමාරනායක

වර්තමානයේදී පිළිකා රෝගයෙන් පීඩාවිඳින රෝගීන් සංඛ්‍යාව ඉතා විශාලය. ඇතැම්විට මෙය සාමාන්‍ය රෝග තත්ත්වයක් ලෙසද වර්ධනය වීය හැක. නවීන විද්‍යාවට අනුව පිළිකා රෝග සඳහා විවිධ වෛද්‍ය ක්‍රම අනුගමනය කළද ඇතැම්විට රෝගය මුල් කාලයේදී හඳුනා නොගැනීම හේතුවෙන් කාලයත් සමඟ රෝගය උත්සන්න වීමට පුළුවන.
ආයුර්වේද වෛද්‍ය ක්‍රමයට අනුව පිළිකා රෝගය සුවකරගැනීමේ හැකියාවක් පවතී. ආයුර්වේදයට අනුව ඖෂධ, තෙල් සාත්තුව, දුම් ඇල්ලීම, පත්තු බැඳීම මගින් පිළිකා රෝගය සුවකරගත හැක.

පිළිකා රෝගය උත්සන්න වීමට ප්‍රධාන හේතුව වන්නේ මෙම රෝගය වැළඳී ඇති බව රෝගියා නොදැන සිටීමය. රෝග ලක්ෂණ එකක් හෝ කිහිපයක් පෙන්නුම් කළද ඇතැම්විට රෝගය උත්සන්න වනතෙක් රෝග ලක්ෂණ පෙන්නුම් නොකරන අවස්ථාද පවතී.

කෙසේ වෙතත් රෝගයට ප්‍රතිකාර කිරීමට පළමුව රෝගය හඳුනාගැනීම සඳහා ආයුර්වේද පිහිට පැතීම ඉතාමත් වටී. පිළිකාවක් යම් කෙනකුට වැළඳී ඇත්නම් පහත දැක්වෙන රෝග ලක්ෂණ එකක් හෝ කිහිපයක් ඇතිවීමට පුළුවන.
ශරීරයේ කුමන හෝ ස්ථානයක ඇතිවන ඉදිමීම.

වේදනාව

ශරීරයේ බර අඩුවී කෙට්ටු වීම.

ඇඟේ ශක්තිය දුර්වල වීම.

කාලයක් තිස්සේ පවතින, විශේෂයෙන් සවස් කාලයට සිරුරෙහි ඇතිවන වේදනාව, ඇඟට උණ ගතියක් මෙන් දැනීම.

යම් තුවාලයක් කාලයක් තිස්සේ සුවනොවී පැවතීම.

වසා ගැටිති (කුද්දටි) ඉදිමීම.

අදාළ ස්ථානයේ ළප කැළැල් හෝ කැසීම් වැනි තත්ත්වයක් ඇතිවීම.

මුඛය ආශ්‍රිත පිළිකාවක් නම්

තුවාලයක් ආකාරයට කැළැල් දියවීම, විදුරුමස් ආශ්‍රිතව වේදනාව, රතු කළු හෝ සුදු පැහැයට පුල්ලි මතුවීම, සියුම්

වේදනාව

ගලනාලය ආශ්‍රිත පිළිකාවක් නම්

නිතර නිතර කටට කෙළ ඉනීම, උගුරට සෙම ගතිය දැනීම, උගුර හිරවෙන ගතියක් දැනීම, සෙම විශාල ලෙස පිටවීම සහ එම සෙමත් සමඟ සැරව ලේ ආදිය පිටවීම, ආහාර අප්‍රිය වීම, ආහාර ගිලීමට අපහසු වීම, පපුව ප්‍රදේශයේ දැනෙන වේදනාව, කැස්ස සහ හතිය ස්වභාවය.

පෙනහැල්ල ආශ්‍රිත පිළිකාවක් නම්

ඉහත කී පොදු ලක්ෂණ මෙන්ම කැස්ස, වියළි කැස්ස, සෙම සමඟ සැරව පිටවීම, සෙම සහිත රුධිර බින්දු පිටවීම, වෙහෙසෙන විට හුස්ම ගැනීමට අපහසු වීම, පිට ප්‍රදේශයේ ඉදිමුම් ස්වභාවය, සමෙහි ඇතිවන කළු පැහැගැන්වීම හෝ පුල්ලි ආකාරයක් මතුවීම, රුධිර පරීක්ෂණයේදී හිමොග්ලොබින් (Hb) අඩුවීම.

ගර්භාෂය ආශ්‍රිත පිළිකාවක් නම්

යෝනි මාර්ගයෙන් දියර මෙන් පිටවීම, යෝනි මාර්ගයෙන් සැරව හෝ ලේ පිටවීම, දුඹුරු හෝ කළු දියරයක් පිටවීම සහ එය දුගන්ධයකින් යුක්ත වීම, යටිබඩේ වේදනාව, බර ගතිය, තනපුඩු වේදනාකාරී වීම, සුදු පැහැති දියරයක් හෝ සැරව ගතියක් තනපුඩුවලින් පිටවීම, කොන්ද ප්‍රදේශය වේදනාවක් ඇතිවීම, කකුල්වල කැක්කුමක් ඇතිවීම, යටිබඩ ප්‍රදේශයේ බර ගතියක් දැනීම, දින විසිඅටකට වරක් නිවැරදි සිදුවන ඔසප් චක්‍රය වෙනස්වීම, උකුල ප්‍රදේශයේ ඇතිවන වේදනාව.

උගුර ආශ්‍රිත පිළිකාවක් නම්

කටහඬ වෙනස්වීම, උගුරේ ලේ රසය දැනීම, උගුරේ ඉදිමුම, හුස්ම ගන්නා විට ඇතිවන ශබ්දයේ වෙනස්කම්, කෑම ගිලීමේ අපහසුව, නිතර ඇතිවන කැස්ස, උගුරේ සෙම ගතිය නිතරම ඇතිවීම, සෙම සමඟ රුධිරය පිටවීම.

අක්මාව ආශ්‍රිත පිළිකාවක් නම්

උදරය පුරවා දැමීම, උදරයේ වතුර එකතුවීම, උදරය ඉදිමීම, කෑම අප්‍රිය වීම, උණ ගතිය, ක්ලාන්තය, නිතර ආම්ලික රසයක් උගුරේ පැවතීම, ඇඟට දැනෙන අප්‍රාණිකත්වය, ඇස් කහ පාට වීම, සිරුර කහ පැහැයක් ගැනීම, හුස්ම ගැනීමට අපහසුතාවයක් ඇතිවීම.

මොළය සහ හිස ආශ්‍රිත පිළිකාවක් නම්

හිසරදය, කැරකැවිල්ල, හිසේ පැත්තක් හෝ මුළු හිසේම ඇතිවන වේදනාව, අත් පා හිරිවැටීම, නාසයෙන් මුඛයෙන් කන්වලින් රැධිරය පිටවීම, හිසේ බර ගතිය, හිස ඉදිමීම, අත්පාවල ආප්‍රාණික බවක් ඇතිවීම.

මේ ආදී රෝග ලක්ෂණ ඒ ඒ රෝගවලදී ඇතිවිය හැක. මේ රෝග ලක්ෂණ ඇත්නම් වහාම සුදුසුකම්ලත් ආයුර්වේද වෛද්‍යවරයකු මුණගැසී අවශ්‍ය ප්‍රතිකාර හා උපදෙස් ලබාගන්න. පිළිකා රෝගය සඳහා ඉතා සාර්ථක ප්‍රතිකාර ආයුර්වේදයේ පවතින බැවින් ඒ සඳහා රෝගියා විසින් සුදුසුකම්ලත් වෛද්‍යවරයකු මුණගැසීම ඉතා වැදගත් වේ.

ආයුර්වේදයෙන් පිළිකා රෝග සඳහා ප්‍රතිකාර ඉදිරි සතියෙත්