දරුවකු ලැබීම මවකට තිබෙන සිහිනයකි. එම දරුවා රැකබලා ගැනීම, හොඳ අධ්‍යාපනයක් දීම, හොඳ ගති ගුණ ඔහු තුළට ඇතුළු කිරීම එම සිහිනයේ තවත් කොටසක්. මෙම සිහිනය තුළට යාමට මවක් යහපත් මානසික හා ශාරීරික සෞඛ්‍යයකින් හෙබි විය යුතුයි. ගමේ සිටින පවුල් සෞඛ්‍ය සේවා නිලධාරිනිය ගර්භනී කාලය තුළ පසුවන මවකට අවශ්‍ය පෝෂණය, ශරීරයේ බර, එන්නත් කිරීම් යනාදිය පිළිබඳ හොඳ දැනුමක් ලබා දෙයි. නමුත් මේ දැනුමට මානසික සෞඛ්‍ය ගැටලු පිළිබඳ දැනුම් කාණ්ඩය ඇතුළත් වෙන්නේ නෑ. දරු ප්‍රසූතියෙන් පසු මවක් සාමාන්‍යයෙන් ප්‍රධාන මානසික ගැටලු තුනකට මුහුණ දෙන්න පුළුවන්.

1. ප්‍රසූතියෙන් පසු ඇති වන දැඩි ආතතිය
(Postpartum blues)

2. ප්‍රසූතියෙන් පසු ඇතිවන දැඩි මානසික අවපීඩනය
(Postpartum Depression)

3. ප්‍රසූතියෙන් පසු ඇතිවන සයිකෝසියාව
(Postpartum Psychosis)

ප්‍රසූතියෙන් පසු ඇතිවන දැඩි ආතතිය
(Postpartum blues)

ඕනෑම මවක් දරු ප්‍රසූතියෙන් පසු යම් ආකාරයක ආතතියකට ගොදුරැ වේ. මව්වරු 100ක් ගතහොත් 80ක් මේ තත්ත්වයට ගොදුරු වන බව වෛද්‍යවරැ පවසනවා. මෙය අසනීප හෝ රෝගී තත්ත්වයක් නොවේ. ප්‍රසූතියෙන් පසු ඇතිවන විඩාව මෙන්ම මවගේ ආකල්ප ද මෙයට බලපාන්න පුළුවන්. මේ ලක්ෂණ මොනවාදැයි අපි බලමු.

නින්ද නොයාම හෝ කෑම අරුචිය.

අධික තෙහෙට්ටුව හෝ වැඩ කිරීමට ඇති අපහසුව.

කිසිම හේතුවක් නැතිව ඇඬීම.

තමාට දරුවා බලාගැනීමට අපහසු යැයි සිතීම.

මීට ප්‍රධානම හේතුව ලෙස සොයාගෙන ඇත්තේ දරු ප්‍රසූතියෙන් පසු ඇතිවන හෝමෝනවල වෙනස් වීමයි. ගර්භාෂය තුළ ඇති වැදෑමහ ශරීරයෙන් ගැලවීමත් සමඟ ක්ෂණිකව ඊස්ට්‍රජන් (Estrogen) පොජෙස්ටරෝන් (Progesterone) සහ එන්ඩොෆින් (Endorphin) යන හෝමෝනවල අසමතුලිතතාවයන් ඇති වේ. මවගේ ශරීරය තුළ මෙම හෝමෝන නැවත යථා තත්ත්වයට පත්වීමට මාස 6ක පමණ කාලයක් ගතවේ. නමුත් මව තුළ ඇතිවන මෙම වෙනස්කම් සති දෙකක පමණ කාලයක් තුළ සම්පූර්ණයෙන්ම යථා තත්ත්වයට පත්වේ.

ප්‍රසූතියෙන් පසු මානසික අවපීඩනය
(Postpartum Depression)

මව්වරුන් 100ක් ගත්තොත් 12ක් හෝ 13 දෙනකුට මානසික අවපීඩනය ඇති වෙන්න පුළුවන්. මෙහිදී මවකට ඇතිවෙන ප්‍රධාන රෝග ලක්ෂණ වනුයේ,

නුරුස්නා බව සහ කිපෙනසුළු බව

ශරීරයට දැනෙන අප්‍රාණික බව සහ තමාට දරැවා බලා ගැනීමට නොහැකි යැයි නිතර සිතීම.

කෑම අරුචිය.

ජීවිතය එපා වීම, කලකිරීම හෝ ජීවිතය නැති කරගැනීමේ සිතුවිලි.

නින්ද නොයාම හෝ උදෑසන නින්දෙන් අවදි වීම.

දරු ප්‍රසූතියෙන් පසු ඇතිවන මානසික අවපීඩනයට හේතු 

දරු ප්‍රසූතියට පෙර සිටම මේ තත්ත්වය තිබීම.

මීට ඉහත දරු ප්‍රසූතියකදී මානසික අවපීඩනයට ගොදුරැ වී තිබේ නම් ඊළඟ ප්‍රසූතියේදී නැවත අවපීඩනයට යාමේ හැකියාව 60%කි.

ගර්භනී සමයේදී CRH (Corticotrophin Releasing Hormone) නම් හෝමෝනය වැඩියෙන් ශ්‍රාවය වීම.

දරු ප්‍රසූතියෙන් පසු මොළය තුළ ක්ෂණික ස්නායු උත්තේජකවල ඇතිවන අසමතුලිතතාවය. (Neuraadoptine Dysregulation)

දරු ප්‍රසූතියෙන් පසු මවට ලැබෙන සහයෝගය අඩු වීම හෝ නැති වීම හෝ දැඩි මානසික පීඩනයකට ගොදුරු වීම. 

Ex - දරුවා රැකබලා ගැනීමේදී උපකාරක පරිසරයක් නොමැති වීම. (Poor Supporting Environment)

ප්‍රසූතියෙන් පසු සයිකෝසියාව

මව්වරුන් දහසක් ගතහොත් තුන්දෙනකු පමණ සයිකෝසියාව (Postpartum Psychosis)  නැමති ඉතා දරුණු මානසික තත්ත්වයට ගොදුරු විය හැක. මෙහිදී මව දරුවාට හානි කිරීමට ඇති හැකියාව ඉතා වැඩිය. තම දරුවා කරදරකාරයකු ලෙස හෝ විකෘති දරුවකු ලෙස හෝ යක්ෂයකු ලෙස හෝ අසාමාන්‍ය දරුවකු ලෙස පෙනෙන්නට පුළුවන්. මේ නිසා දරුවාට හානි කිරීමට තිබෙන හැකියාව ඉතාම වැඩිය. මවගේ හැසිරීම සම්පූර්ණයෙන්ම වෙනස් වන අතර නින්ද නොයාම සමඟ ප්‍රචණ්ඩ සහ කලහකාරී තත්ත්වයට පත්විය හැකිය. මෙහිදී මව තමාගේ ජීවිතයට හානිකර ගැනීමේ අවදානම වැඩි වේ. මෙහිදී මව දරුවාගෙන් වෙන්කර තැබිය යුතුය. ඉතා ඉක්මනින් මනෝ වෛද්‍යවරයකු වෙත රැගෙන යා යුතුය. නමුත් බොහෝ විට සිදුවන්නේ භූත දෝෂයක් යැයි සිතා ගොඩ වෙදකම්, යන්ත්‍ර මන්ත්‍ර ගුරුකම්වලට යොමු වීමයි. මින් ඔබේ කාලය සහ ධනය දෙකම නැති වන අතර දරුවා සහ මව යන දෙදෙනාම දැඩි අවදානමකට ලක්වේ.

මවට ඇතිවන මෙම සයිකෝසියාව නැමති තත්ත්වය ප්‍රජාව තුළ වැදූගෙයි සන්නිය ලෙස කටවහරේ ප්‍රචලිතය. මනෝ විශේෂඥයන් පවසන පරිදි මෙම රෝගී තත්ත්වය දිවිද්‍රැව රෝගයේම (Bipolar Disorder) අවස්ථාවක් බව පෙන්වා දෙයි. දිවිද්‍රැව රෝගය යනු කාලයක් අධික දුක හෝ ජීවිතය කලකිරීම හෝ තවත් කාලයක් අධික සතුට හෝ අසාමාන්‍ය ජවය සහිත එකිනෙකට වෙනස් හැසිරීම් රටාවන් දෙකකින් යුතු අසනීපයකි. මෙම රෝගයට ගොදුරු වන මවකගේ පවුල් ඉතිහාසය තුළද මෙවැනි දිවිද්‍රැව රෝගීන් සිටිය හැකිය. මෙම රෝගයට දැඩි ජානමය සම්බන්ධතාවයක් පවතී.

අපේ සංස්කෘතිය සහ සමාජ වටපිටාව තුළ මවකට විශේෂයෙන්ම ගර්භනී කාලය තුළ සහ දරු ප්‍රසූතියෙන් පසු ලැබෙන සහයෝගය ඉතාමත්ම විශාලයි. මවට උදව් වීමට සියලුම නෑදෑ හිතමිතුරන් එකතු වේ. නිසි වෙලාවට සායනයට යොමු කිරීමට, හොඳ ආහාර පාන ලබා දීමට, දරුවා බලාගැනීමට මුළු පවුලේම සහයෝගය ලැබේ. නමුත් ඒ ඉපැරණි සමාජය යම් ප්‍රමාණයකට දෙදරා ගොස් ඇත. සමහර මව්වරු හුදකලාව සහ අසරණභාවයට පත්ව ඇත. මීට අමතරව සැමියා රට යාම, මත්පැන් සහිත පරිසරය, මත්ද්‍රව්‍යවලට ගොදුරැ වීම, ඊර්ෂ්‍යාව සහ කුහකකම්වලට ගොදුරු වීම දැන් බොහෝවිට දක්නට ඇත. මීට අමතරව දරු ප්‍රසූතියෙන් පසු ඇතිවන මානසික ගැටලු නිසි ලෙස හඳුනා නොගෙන නොයෙකුත් බලි, තොවිල්, යන්ත්‍ර මන්ත්‍ර, ශාන්ති කර්ම පිටුපස යාම ද සෞඛ්‍යට ප්‍රබල තර්ජනයක් වී ඇත.

කිරිබත්ගොඩ මූලික රෝහලේ 
මනෝ වෛද්‍ය නයනානන්ද කුමාරනායක

කරපිංචා කොළ සතුව විශ්මිත ගුණ රැසක් ඇති බව විද්‍යාත්මක පරීක්ෂණ මඟින් දැන් තහවුරු කර තිබෙනවා. විටමින් A, B, C සහ B2, කැල්සියම්, ප්‍රෝටීන්, යකඩ මෙන්ම අල්කලොයිඩ් වැනි සංයෝගවලින් පොහොසත් කරපිංචා කොළවලින් විශ්මිත සෞඛ්‍යමය වාසි රැසක් අ‍ත්වෙනවා. දියවැඩියාව පාලනය කිරීම, නරක කොලෙස්ටරෝල් මට්ටම පාලනය කිරීම, විෂ සහිත සංයෝග නැසීම, බර අඩු කිරීම, උදාරාශ්‍රිත රෝග සමනය කිරීම, ගර්භනී සමයේදී ඇතිවන උදෑසන අපහසුව, ආතතිය පාලනය කිරීම, හිසකෙස් වර්ධනය වේගවත් කිරීම ඇතුළු ගුණ රුසක් අමුතු සුවඳක් සහිත රසකාරකයක් වන කරපිංචා සතුය.

ඔබ දියවැඩියා රෝගියෙක් නම් ස්වභාවික ක්‍රමයක් උයෝගී කර දියවැඩියා රෝගය පාලනය කිරීමට යොමු වීම වඩාත් සෞඛ්‍යාරක්ෂිත වනවා. ඒ ඔබ පිස ගන්නා ව්‍යංජන සඳහා වැඩි වශයෙන් කරපිංචා කොළ යොදා ගැනීමෙනි. කරපිංචා කොළ මඟින් කාබෝහයිඩ්‍රේට් පරිවෘත්තිය පාලනය කර ඔක්සිකාරක බලපෑම ද පාලනය කරනු ලබනවා. ඊට අමතරව කරපිංචා කොළ මගින් අති සාර්ථක ලෙස ඉන්සියුලින් නිපදවීම උත්තේජනය කර රැධිරයේ සීනි මට්ටම පාලනය කරනු ලබනවා. ඔබත් දියවැඩියාව නිසා පීඩාවට පත් වනවා නම් ඔබ ආහාරයට ගන්නා ව්‍යංජන සඳහා කරපිංචා එක්කර ගැනීමට අමතරව උදෑසනම හිස්බඩ කරපිංචා කොළ කිහිපයක් අමුවෙන් සපන්න පුරුදු වන්න. 

දිනපතා කරපිංචා කොළ ආහාරයට ගන්නවා නම් ශරීරයේ අහිතකර කොලෙස්ටරෝල් මට්ටම නිසි ලෙස පාලනය වනවා. කරපිංචා කොළ ප්‍රතිඔක්සිකාරකවලින් පොහොසත් වන නිසා ශරීරයේ හිතකර කොලෙස්ටරෝල් මට්ටම සෞඛ්‍ය සම්පන්න ලෙස වැඩි කර අහිතකර කොලෙස්ටරෝල් මට්ටම නිසි ලෙස පාලනය කරනු ලබනවා. මේ නිසා අකල් මරණ සිදු වන හදවත් රෝග සහ රැධිර නාලිකා සිහින්වීමේ රෝගවලින් ආරක්‍ෂාව සලසා ගන්නට පුළුවන්. 

ඔබ ශරීරයේ බර වැඩි කම නිසා ලතවන අයෙක් නම් ඔබේ ආහාර සඳහා අදම කරපිංචා කොළ එක්කර ගන්න. කරපිංචා කොළ ආහාරයට ගැනීම මඟින් ශරීරයේ ඇති විෂ සහිත සංඝටක සියල්ලම මුත්‍රා සහ මළපහ මගින් ඉවත් කර දමන අතර අතිරික්ත මේදය සහ කාබෝහයිඩ්‍රේට දහනය කර ශරීරයේ බරත් නිසි පරිදි අඩු කරනවා.

සමෙහි කැපීම් සිරීම් නිසා ඇති වන තුවාල සුවපත් වීමේ වේගය කරපිංචා කොළ මගින් වේගවත් කරනවා. මේ සඳහා සහාය වන්නේ කරපිංචා කොළ සතු ප්‍රතිඔක්සිකාරක බලය සහ බැක්ටීරියා නාශක බලයයි. කරපිංචා කොළ සතුව වේදනා නාශක බලයක් අන්තර්ගත වන බව 2010 වසරේදී “Journal of Advanced Pharmaceutical Technology & Research” සඟරාව මගින්ද තහවුරු කර තිබෙනවා. ඔබේ සමේ තුවාලයක් තිබෙනවා නම් කරපිංචා කොළ කොටා පත්තුවක් සකස් කර දිනකට කිහිප වතාවක් තුවාලය මත තබන්න.

ආතතිය මගින් ශාරීරිකව සහ මානසිකව විශාල හානියක් සිදු වනවා. ආතතිය දුරු කර ගැනීම සඳහා බොහෝ ක්‍රම තිබුණත් කරපිංචා කොළත් මේ සඳහා භාවිතා කරන්නට පුළුවන්. මේ සඳහා ඔබට කරපිංචා මගින් නිස්සාරණය කරන ලද සුගන්ධ තෙල් භාවිතා කරන්නට පුළුවන්.

හිස කෙස්වල මූල කේශ සවිමත් කිරීමේ හැකියාවක් කරපිංචා සතු වනවා. මීට අමතරව කරපිංචා තුළ අන්තර්ගත වන පෝෂණ ගුණයන් මඟින් හානියට පත් හිසකෙස් නිසි ලෙස නැවත වර්ධනය වීමට ද උපකාර කරනවා. එමෙන්ම කරපිංචා කොළ තුළ අඩංගු වන විටමින් B6 මගින් හිසකෙස් වැටීම වළකාලන හෝමෝන උත්තේජනය කිරීම ද සිදු කරනවා.

කරපිංචා පත්‍ර මඟින් ආහාර ජීර්ණයට අවශ්‍ය කරන එන්සයිම උත්තේජනය කර ආහාර ජීර්ණ පද්ධතිය සංසිඳුවනවා. ගර්භනී සමයේදී පළමු මාස තුන ඇතුළත උදෑසන යම් අපහසුතාවලට මුහුණ දෙන්නට සිදු වනවා. ගර්භනී කාන්තාවන්ට මෙලෙස බොහෝසෙයින් ඇති වන ඔක්කාරය, වමනය සහ වෙනත් විවිධ අපහසුතා දුරැ කර ගැනීම සඳහා කරපිංචා කොළ භාවිතා කරන්නට පුළුවන්.

PHYTOLOGY NEWS

එදිනෙදා කට වහරෙදි ‘ප්‍රෙෂර්’ කියලා අපේ අය හඳුන්වන අධිරුධිර පීඩනය (High Blood Pressure) කියන්නේ අනතුරැ හැඟවීමකින් තොරව එන ‘නිහඬ මාරකයක්. එහෙම කියන්නෙ මේ රෝග තත්ත්වය ඇති බව පෙන්වන කැපීපෙනෙන ලක්ෂණ දකින්නට  නොලැබෙන නිසායි.

අධිරුධිර පීඩනයේදී ඔක්කාරය, නිතර දහදිය දැමීම, නින්ද ලැබීම අපහසුවීම වගේ රෝග ලක්ෂණ මතුවන බව සාමාන්‍ය පිළිගැනීමක් වුණත් එය සත්‍යයක් නොවන බවයි නවතම පර්යේෂණ පෙන්වා දී ඇත්තේ. බොහෝ දෙනෙකුට කිසිදු රෝග ලක්ෂණයක් මතුවන්නේ නැහැ කියන කාරණය තමා වෛද්‍යවරු කියන්නේ. 

ඉතින් මෙය දැනගන්නට ලැබෙන්නේ රුධිර පීඩනය මැන බැලීමෙන්ම පමණයි!

ශ්‍රී ලංකාවේ වගේම ලෝකයේත් මේ රෝගය ඉහළ යන තත්ත්වයක් තමා වාර්තා වී  තිබෙන්නේ. 

අවුරැදු 25ට වැඩි ශ්‍රී ලාංකිකයන් අතරින් 42%කට අධිරුධිර පීඩනය ඇති බවත්, ශ්‍රී ලංකාවේ පිරිමි ජනගහනයෙන් 41.9%කට හා කාන්තා ජනගහනයෙන් 37%කට අධිරුධිර පීඩනය පවතින බවත් සෞඛ්‍ය අමාත්‍යාංශ වාර්තාවන් තහවුරු කර තිබෙනවා. මේ නිසා අධිරුධිර පීඩනය සැලකෙන්නේ ශ්‍රී ලංකාවේ ප‍්‍රධාන සෞඛ්‍ය තර්ජනයක් හැටියටයි..!

ලෝකයේ තත්ත්වය සැලකුවත් වැඩි වෙසක් නෑ. ලෝක ජනගහනයෙන් බිලියනයකට ආසන්න පිරිසකට අධිරැධිර පීඩනය ඇති අතර එයින් 2/3ක්ම සංවර්ධනය වෙමින් පවතින රටවල්වල වැසියන් බවත්, වර්ෂ 2025 වනවිට ලෝක ජනගහනය තුළ වැඩිහිටියන් බිලියන 1.56ක් අධිරුධිර පීඩනයෙන් පෙලෙනු ඇති බවටත් ලෝක සෞඛ්‍ය සංවිධානයේ වාර්තා සහ ජගත් සමීක්ෂණ වාර්තා මගින් අනතුරු අඟවා තිබෙනවා...!

සිරුරට උවමනා කරන ඔක්සිජන් සහ පෝෂ්‍ය පදාර්ථ අරගෙන රුධිරය සිරුර පුරා  ගමන් කරවන්නේත්, ඔක්සිජන් ප‍්‍රමාණය අඩුවී ඇති රුධිරය එකතුකරගෙන යළි පෙනහල්ලටත් ගෙනයන කාර්යභාරය ඉටුකරන්නේත්, හෘදයවස්තුවෙනුයි... හදවත වරෙක හැකිලෙමින් සහ වරෙක දිගහැරෙමින් තමයි සිරුරේ රුධිර පොම්පාගාරය විදිහට ක‍්‍රියාත්මක වෙන්නේ.

මේ අන්දමට රැධිරය සිරුර පුරා ගමන් කරවන්නේ රුධිර නාල ඔස්සේයි. එලෙස ලේ ගමන් කරවන්නට කිසියම් පීඩනයක් යෙදීම අවශ්‍යයි. ඉතින් හෘදයවස්තුවෙන් රැධිරය පොම්ප කරනවිට සහ හෘදයවස්තුව විවේකීව තිබෙන විට හටගන්නා මේ පීඩන අගයන් වෙනස් වෙනවා. සාමාන්‍යයෙන් රුධිර පීඩනය මැනබලන විට ඒ අවස්ථා දෙකේ මනින ලබන පීඩන අගයන් දෙක අනුපාතයක් ලෙස දක්වනවා. එය මනින්නේ රසදිය මිලිමීටර් (mmHg) කියන ඒකකයෙන්. සාමාන්‍ය රැධිර පීඩනය ලෙස හඳුන්වන මේ අනුපාතයට වැඩි අගයක් රැධිර පීඩනය පෙන්වන්නේ නම් අන්න එය අධිරුධිර පීඩන තත්ත්වයක් ලෙස දක්වනවා. 

සාමාන්‍ය නිරෝගි අයකුගේ රුධිර පීඩන අගය – 120/80 mmHg

සාමාන්‍ය අගය මෙසේ වුවද වයස හා බර මත රැධිර පීඩන අගයන් වෙනස් වනවා. 

දැන් බලමු අධිරුධිර පීඩනයට බලපාන හේතු මොනවාද කියා.

• ප්‍රධානම හේතුව තමා මේදය හෝ දුම්වැටිවල අන්තර්ගත නිකොටීන් හෝ රුධිර නාලවල තැන්පත් වීම නිසා රුධිර නාල සිහින් වීම.

• ඊළඟට ජානමය හේතු නිසා රුධිර නාල සිහින් වීම. තෙල් සහිත ආහාරපාන අධිකව ගැනීම. නිතර මානසික පීඩාවන්ගෙන් පෙළීම හා  අවිවේකී බව. දියවැඩියා රෝගයෙන් පෙළීම. දීර්ඝකාලීනව වකුගඩු රෝගවලින් පෙළීම.

මේ රෝගය නොසලකා හැරියොත් මොකද වෙන්නේ...?

සාමාන්‍ය අයෙකුට වඩා අධිරුධිර පීඩන රෝගියෙකුට ආඝාතය (Stroke) වැළඳීමේ ප‍්‍රවණතාවය 7%කින් ඉහළයි. හදවත් රෝග වැළඳීමේ අවදානම 3%කින් ඉහළයි. රැධිර කැටි ඇතිවීමේ අවදානමත් ඉහළයි. දියවැඩියාව සෑදීමේ අවස්ථාව වැඩියි. එවිට වකුගඩු අක‍්‍රිය වීම, හෘදයාබාධ ඇති වීම, මොළයේ රුධිර නාළ පුපුරායාම, අංශභාගය වැනි මාරාන්තික අවදානමක් ඇති විය හැකියි.

රෝගයෙන් වළකින්න නම් කළයුතු කුමක්ද...?  

• අධික මේදය සහ අධික ලුණු සහිත ආහාර පානවලින් ඈත්වෙන්න. 

• ටින්වල ඇසිරූ ආහාර, කරවල, ලුණු මිශ්‍රිත අලපෙති, සෝස් වර්ග, කල්පවතින ලෙස සකස් කළ ආහාරවල අධික ලුණු ප‍්‍රමාණයක් අන්තර්ගතයි.

• මස්, බේකන්, හැම්, ලිංගුස්, මස්පෙති යෙදු බර්ගර් ආදියේ මේදය අධිකයි.

• ඒ වගේම මත්පැන් හා දුම්වැටි භාවිතය නවත්වමු. ආහාර රටාව හා ජීවන චර්යාවන් වෙනස් කරගමු. නිවුඩු සහල්, කුරක්කන්, තල, මෙනේරි, මුං, පළතුරැ, එළවළු, මත්ස්‍ය ආහාර වැඩිපුර ආහාරවේලට එක්කර ගනිමු. ගොරකා සහ කරපිංචා මේදය පාලනය කරන අතරේම රුධිර පීඩනයත් පාලනය කරනවා.

මේ සියල්ලටත් වඩා ආතතියෙන් සහ කනස්සල්ලෙන් තොරව දිවිගෙවීම ඉතාමත් වැදගත්!

 සුගත්

වර්තමානයේදී බහුලව දක්නට ලැබෙන රෝගයක් ලෙසින් අත්වල හිරිවැටීම හැඳින්විය හැක. මේ අතර වෙනත් රෝග සඳහා ප්‍රතිකාර ලබාගැනීමට පැමිණෙන රෝගීන්ද අත්වල සහ ඇඟිලිවල හිරිවැටීම සම්බන්ධව වෛද්‍යවරයාට පැවසීම නිරන්තරයෙන් දැකිය හැකිය.

මෙවැනි අත්වල සහ ඇඟිලිවල හිරිවැටීමට විවිධ හේතු බලපාන අතර වර්තමානයේදී හඳුන්වනු ලබන Carpal Tunnel Syndrome නැමැති අවස්ථාව ද බහුල ලෙස මේ රෝගයට හේතුවේ.

ආයුර්වේද වෛද්‍ය විද්‍යාවට අනුව මෙය වාත රෝග ඝනයට අයත් වන රෝගයකි. මැණික් කටු සන්ධියේ යම් ව්‍යුහයක් තුළින් ගමන් ගන්නා ස්නායුවක් (Median Nerve) පීඩාවට පත්වීම හේතුවෙන් රෝග ලක්ෂණ හටගන්නා අතර මෙවැනි තත්ත්වයක් උද්ගත වීමට ඒ ඒ පුද්ගලයාගේ රැකියාවේ ස්වභාවයේ බලපෑම් ද හේතුවෙයි.

මීට අමතරව මැණික් කටු සන්ධිය ආශ්‍රිතව ඇති යම්කිසි කුහරමය ව්‍යුහයන් (Carpal Tunnel) හරහා ඇඟලිවලට විශේෂයෙන්. මහපටඟිල්ල, දබරැඟිල්ල, මැදැඟිල්ල හා වෙදඟිල්ලෙහි කොටසකටත් ස්නායු ආවේග සපයන ස්නායුව (Median Nerve) ගමන් ගනී. මෙය අස්ථි හා අස්ථි බන්ධනී (Ligaments) වලින් මායිම් වී ඇති අතර මෙම කුහරය හරහා පේශී ඛණ්ඩරා (Muscles Tendons) හා ස්නායුව (Median Nerve) ගමන් කරයි. මෙම කුහරමය ව්‍යුහය ඇතුළත පීඩනය යම් හේතුවක් නිසා ස්නායුව තෙරපීමකට ලක්වේ. එවිට රෝග ලක්ෂණ ඇතිවේ.

රෝග ලක්ෂණ:-

මෙම රෝගයේ රෝග ලක්ෂණ එක්වරම හටනොගනී. රෝග ලක්ෂණ ක්‍රමක්‍රමයෙන් ඇතිවී එය එදිනෙදා වැඩකටයුතුවලට බාධා ඇති කරයි. කාලයක් ගතවෙද්දී මෙය ඉතා දරැණු රෝගයක් බවටද පත්විය හැක.

අතෙහි මැදගිල්ල, වෙදඟිල්ල, මහපටැඟිල්ල වැනි ඇඟිලිවල වරින්වර ඇතිවන නළියන සේ දැනෙන ස්වභාවය (Tinseling Sensation) දාහය හා හිරිවැටීම වැනි තත්ත්වයන් මෙම රෝගයේ රෝග ලක්ෂණ වේ.

වේදනාවට අමතරව ඇතැම් විට අතට අප්‍රාණික තත්ත්වයක් දැනීමද රෝග ලක්ෂණයක් වේ. එදිනෙදා වැඩකටයුතු සිදුකරද්දී අත හිරිවැටීම හේතුවෙන් ඇතැම් විට අතින් ගනුලබන විවිධ දෑ බිම වැටීම දක්නට ලැබිය හැක. විශේෂයෙන් යම් දෙයක් වැඩි වේලාවක් අල්ලා ගෙනසිටිය නොහැකි තත්ත්වයක් ද ඇතිවිය හැක. මෙවැනි තත්ත්වයක් ඇති වූ විට බොහෝ දෙනා එය එදිනෙදා වැඩකටයුතුත් සමඟ ඇතිවන සාමාන්‍ය තත්ත්වයක් යැයි සිතා රෝගය එතරම් ගණන් නොගෙන සිටිති. නමුත් මේ ගණන් නොගැනීම නිසා පසුකාලීනව සිදුවන්නේ ඔබ කවුරැවත් නොසිතන දෙයකි.

බොහෝ විට මේ නිසා රාත්‍රී කාලයේදී නින්දට බාධා ගෙනදිය හැකිය. අතේ ඇති වේදනාවක් සමඟ අත පහළට එල්ලා වැටෙන අයුරින් තබා ගැනීමෙන් යම් තාවකාලික සුවයක් ගෙනආවද එය සාර්ථක පිළියමක් නොවේ.

මේ ආබාධය ඇතිවීමට විවිධ හේතු බලපායි. තයිරොක්සින් හෝමෝනයේ විෂමතාවයක් පැවතීම, දියවැඩියාව වැනි රෝග ඇතිවීම, අති ස්ථූලතාවය හේතුවෙන් ස්නායු ගමන් මාර්ගය අවහිර වීම. අවට පටකවල මේද තැන්පත් වී ස්නායු මත තෙරපීමක් ඇතිවීම වැනි හේතු මෙහි ප්‍රධාන වේ. එමෙන්ම මැණික් කටුව ආශ්‍රිතව සිදුවූ යම් අනතුරකින් ද හෝ අස්ථි බිඳීයාමකින් පසුව ඇති තත්ත්වයන් මතද මෙය ඇතිවිය හැක. බොහෝ විට සිදුවන්නේ අස්ථි බිඳීමකදී (Trauma) ස්නායුවට හානි සිදුවීමය.

ස්නායු ගමන් මාර්ගයට පිටතින් මාංශවල වර්ධනයක් හෝ මේද තැන්පත් වීමක් සිදුවීම (Lipoma) නිසාද කුහරයට ව්‍යුහය තුළ පීඩනය වැඩිවීම හේතුවෙන්ද මෙය ඇතිවිය හැක.

ගර්භනී කාලවලදී වැඩිපුර දක්නට ලැබෙනා අතර දරු ප්‍රසූතියෙන් පසුව එවැනි කාන්තාවන්ගේ මෙම තත්ත්වය ක්‍රමයෙන් පහව යන බවද දක්නට ලැබේ.

පුද්ගලයන් විසින් කරනු ලබන රුකියාවන් අනුව මෙම රෝග ලක්ෂණ ඇතිවීම වැඩිපුර දක්නට ලැබේ. විශේෂයෙන් ලියන්නන් දැඩි ලෙස කම්පනය ඇතිවන උපකරණ භාවිතා කරන්නන් (Vibrating Tools) බොහෝ විට මෙම ආබාධයට වැඩිපුර ගොඳුරු වේ.

එමෙන්ම නිතර නිතර රෙදි සේදීම, පොල් මිරිකීම වැනි කාර්යයන්හි නිරතවන ගෘහණියෝද වැඩි ලෙස මෙයට ගොදුරු වන අය වෙති. විශේෂයෙන් මැණික් කටුව ආශ්‍රිත දැඩි පීඩනයක් ලබාදෙන අවස්ථාවලදී මේ වේදනාව දැඩිලෙස දැනේ. විශේෂයෙන් මැණික් කටුව ආශ්‍රිත ප්‍රදේශය නිතර නිතර නැවීම සහ දිගහැරීමෙන් මේ වේදනාව දැනෙයි.

මේ ආකාරයට ඇති වූ විට දිගින් දිගටම අත මෙහෙයවන වැඩවල නිරත නොවිය යුතුය. අඩුම තරමේ පැයකට වරක්වත් අතට විවේකය ලබාදීම අවශ්‍යය. මැණික් කටු සන්ධිය ආශ්‍රිතව සුදුසු ව්‍යායාම්වල නිරත වීම ඒ ආශ්‍රිත ප්‍රදේශය සම්භාහනය කිරීම මඟින්ද මෙම රෝග තත්ත්වයෙන් අත්මිදිය හැක. එමෙන්ම නිවැරදි ලෙස අත තබා ගැනීමද ඉතා වැදගත්වේ.

නවීන විද්‍යාවට අනුව මේ සඳහා සුළු ශල්‍යකර්මයක් මගින් ස්නායුව මත ඇතිවන පීඩනය අවම කිරීමේ ප්‍රතිකාරයක් ද භාවිතා වෙයි.

ආයුර්වේද වෛද්‍ය ක්‍රමයට අනුව ඉතා සාර්ථක ප්‍රතිකාර මේ සඳහා ඇත. ශරීරය අභ්‍යන්තරයට ලබාදෙන ඖෂධවලට අමතරව බාහිරව ඒ ආශ්‍රිත ප්‍රදේශයට ලබාදෙන තෙල් ආලේපනය, පැලැස්තර යෙදීම මෙන්ම කරනු ලබන සරල ව්‍යායාම් ක්‍රම මගින් ද ඉතා සාර්ථක ප්‍රතිඵල ලබාගත හැක.

මේ පිළිබඳ සැලකිලිමත් නොවීමෙන් දීර්ඝකාලීනව මෙම තත්ත්වය උග්‍රවී ඒ අවට මාංශපේෂී ක්ෂය වීම හෝ දුර්වල වියහැකි වන බැවින් ඉතා ඉක්මනින් ආයුර්වේද වෛද්‍යවරයකු මුණගැසී අවශ්‍ය උපදෙස් හා ප්‍රතිකාර ලබාගැනීම අවශ්‍යය.

කුමුදුනී ද සිල්වා
ආයුර්වේද වෛද්‍ය
සෙත්සුව ආයුර්වේද රෝහල