මාතර දුම්රිය ස්ථාන වයිෆයි කලාපයට රු.79245ක බිලක්

වයිෆයි (wifi) කලාප ස්ථාපිත කර නොමිලයේ ජනතා පරිභෝජනයට රජය පහසුකම් සලසා ඇති බව කියා වයිෆයි වෙනුවෙන් බිල් ගෙවීමට දුම්රිය දෙපාර්තමේන්තුවට සිදුව ඇති බව අනාවරණය වේ.

කොළඹට අමතරව පිට පළාත් කිහිපයකම මෙම වයිෆයි පහසුකම් ලබාදී තිබිණි. එහිදී මාතර දුම්රිය ස්ථානය හා ඒ අවට වයිෆයි කලාපයක් ස්ථාපිත කර ඇත. ඒ අනුව ඉකුත් අප්‍රේල් මස පළමුවැනිදා සිට 30 වැනිදා දක්වා කාලයට රු.79245.56ක ගාස්තුවක් ගෙවිය යුතු බවට ශ්‍රී ලංකා ටෙලිකොම් මාතර දුම්රිය ස්ථානාධිපති නමට බිල්පතක් එවා තිබේ. ස්ථානාධිපතිවරයා විසින් එම බිල්පත දෙපාර්තමේන්තු මූලස්ථානය වෙත යොමුකර ඇත.

දෙපාර්තමේන්තුවේ ඉහළ නිලධාරියකු පැවැසුවේ වයිෆයි කලාපවලට අදාළ බිල්පත් ගෙවීමට දුම්රිය දෙපාර්තමේන්තුව හා ශ්‍රී ලංකා ටෙලිකොම් අතර කිසිදු ගිවිසුමක් නොමැති බවයි. රජය මගින් මෙම පහසුකම ජනතාවට නොමිලයේ ලබාදෙන්නේ නම් එහි වගකීම රජය සතු බවද එම නිලධාරියා වැඩිදුරටත් පැවැසීය. මේ නිසා බිල්පතට අදාළ ගාස්තුව ගෙවීම ප්‍රතික්‍ෂේප කරමින් ඒ බව ටෙලිකොම් ආයතනයට ඊයේ (19) දිනයේදී ලිඛිතව දැනුම්දීමට පියවර ගත් බවද ඔහු අවධාරණය කළේය. වයිෆයි කලාප ස්ථාපිතකොට ඇති දිවයිනේ අනෙකුත් දුම්රිය ස්ථානවලට මෙවැනි බිල්පත් ලැබි නැති බව රිවිර කළ සොයා බැලීමේදී හෙළිවිය.