ආකාර්මීකරණය හා නාගරීකරණය නිසා අද දවසේ මිනිස් ජීවන රටාව අතිශයින්ම සංකීර්ණ වී ඇත. ආහාර රටාව මෙන්ම එදිනෙදා ක්‍රියාකාරකම් කෙරෙහිද එහි බලපෑම් ඇතිවී තිබේ. මේ නිසා දියවැඩියාව, අධිරුධිර පීඩනය, හෘද රෝග, පිළිකා ආදී බෝනොවන රෝග සුලභ වී පවතී.

අද මුළු මහත් සමාජයේම පිළිලයක් සේ පැතිරයන ප්‍රමේහ රෝග පිළිබඳව ඉතා පැහැදිලි විවරණයක් මීට අවුරුදු දහස් ගණනකට පෙර පුරාණ පොත්පත්වල සඳහන් වේ.

බෝනොවන රෝග වැළඳුණු පසු සුවකිරීම එතරම් ලේසි පහසු නොවේ. මේ නිසා අප විසින් කළ යුත්තේ රෝගය ඇතිවීමෙන් වැළකීමත්, රෝගය වැළඳී ඇති අයෙක් නම් සංකූලතා ඇතිවිය හැකි උපද්‍රව හැකිතාක් අවම කරගැනීමත්ය.

දියවැඩියා රෝග තත්ත්වයේදී රෝගියාගේ රුධිරගත සීනි මට්ටම සාමාන්‍ය පැවතිය යුතු අගයට වඩා ඉහළ අගයක් ගනී. මෙය දීර්ඝකාලීනව පාලනය නොකළහොත් විවිධ සංකූලතා හටගනී. මෙය ඉතාමත් බරපතළ ලෙස බලපෑම් ඇතිකරයි.

සිරුරේ සෛලවලට ඇතුළු නොවී රුධිරගතව ග්ලූකෝස් පැවතීම නිසා කෙතරම් ආහාර ලබාගත්තද, සෛලවලට අවශ්‍ය තරම් ශක්තිය නිපදවීම සිදුනොවීම මත සිරුරේ බර අඩුවේ. ඉක්මනින් වෙහෙසට පත්වේ. පසුකාලීනව ඇස්, වකුගඩු, හෘදය, ස්නායු ආදී ඉන්ද්‍රියන්ට හානි සිදුවිය හැක.

දියවැඩියාව නිසා ඇතිවන අක්ෂි ආබාධ පිළිබඳව අවධානය යොමුකළහොත් වර්තමානයේ එය diabetic retinopathy ලෙස දක්වයි. දියවැඩියාව වැළඳීමෙන් ශරීරය පුරාම රුධිරයේ යම් යම් බලපෑම් ඇතිවිය හැක. ඇස සම්බන්ධයෙන්ද එසේය. ඇසට රුධිරය ගෙන යන්නේ එක් රුධිරවාහිනියකිනි. එය කේශනාළිකා ලෙස ඇස තුළදී බෙදීයයි. ඇසෙහි රුධිර කේශනාළිකා අවහිර වීමක් සිදුවුවහොත් එය භයානක ඵලවිපාක ඇතිකරවන්නකි.

මෙහිදී සිදුවන්නේ ඇසෙහි සියුම් රුධිර නාළ අවහිරවීමයි. එහි ප්‍රතිඵලයක් ලෙස ඇසට ගලන ලේ ප්‍රමාණය සැලකිය යුතු මට්ටමකින් අඩුවේ. එහිදී ශරීරය යම්කිසි හැඩගැසීමකට ලක්වේ. මෙහිදී සිදුවන්නේ සියුම් විකල්ප රුධිර නාළ අලුතින් නිර්මාණය වීමයි. ඒ හැරුණුවිට ඇසට හානිකර වන්නාවූ රසායනයක් උත්පාදනය වීමද සිදුවේ.

ඇසේ මේ ආකාරයෙන් අලුතින් හටගන්නා රුධිර නාළ ඇසේ පෙනීම වැඩිකිරීමට උදව් වන්නේ නැත. සාමාන්‍ය ව්‍යවහාරයේ භාවිත වන ආකාරයෙන් ‘ඇසේ සිවිය’ හැකිලීමටද ලක්වේ. මෙහිදී ඇසේ සිවියට ලේ ගැලීමක් ඇතිවිය හැකි අතර ඒ ආකාරයට ඇස අභ්‍යන්තරයේ ලේ ගැලීමක් සිදුවුවහොත් එය ඉතා භයානකය. අන්ධභාවයෙන් කෙළවර වීමට ද පුළුවන.

මේ තත්ත්වය ඇතිවීමේ අභියෝගය හමුවේ වැදගත්ම උපදේශය වන්නේ තමන්ගේ දියවැඩියා තත්ත්වය පාලනය කරගැනීමයි. දියවැඩියා රෝගීන් සෑම වසරකටම අවම වශයෙන් එක් වතාවක් හෝ ඇස් පරීක්ෂා කිරීම සිදුකළ යුතුය. එමගින් මෙවැනි බරපතළ සංකූලතා ඇතිවීම වළක්වාගත හැක.

දියවැඩියා රෝගය නිසි ආකාරයෙන් පාලනය කිරීම සිදුනොකළහොත් රෝගියා බරපතළ උපද්‍රවයන්ට ලක්විය හැක. ඇතැමෙක් මේ රෝගය තිබෙන බවට දැනගන්නේ එවන් සංකූලතාවයක් ඇතිවූ විටය.

ආයුර්වේද වෛද්‍ය විද්‍යාවේ ප්‍රධාන අරමුණු දෙකකි. එනම් නිරෝගී පුද්ගලයකුගේ නිරෝගී බව ආරක්ෂා කිරීම මෙන්ම රෝගියාගේ රෝගී බව දුරුකිරීමයි. රෝගයක් ඇතිවීමට පෙර ඉන් ආරක්ෂා වීමට පියවර ගැනීම සම්බන්ධ සංකල්පය (prerenition) දැන් වසර ගණනාවකටත් වඩා පැරැණිය.

රෝගයක් ඇතිවීමට පෙර එය පාලනය කිරීමට පියවර ගැනීමට වඩා අප වැඩි අවධානයක් යොමුකළ යුත්තේ රෝගයෙන් වැළකීමටය. සරල ජීවන රටාවක් තුළින් යහපත් පෝෂණ සිරිත් ඇතිකරගැනීම, ව්‍යායාමය හා විවේකය ආදී කරුණු දියවැඩියාව මර්දනයට අතිශයින්ම ඉවහල් වේ. ළමා කාලයේදී ගන්නා වැරදි ආහාර, වැරදි විහරණ නිසා ඇතැමෙක් ළමා කාලයේදී ද, තවත් අය තරැණ හා වැඩිහිටි අවදියේදී ද දියවැඩියාවට ගොදුරුවෙති. එබැවින් කුඩා කාලයේ සිටම නිවැරදි ආහාර ගැනීමටත් සෞඛ්‍ය සම්පන්න ජීවිතයකට අනුගත වීමටත් සිතාගත යුතුය.

►කුමුදුනී ද සිල්වා
ආයුර්වේද වෛද්‍ය 
B.A.M.S (කොළඹ විශ්වවිද්‍යාලය)
සෙත්සුව ආයුර්වේද රෝහල

ඔබ දුම් නොබොන කෙනකු වුවත් තවත් කෙනකුගේ දුම්බීම නිසා හෝ එවැනි පරිසරයක ජීවත් වීමට ලැබීම නිසා නොදැනුවත්වම රෝගියකු විය හැකිය. සමහරවිට මෙය සිදුවිය හැක්කේ ඔබගේ නිවෙස තුළදීමය. දරුවන් දුම් නොබොන නමුත් පියා හෝ අනෙකුත් සහෝදරයන් දුම්බොන පරිසරවල ජීවත් වීමට බොහෝ දරුවන්ට අද එය සිදුවී ඇත. පියා නිවෙස තුළ දුම්බොන විට අසරණ වන දරුවාට හෝ බිරිඳට එය වැළැක්වීමට හැකියාවක් නොමැත. සමහරවිට ඔබ අවන්හලක් තුළදී අකමැත්තෙන් වුවත් තවකෙකුගේ දුම්වැටියට නිකරුණේ ගොදුරු විය හැකිය. පියාගේ දුම්බීම නිසා දරුවකු ලෙඩවුණු ආකාරය පහත සඳහන් සත්‍ය කතාව ඇසුරෙන් බලමු.

පසිඳුගේ වයස අවුරුදු 12 යි. ඉතා හොඳින් තම අධ්‍යාපන කටයුතු කරගෙන යන පසිඳු නිතර පවතින හිසේ කැක්කුමකට ගොදුරු විය. ඒ සමඟම නොනවතින වියළි කැස්සක්ද ඇතිවිය. පාඩම් වැඩ කටයුතු කිරීමට තිබූ උනන්දුව අඩුවිය. නිතර තරහ යන සහ ඉවසුම් නැති ස්වභාවයක්ද ඇතිවිය. ස්නායු පිළිබඳ විශේෂඥයන් කීපදෙනකුගෙන් ප්‍රතිකාර ගත්තද හිසේ කැක්කුම අඩු නොවීය. අපි ළඟට යොමුවූ පසිඳුගේ විස්තර ඉතිහාසය ගත්විට පියාගේ දුම්වැටියට ඔහු නිතර ගොදුරැවන බව හොඳින් පැහැදිලි විය. උපදේශනය සහ ප්‍රතිකාරවලට යොමුවී පසිඳුගේ පියා දුම්බීම නතර කළේය. මාස කීපයක් යාමටත් පෙර පසිඳුගේ හිසරදය සහ වියළි කැස්ස නැතිවී ගියේය.

තවකෙකුගේ දුම්බීම නිසා ඔබ ගොදුරැවිය හැකි වෙනත් රෝග

අමෙරිකාව තුළ අනෙක් අයගේ දුම්වැටියට ගොදුරැවීමෙන් පෙනහළු පිළිකාවලින් මරණයට පත්වන සංඛ්‍යාව වර්ෂයකට 7000ක් පමණ වේ.

රුධිරයේ ඇති මේද ප්‍රමාණය වැඩිවන අතර අංශභාගය සහ දරුණු රෝගාබාධවලට ගොදුරුවීමේ හැකියාවද වැඩිය.

උපදින දරුවන්ගේ බර අඩුවීම, අඩු මාසවලින් ඉපදීම, මළදරු උපත් සිදුවීම සහ උපදින දරුවන්ගේ නොයෙකුත් විකෘතිතා ඇතිවීම.

පෙනහළු ආබාධවලට ගොදුරුවීමේ හැකියාව වැඩිවේ. ඔබ ඇදුම රෝගියකු නම් මෙම රෝගය උත්සන්න වීමෙන් රෝහල්ගත වීමට තිබෙන හැකියාව වැඩිවේ.

අග්න්‍යාශයේ ඇතිවන පිළිකා, ගර්භාෂයේ ග්‍රීවයේ ඇතිවන පිළිකා, මුත්‍රාශයේ ඇතිවන පිළිකා වැඩිවීමේ ප්‍රවණතාවයක්ද ඇතිවේ

යම් දරුවකු ඉගෙන ගැනීමේ අපහසුතා, තීරණ ගැනීමේ සහ කල්පනා කිරීමේ හැකියාව සමඟ හැසිරීමේ නොයෙකුත් ගැටලු ඇතිවිය හැකිය. මීට ප්‍රධාන හේතුව දුම්වැටියේ ඇති නිකොටීන් සහ කාබන්මොනොක්සයිඩ්ය.

අනෙකෙකුගේ දුම්වැටියෙන් ඔබට හානියක් වන බව සොයාගත හැකිද? ඔව්. පුළුවනි. මෙහිදී කොටිනීන් (cotinine) ඔබගේ ලේවල, කෙළවල හෝ මුත්‍රාවල තිබේදැයි සොයා බැලිය හැකිය. එසේත් නැත්නම් කෙස්ගස් කීපයක් ගෙන ඒවා තුළ කොටිනීන් තිබේදැයි සොයා බැලිය හැක. කොටිනීන් යනු නිකොටීන් (Nicotine) බිඳවැටිමෙන් ඇතිවන අතුරැ රසායනයකි. මෙය සොයාගැනීමෙන් තහවුරැ වනුයේ ඔබ මාස තුනකට වැඩි කාලයක් තවකෙකුගේ දුම්බීමට ගොදුරු වී ඇති බවයි.

ජීවිතය විඳින්න.. දුම්බීම නතර කරන්න. නතර කිරීමට අපහසු නම් මනෝ වෛද්‍යවරයකු හමුවන්න.

සිගරට්ටුව නැවැත්වීමත් සමඟ ඔබට ලැබෙන ශාරීරික හා මානසික ප්‍රතිලාභ. 

සිගරට් එක නැවැත්වීමෙන්...

1. මිනිත්තු 20කට පසු 

ඔබේ රුධිර පීඩනය සහ හෘදය වස්තුවේ අනවශ්‍ය ස්පන්ධනය අඩු වේ.

2. පැය 12කට පසු 

රුධිරයේ ඇති විෂ සහිත කාබන් මොනොක්සයිඩ් ප්‍රමාණය අඩුවේ. 

3. මාස 3කට පසු 

රුධිර සංසරණය වැඩි දියුණු වන අතර පෙනහළු ක්‍රියාකාරීත්වයද වැඩිවේ.

4. මාස 9කට පසු

කැස්ස, සෙම සහ හුස්ම ගැනීමේ අපහසුතා අඩුවී පෙනහළු ආසාදන තත්ත්වයන්ද අඩුවේ.

5. මාස 12කට පසු

තවමත් දුම් බොන කෙනෙකු සමඟ සසඳන විට හෘදය බාධයක් ඇතිවීමේ හැකියාව 50%කින් අඩුවේ.

6. අවුරැදු 5කට පසු

මුඛය, උගුර, ගලනාලය සහ මුත්‍රාශය තුළ පිළිකා වැළදීමේ හැකියාව 50%කින් අඩුවේ. එමෙන්ම යෝනි මාර්ගය තුළ ඇති වන පිළිකා සහ අංශභාගයට ගොදුරැ වීමට ඇති හැකියාව දුම් නොබොන කෙනෙකුගේ තත්ත්වයට පත්වේ.

7. අවුරුදු 10කට පසු

පෙනහළු පිළිකාවකින් මරණයට පත් වීමට ඇති හැකියාව දුම්බොන කෙනෙකු හා සසඳන විට 50%කින් අඩුවේ.

8. අවුරුදු 15කට පසු

හෘදයාබාධයකට ගොදුරු වීමට ඇති හැකියාව සාමාන්‍ය පුද්ගලයකු හා සමාන වේ.

දුම් බොන කෙනෙකුගේ ජීවිත කාලය සාමාන්‍ය කෙනකුගේ ජීවිත කාලයට වඩා අවු. 10කින් කෙටි වේ. ඔබට අවු. 40ට ප්‍රථමව ඔබේ දුම්බීම නවත්වා ගැනීමට හැකි නම් දුම්වැටිය නිසා ඇති වන රෝගයකින් මිය යාමට ඇති හැකියාව 90%කින් අඩුවේ.

අපේ රටේ බොහෝ දෙනා දානය මහා පිනක් හැටියටයි සලකන්නෙ. නමුත් රුධිරය දන් දීමට බොහෝ දෙනා තුළ තවමත් ඇත්තේ පසුගාමී  බවකුයි. සමහරු මේ ගැන ඇති මිත්‍යා මත නිසා පසුබහිනවා. ඇත්තෙන්ම තවත් කෙනකුගේ ජීවිතය බේරා දෙන අතරම තමන්ට නිරෝගී බව ගැන චිත්ත ප්‍රීතියක් වගේම ආත්ම විශ්වාසයකුත් ඇති කරන ලේ ලබාදීම එක්තරා විදියකට ඔබ සතු සමාජීය වගකීමක් ද වෙනවා. මතක තබාගන්න ඔබට රුධිරය දන්දෙන්නට හැකියාව තිබෙනවා කියන්නෙත් ලොකු වාසනාවක්. මොකද හැමෝටම හිතූ හිතූ හැටියට ලේ දෙන්න බෑ. ඒකටත් සුදුසුකම් තියෙන්න ඕනෑ. 

රුධිර දායකයකු වීමට නම් පහත සදහන් මූලික සුදුසුකම් සපුරා තිබිය යුතුයි. 

වයස අවුරුදු 18 – 60 අතර ස්ත්‍රී පුරැෂ දෙපාර්ශවයටම (ඔබ පළමුවරට රුධිර පරිත්‍යාග කරන්නේ නම් අවුරැදු 55 වන තෙක් ඒ සඳහා අවස්ථාව ඇත.

බර  කිලෝ 50 ට වැඩිවීම (බර 50 kg ට අඩු පුද්ගලයකුගෙන් රුධිරය ගැනීම එම දායකයාට හානිකර ය.)

රුධිර හිමොග්ලොබින් ප්‍රමාණය ඩෙසිලීටරයටග්‍රෑම් 12 ට වැඩිවීම.

මාස 4කට වරක් නැවත නැවත පූර්ණ රුධිරය පරිත්‍යාග කළ හැකිය. පට්ටිකා පමණක් සති 2කට වරක් ලබා දිය හැකිය.

මෙම සුදුසුකම්වලට අමතරව රැධිර පරිත්‍යාගයේ දී පහත කරැණු ගැන ද අවධානය යොමු කෙරේ.

පරිත්‍යාගය නිසා රුධිර දායකයාට යම් සෞඛ්‍ය ගැටලුවක් ඇති වේ නම් රුධිරය ලබා නොගනී.

රැධිරයෙන් බෝවන රෝගි තත්ත්ව සහිත දායකයකුගෙන් ද ලබා නොගනී.

ඔබ ලබා දෙන රුධිරය රෝගි දරුවකුට, ගර්භණී මවකට හෝ ඇතැම්විට ඔබේම හිතවතෙකුට ලබා දීමට ඉඩ ඇත. මේ නිසා ඔවුන්ගේ ජීවිත ද අනතුරේ නොහෙලීමට පහත තොරතුරු ඔබගේ වෛද්‍යවරයාට දැනුම් දීම වටින්නේය.

හංඟන්න එපා!

ඔබට විශ්වාසවන්ත එක් ලිංගික සහකරුවකුට වඩා සිටින්නේ නම්, ඔබ පිරිමි - පිරිමි ලෙස  සමරිසි ලිංගික සබඳතා පවත්වා ඇත්තෙක් නම්, ඔබ කවදා හෝ මුදල් අපේක්ෂාවෙන් ලිංගික කටයුතුවල යෙදී ඇත්නම්, ඔබ මත්ද්‍රව්‍ය එන්නත් ලබාගෙන ඇත්නම්, ඔබට කවදා හෝ සෙංගමාලය වැළඳී ඇත්නම්, ඔබ කුමන හෝ නිදන්ගත රෝගයකින් පෙලෙන්නේ නම්, ඒ ගැන නොසඟවා වෛද්‍යවරුන්ට පවසන්න.

පසුගිය වසර ඇතුළත ඔබ ලබාගෙන ඇති එන්නත් පිළිබඳ සියලු විස්තර, ඔබට කවදා හෝ රැධිරය හෝ රුධිර කොටස් ලබා දී ඇත්නම්, ඔබ පසුගිය වසරක කාලය ඇතුළත පච්ච කෙටීම, කන් විදීම ආදියට පෙළඹී ඇත්නම්, මාස 6ක් ඇතුළත ඔබ යම් ශල්‍යකර්මයකට මුහුණ දී ඇත්නම්, ඔබ යම් රෝගි තත්ත්වයකින් පසු වූයේ නම් හෝ යම් ඖෂධයක් ලබා ගන්නේ නම්, ශරීරයේ යම් තුවාලයක් පවතින්නේ නම්, ඒවා ගැනත් කියන්න.

ඔබ පහත සඳහන් කවර හෝ රෝගි තත්ත්වයකින් පෙලෙන්නේ නම් එයද නොසඟවා  වෛද්‍යවරයාට දැනුම් දෙන්න.

ස්නායු ආබාධ , වලිප්පුව , හදවත් රෝග , මානසික රෝග, දියවැඩියාව. ඇදුම, පිළිකා, අධිරැධිර පීඩනය, වකුගඩු හෝ අක්මාව ආශ්‍රිත රෝග.

රුධිරය පරිත්‍යාග කරන මොහොතේ තිබිය යුතු සුදුසුකම්...

ඔබ මනා ශාරීරික සෞඛ්‍ය තත්ත්වයෙන් සිටිය යුතු අතර ප්‍රධාන ආහාර වේල පැය 4ක් ඇතුළත ලබාගෙන තිබිය යුතුය. පැය 6ක නින්දක් ලබා තිබිය යුතුය. අධික ලෙස වෙහෙස වී නොසිටිය යුතුය.

ඔබ රුධිරය පරිත්‍යාග කරන්නට එන විට, අනිකුත් දායකයන්ගේ සෞඛ්‍ය තත්ත්වය ආරක්ෂාව සඳහාත්, රුධිරය එකතු කරන කාර්ය මණ්ඩලයේ සනීපාරක්ෂාව සහ  පහසුව පිණිසත් රුධිරය රැස් කිරීමේ කඳවුර වෙත පිරිසිදුව පැමිණීම වැදගත් වේ.
රුධිරය පරිත්‍යාග කිරීමෙන් පසු පිළිපැදිය යුතු කරුණු…

අවම වශයෙන් මිනිත්තු 20ක්වත් විවේකීව, රුධිරය එක්රැස් කරන ස්ථාන භාර වෛද්‍යවරයාගේ අධීක්ෂණය යටතේ එම ස්ථානයේම රැඳී සිටිය යුතුය.

සුලු ආහාරයක් සහ දියරමය පානයක් ලබාගත යුතුය.

රුධිරය ලබාගත් ස්ථානයේ ඇලවූ ප්ලාස්ටරය අවම වශයෙන් පැය 12ක් වත් ගතවන තුරැ ඉවත් නොකළ යුතුය.

එළඹෙන පළමු පැය 4 තුළ හොඳින් දියර වර්ග පානය කළ යුතුය. රුධිර පරිත්‍යාගයට පෙර පැය 4 තුළ ද මෙලෙස කිරීමෙන් ඔබට ඇතිවන ශාරීරික අපහසුතා මගහැරෙනු ඇත.

ඊළඟ ප්‍රධාන ආහාර වේල ලබා ගන්නාතුරු කිසිසේත්ම මත්පැන් පානය නොකළ යුතුය.

ව්‍යායාම කිරීම, කිමිදීම හෝ දියේ ගිලී නෑම නොකළ යුතුය. සාමාන්‍ය ලෙස දිය නෑම කරන්න.

රුධිරය ලබා දුන් දිනයේදී බරවාහන පැදවීම, ගුවන්යානා පැදවීම හෝ එවන් අනතුරුදායක ක්‍රියා නොකළ යුතුය.

රුධිරය ලබා දී සතියක් ඇතුළත ඔබට යම් බෝවන රෝගයක් වැළඳුණේ නම් ඒ පිළිබඳව අදාළ ලේ බැංකුවට දැනුම් දෙන්න.

නිරතුරු සමබර ආහාර වේලක් ලැබීමෙන් ඔබ මනා සෞඛ්‍යයෙන් පසුවන අතර එවිට ඔබ නිරතුරු රුධිර පරිත්‍යාගයට ද සුදුසු අයෙක් බවට පත්වේ.

රුධිරය පරිත්‍යාගය ගැන මිත්‍යා මත සහ යහපත් මත!

මේ නිසා කිසිවිටෙක ඔබේ ශරීරයේ බර අඩු හෝ වැඩි නොවේ.

වෙනත් රෝගාබාධ ඇති නොවේ.

මෙම පරිත්‍යාගයෙන් ඔබ ලබන මානසික සුවය වෙනත් ක්‍රියාවකින් ලැබිය නොහැකි තරම්ය.

රුධිර දායකයන්ට හෘදයාබාධ අංශභාගය වැනි රෝග වැළඳීමේ ප්‍රවණතාව අන් අයට වඩා අඩුය.

ඔබ ලබා දෙන රැධිරය ඉතා සුලු කාලයකින් ශරීරය තුළ නැවත නිපදවීම ඇරඹේ.

ලේ දෙන හැටි!

මෙය කිසිදු අතුරු ආබාධයක් නැති සරල ක්‍රියාවලියකි. අප රට තුළ ස්වෙච්ඡා දායකයන්ගෙන් පමණක් රුධිර ලබා ගැනේ. ලේ දෙන අවස්ථාවක ප්‍රථමයෙන් ඔබගේ බර පරීක්ෂා කර නිවැරදි තතු ලබාදීම සඳහා රුධිර දායක ප්‍රකාශය ඔබට ලබා දේ. හොඳින් කියවා මෙය සම්පූර්ණ කළ යුතු වේ. තනිවම අදාළ දායකයා විසින්ම මෙය සත්‍ය තොරතුරැවලින් පිරවිය යුතුය. දායකයාගේ නම, ලිපිනය, ජාතික හැඳුනුම්පත් අංකය හා දුරකතන අංකය අනිවාර්යයෙන් ඇතුළත් කළ යුතුය. මෙයින් පසු වෛද්‍යවරයා වෙත යොමු කෙරේ. වෛද්‍ය පරීක්ෂණයෙන් සමත් වන පුද්ගලයාට රුධිරය එකතු කරන බෑග් ඉඳිකටුව, අදාළ බාර්කෝඩ් ලේබල් සහ ලේ දන්දීම සහතික කරන පොත ලබාදෙයි. කිසිවිටක එම පැකට්ටුව හෝ ඉඳිකටුව ඔබ විවෘත නොකළ යුතුය. ඔබගේ හිමොග්ලොබින් ප්‍රමාණය පරීක්ෂා කර මැලේරියාව සඳහා පරික්ෂා කිරීමට ද රුධිර සාම්පලයක් ලබා ගැනේ. පැකට්ටුව සමඟ දායකයා රැධිරය ලබාගන්නා ස්ථානයට යොමු කෙරේ. මෙහිදී සම්පූර්ණ ජීවාණුහරණ තත්ත්ව යටතේ රැධිරය එකතු කෙරේ.

ඔබ පරිත්‍යාග කළ රැධිරයට ඉන්පසු මොකද වෙන්නේ...?

එම රුධිරය රෝගීන්ට ලබාදීමට පෙර රතු රුධිරාණු, සුදු රුධිරාණු, රුධිර පට්ටිකා සහ ප්ලාස්මාව ලෙස කොටස් කෙරේ. මින් පසු ඒවා වෙන වෙනම සුදුසු උෂ්ණත්වවල නියමිත කාලයක් ගබඩා කෙරේ.

පරිත්‍යාග කළ සෑම රුධිර සාම්පලයක්ම ලංකාවේදී රෝග 5ක් සදහා පරීක්ෂා කෙරේ. එච් අයි වී, උපදංශය, හෙපටයිටිස් බී හා සී, මැලේරියාව එම රෝගයන්ය. නැවත පරීක්ෂා කර ප්‍රධාන රුධිර ඝණ 8ට (A+/ A-/ B+/ B-/ AB+/ AB-/ O+/ O- ) මෙම සියලු රුධිර සාම්පල වෙන් කිරීමද සිදු කෙරේ.

දැනට ඇති නවීනතම ක්‍රමවලින් රුධිර පට්ටිකා පමණක් එකතු කරගැනීමට හැකි නිසා සති 2කට වරක් අවශ්‍ය නම් ඔබට රැධිර පට්ටිකා පරිත්‍යාග කළ හැකිය.

 සුගත්